އިތުރު 1096 މީހުން ޕޮޒިޓިވްވެއްޖެ
މާލެ ސަރަހައްދުން ޕޮޒިޓިވްވި 338 މީހުންނާއި، ރަށްރަށުން ޕޮޒިޓިވްވި 549 މީހުންނާއި، ރިސޯޓްތަކުން ޕޮޒިޓިވްވި 77 މީހުން ހިމެނޭ
ކޮވިޑަށް ޓެސްޓުކުރުން
އިތުރު 1096 މީހުން ޕޮޒިޓިވްވެއްޖެެވެ.
ހެލްތު ޕްރޮޓެކްޝަން އެޖެންސީ އެޗްޕީއޭއިން އާންމުކޮށްފައިވާ ތަފާސް ހިސާބުތައް ދައްކާގޮތުން ބުދަ ދުވަހުގެ އަދަދުތަކާއެކު މިހާތަނަށް ރާއްޖެއިން 154،511 މީހަކު ވަނީ ޕޮޒިޓިވްވެފައެވެ.
އަންގާރަ ދުވަހުގެ އިރުއޮއްސި 6:00 އިން ބުދަ ދުވަހުގެ އިރުއޮއްސި 6:00 އަށް ނެގި ސާމްޕަލްތަކުގެ ތެރެއިން 1096 މީހުން ވަނީ ޕޮޒިޓިވްވެފައެވެ. އަންގާރަ ދުވަހު 1502 މީހުން ޕޮޒިޓިވްވިއިރު، ހޯމަ ދުވަހު 1576 މީހުން, އަދި އާދީއްތަ ދުވަހު 1757 މީހުން ޕޮޒިޓިވްވެގެން ރިޕޯޓްކުރިއެވެ.
މި 24 ގަޑިއިރު ތެރޭގައި މާލެ ސަރަހައްދުން ނެގި 1767 ސާމްޕަލާއެކު ޖުމްލަ 4320 ސާމްޕަލް ވަނީ ނަގާފައެވެ. މީގެ ތެރެއިން 1096 މީހުން ޕޮޒިޓިވްވިއިރު، އޭގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 338 މީހުންނާއި، ރަށްރަށުން ޕޮޒިޓިވްވި 549 މީހުންނާއި، ރިސޯޓްތަކުން ޕޮޒިޓިވްވި 77 މީހުންނެވެ. މިމީހުންގެ އިތުރުން މި 24 ގަޑިއިރު ތެރޭގައި ޕޮޒިޓިވްވި 132 މީހުން ޕޮޒިޓިވްވީ ކޮން ތަނަކުން ކަމެއް ދެނެގަނެވިފައެއް ނުވެއެވެ.
ހޯމަ ދުވަހު 1368 މީހަކު ބަލިން ރަނގަޅުވެފައިވާއިރު، ޖުމްލަ 138،117 މީހުން ވަނީ ބަލިން ރަނގަޅުވެފައެވެ. އެކްޓިވް ކޭސްތަކުގެ އަދަދު 16096ށް ދަށްވެފައިވާއިރު، މީގެ ތެރެއިން ހޮސްޕިޓަލްތަކުގައި ފަރުވާދެމުން އަންނަނީ 60 މީހުންނަށެވެ.
މިހާތަނަށް 286 މީހުން ވަނީ ބަލީގައި ނިޔާވެފައެވެ. މި މަހުގެ މިހާތަނަށް 10 މީހަކު ވަނީ ބަލީގައި ނިޔާވެފައެވެ. ނިމިގެންދިޔަ ޖެނުއަރީ މަހު އެކަނި ވެސް 15 މީހުން ނިޔާވެގެން ރިޕޯޓް ކުރިއެވެ.
މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 19 އިންސައްތައިގައެވެ. މާލެ ސަރަހައްދުގައި ޚާއްސަ ފިޔަވަޅުތަކެއް އަޅާފައިވާ އިރު، މާލެ ސަރަހައްދުން ރަށްރަށަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލުތަކެއް ވަނީ މިހާރު ކަނޑައަޅާފައެވެ.
