ލާމަރުކަޒީ ކޮމިޓީން މާލެ ސިޓީގެ ޑަބްލިއުޑީސީ މެމްބަރުންނާއި ކޮމިޓީއާ ބައްދަލުކުރަނީ

މާލެ ސިޓީ ކައުންސިލްގެ އޮފީސް ތެރޭގައި ބަންދުކޮށްފައި ތިބި މައްސަލާގައި މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި ބައްދަލު ކުރަން ރައްޔިތުންގެ މަޖިލީހުގެ ލާމަރުކަޒީ ކޮމިޓީން ނިންމައިފިއެވެ.

ބުދަ ދުވަހު އޮތް ކޮމިޓީ ބައްދަލުވުމުގައި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހެޅުއްވި މަައްސަލަ އާއި ގުޅިގެން ވަނީ މަޝްވަރާ ކުރައްވާފައެވެ. މިކަމާއި ގުޅިގެން ޑަބްލިއުޑީސީގެ މެމްބަރުންނާއި ހޯމަދުވަހުގެ ހެނދުނު 9:30 ގައި ބައްދަލު ކުރެއްވުމަށް ކޮމިޓީންވަނީ ނިންމާފައެވެ.

މެމްބަރުން ވަނީ މިކަމާއި ގުޅިގެން ޑަބްލިއުޑީސީގެ މެމްބަރުންގެ ފަރާތުން ލިބޭ މައުލޫމާތު ޖެންޑަރ ކޮމިޓީއާވެސް ހިއްސާ ކުރެއްވުމަށް ނިންމަވާފައެވެ.

މާލެ ސިޓީގެ ޑަބްލިއުޑީސީގެ މެމްބަރުން އޮފީސް ތެރޭގައި 45 މިނެޓް ވަންދެން ބޭރުން ތަޅުލާފައި ބެހެއްޓި މައްސަލަ ރައްޔިތުންގެ މަޖިލީހުގެ ޖެންޑަރ ކޮމިޓީންވެސް ވަނީ ބަލަން ފަށާފައެވެ. އަދި ހޯމަދުވަހު އެ ކޮމިޓީންވެސް ވަނީ ޑަބްލިއުޑީސީގެ މެމްބަރުންނާއި ބައްދަލުކުރުމަށް ނިންމާފައެވެ.

އަންހެނުންގެ ތަރައްގީއަށް މަސައްކަތް ކުރާ ކޮމެޓީ (ޑަބްލިޔުޑީސީ)ގެ ބައްދަލުވުމެއް ކުރިއަށް ދަނިކޮށް މައްޗަންގޮޅީގައި ހުންނަ މާލެ ސިޓީ ކައުންސިލްގެ އޮފީސް ބަންދުކުރި މައްސަލައެއް ފެންމަތިވެފައިވަނީ މި މަހުގެ 6 ވަނަ ދުވަހުއެވެ.

ޑަބްލިޔުޑީސީގެ ރައީސް ރައީސް ފާތުފަތު ޝިފާ ރާއްޖެއެމްވީއަށް ވިދާޅުވެފައިވަނީ، ބައްދަލުވުންތައް ކުރިއަށް ގެންދަނީ މާލެސިޓީ ކައުންސިލަށް ރަސްމީކޮށް އެންގުމަށްފަހު ކަމަށެވެ. އެގޮތުން އާދިއްތަ ދުވަހު 1:30 ގައި ރަސްމީ ބައްދަލުވުން ކުރިއަށް ގެންގޮސްފައިވާ ކަމަށާއި، 2:00 ގައި ނުރަސްމީ ބައްދަލުވުމެއް ކުރިއަށް ގެންގޮސްފައިވާ ކަމަށެވެ. ބައްދަލުވުމަށް މައްޗަންގޮޅީ މާލެ އޮފީހަށް ދިޔައިރު ވެސް މުވައްޒަފުން ތިބި ކަމަށް އޭނާ ވިދާޅުވިއެވެ.

ޝިފާ ވިދާޅުވީ ބައްދަލުވުން ނިންމައި 3:10 ހާއިރު މީޓިން ރޫމުން ނުކުތްއިިރު އޮފީސް ބަންދުކޮށްފައިވާ ކަމަށާއި، ނުކުމެވޭނެ އެއްވެސް ގޮތެއް ނެތް ކަމަށެވެ. އަދި އެވަގުތުން ފެށިގެން މާލެ ސިޓީ ކައުންސިލްގެ އެކި ބޭފުޅުންނަށް ގުޅި ކަމަށާއި، އޮފީސް ހުޅުވާފައިވަނީ އޭގެ ގާތްގަނޑަކަށް 45 މިނެޓް ފަހުން ކަމަށް ޝިފާ ވިދާޅުވިއެވެ.

މާލެ ސިޓީ ކައުންސިލުން ޑަބްލިޔުޑީސީގެ މެމްބަރުންނަށް އުނދަގޫތައް ކުރިމަތިކުރުވާ ކަމާއި، ސިޔާސީ ގޮތުން އޮންނަ ހިތްހަމަ ނުޖެހުމެއްގެ ސަބަބުން މަސައްކަތްތަކަށް ދަތި ކުރުވާކަމަށް ޑަބްލިއުޑީސީގެ މެމްބަރުން ގެންދަނީ ވިދާޅުވަމުންނެވެ.