އެވިޑް ކޮލެޖްގެ ރިސާޗް ގްރާންޓް ސްކީމް އިފްތިތާހުކޮށްފި
އެވިޑް ކޮލެޖްގެ ރިސާރޗް ގްރާންޓަކީ އެވިޑް ކޮލެޖްގެ ސެންޓަރ ފޯރ ރިސާރޗް އެންޑް އިނޮވޭޝަންގެ ބެލުމުގެ ދަށުން ހިންގާ ޕްރޮގްރާމެއް
ރިސާރޗް ސްކީމް އިފްތިތާހުކުރުމުގެ ރަސްމިއްޔާތުގެ ތެރެއިން
އެވިޑް ކޮލެޖްގައި ރިސާރޗް ގްރާންޓް ސްކީމެއް ތަޢާރަފްކޮށް އެ ސްކީމް ރަސްމީކޮށް އިފްތިތާޙްކޮށްފިއެވެ.
ބުރާސްފަތި ދުވަހު އެވިޑް ކޮލެޖްގެ ޑައިމަންޑް ކެމްޕަހުގައި ބޭއްވި ރަސްމިއްޔާތުގައި އެކޮލެޖްގެ ފެކަލްޓީ އޮފް ރިސާރޗް އެންޑް އިނޮވޭޝަންސްގެ ނަން " ސެންޓަރ ފޯރ ރިސަރޗް އެންޑް އިނޮވޭޝަންސް " އަށް ބަދަލުކުރައްވިކަން ޢިއުލާން ކުރެއްވުމަށްފަހު ރަސްމީގޮތުން ރިސަރޗް ގްރާންޓް ސްކީމް އިފްތިތާޙްކޮށްދެއްވީ އެވިޑް ކޮލެޖްގެ ޗެއަރމަން އަލްފާޟިލް ޢަބްދުﷲ މުސްތާޤް ރަޝާދެވެ.
އެވިޑް ކޮލެޖްގެ ޗެއަރމަން ހާމަކުރެއްވިގޮތުގައި މިއީ އެވިޑް ކޮލެޖްގެ ތާރީޚްގައި ލިޔެވި ފާހަގަވެގެންދާނެ އުފާވެރި ދުވަހެއްކަމަށާއި މިއަދު ފެށިގެންމިދަނީ ވަރަށް މުހިންމު ކަމެއްކަމަށާއި މިކަމުގެ ސަބަބުން ޢިލްމީ ދިރާސާތައްކުރައްވާނޭ ބޭފުޅުންތަކެއް އަލަށް އުފެދި ނުވަތަ އިތުރުވެ އެބޭފުޅުންގެ ދިރާސާތަކުގެ ސަބަބުން މުޅިމުޖުތަމައުއަށް ނުހަނު ފައިދާކުރާނެކަމަށެވެ. އަދި ޚާޢްޞަކޮށް އެވިޑް ކޮލެޖަށާއި އަދި އެވިޑް ކޮލެޖްގެ ސްޓާފުންނަށާއި ދަރިވަރުންގެ ކުރިއެރުމަށް އިތުރުމަގެއް ކޮށިގެން ދާނެއެވެ. އެމަނިކުފާނު ވިދާޅުވީ އެވިޑް ކޮލެޖްގެ ރިސަރޗް ގްރާންޓް ސްކީމް މިވަގުތަށް ޚާޢްސަކުރެވިފައިވަނީ ހަމައެކަނި އެވިޑް ކޮލެޖްގެ ސްޓާފުންނަށް ކަމުގައިވިޔަސް ކުރިއަށް އޮތް ދުވަސްތަކުގައި މިސްކީމް ފުޅާކޮށް ބައިވެރިވުމުގެ ފުރުޞަތު އާންމުކޮށް ހުޅުވާލައިގެން ކުރިއަށް ގެންދެވޭނެ ކަމަށެވެ.
މިސްކީމްގެ ދަށުން އެވިޑް ކޮލެޖްގައި މަސައްކަތްކުރައްވާ ސްޓާފުންގެ ތެރެއިން މާސްޓަރސް ފެންވަރުގެ ބޭފުޅުންނާއި މާސްޓަރސް ފެންވަރުގެ ކޯހެއްގައި މަތީ ތަޢުލީމު ޙާޞިލްކުރައްވަމުންގެންދަވާ ބޭފުޅުންނަށް ، އެވިޑް ކޮލެޖްގައި ހިންގާ އެކަޑެމިކް ކޮންމެ ޕްރޮގްރާމަކާ ގުޅޭ ގޮތުން ހައްދަވާ ރިސާރޗްތަކަށް ޕްރޮޕޯސަލް ހުށަހެޅުއްވުމުން މިކަމާގުޅޭ ހުރިހާ މަޢުލޫމާތެއް ހިމެނޭގޮތަށް ތައްޔާރުކޮށްފައިވާ ޕޮލިސީގެ ދަށުން އެޕްރޮޕޯސަލްއަށް ފަންޑުކުރެވޭނެއެވެ. އެވިޑް ކޮލެޖްގެ ރިސާރޗް ގްރާންޓަކީ އެވިޑް ކޮލެޖްގެ ސެންޓަރ ފޯރ ރިސާރޗް އެންޑް އިނޮވޭޝަންގެ ބެލުމުގެ ދަށުން ހިންގާ ޕްރޮގްރާމެކެވެ.
މިރަސްމިއްޔާތުގައި އެވިޑް ކޮލެޖްގެ ޗެއަރމަންއަށް ލަފާ ދެއްވަވާ ޚާއްޞަ މުޝީރު ޑރ. މުޙައްމަދު ޝަހީމް ޢަލީ ސައީދު އާއި އެވިޑް ކޮލެޖްގެ ސްޓެރެޓެޖިކް ޕްލޭން ތައްޔާރުކުރެއްވެވި ކޮންސަލްޓެންޓްކަމުގައިވާ ޑރ. އަޙްމަދު ޢަލިމަނިކު ބައިވެރިވެވަޑައިގެންނެވިއެވެ. އަދި މީގެ އިތުރުން އެވިޑް ކޮލެޖްގެ އެކަޑެމިކް ސްޓާފުންވެސް މިހަފްލާގައި ބައިވެރިވިއެވެ.
