130 ކިލޯ ޑްރަގް މައްސަލައިގެ އަޑުއެހުން ކެންސަލް
ކަނޑުމަތީގައި ހިންގި މި އޮޕަރޭޝަނުގައި މަސްތުވާތަކެތި ރާއްޖެއަށް އެތެރެކުރުމަށް ބޭނުން ކުރި ދޯނި ފުލުހުންގެ ބެލުމުގެ ދަށަށް ގެންދިޔަ
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލާގައި އިސްކޮށް އުޅުނުކަމުގެ ތުހުމަތުވާ ޝަހީބު އިބްރާހިމް
ދިވެހިންގެ ބަޔަކު ބޭރު ބަޔަކާއި ގުޅިގެން ރާއްޖެއަށް އެތެެރެކުރި ކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގެ އަޑުއެހުން ކެންސަލްވެއްޖެއެވެ.
ކްރިމިނަލް ކޯޓުން މައުލޫމާތުދޭ ގޮތުގައި މި މައްސަލައިގެ އަޑުއެހުން ކެންސަލްވީ މޯލްޑިވްސް ކަރެކްޝަނަލް ސަރވިސްގެ ހިއަރިންގ ރޫމްތަކުގައި އިތުރު އަޑުއެހުންތަކެއް ކުރިއަށްގެންދާތީ މި މައްސަލައިގެ އަޑުއެހުން ކުރިއަށް ގެންދިއުމަށް ޖާގައެއް ނުލިބުމުގެ ސަބަބުންނެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 11 ޖެނުއަރީ 2022 ގައެވެ. އެ ދުވަހުގެ އަޑުއެހުމުގައި މި މައްސަލައިގައި އިސްކޮށް އުޅުނު ކަމުގެ ތުހުމަތުވާ 2 މީހުންގެ ތެރެއިން ހއ. ހޯރަފުށި، ވައިލެޓްވިލާ،އަހްމަދު މޫސާގެ ބަޔާއި، ގއ. ވިލިނގިލި، ލައިޓްހައުސް، ޝަހީބް އިބްރާހިމްގެ މައްޗަށް ކުރާ ދައުވާގެ ބައި ވަނީ ވަކިން ކުރިއަށް ގެންގޮސްފައެވެ.
ދިވެހިންގެ ބަޔަކު ބޭރުގެ ބަޔަކާއި ގުޅިގެން ރާއްޖެއަށް ކަނޑުމަގުން ގިނަ އަދަދެއްގެ މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކަނޑުމަތީގައި ހިންގި މި އޮޕަރޭޝަނުގައި މަސްތުވާތަކެތި ރާއްޖެއަށް އެތެރެކުރުމަށް ބޭނުން ކުރި ދޯނި ފުލުހުންގެ ބެލުމުގެ ދަށަށް ގެނެސް ބަލައި ފާސްކޮށްފައިވާއިރު، އެދޯނިން ގިނަ އަދަދެއްގެ މަސްތުވާތަކެތި ފެނިފައިވެއެވެ. އަދި މި އޮޕަރޭޝަނުގައި ހުޅުމާލެއާއި މާލޭގެ ގެތަކެއްވެސް ބަލައި ފާސްކޮށްފައިވެއެވެ. އެގޮތުން ފުލުހުން ބުނެފައިވާ ގޮތުގައި، މިތަކެތި ރާއްޖެއަށް އެތެރެކުރުމުގައި އިސްކޮށް ތިބީ ގއ. ވިލިނގިލި، ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި، ވައިލެޓްވިލާ، އަހްމަދު މޫސާ (48އ) އެވެ.
މި މައްސަލައިގެ ދިފާއީ ހެކިންގެ ގޮތުގައި ޝަހީބުގެ ފަރާތުން ވަނީ ދޯނިން މަސްތުވާތަކެތި ފެނުމުގައި އޭނާގެ އެއްވެސް ބައިވެރިވުމެއް ނެތްކަން ސާބިތު ކުރުމަށް ހެކި ހުށައަޅާފައެވެ. އަދި އެކަމާއި ގުޅިގެން ހުށައެޅި ހެކިންގެ އިތުރުން، ކިތާބީ ހެކިވެސް އޭނާ ހުށައަޅާފައިވެއެވެ. އެ މަސްތުވާތަކެއްޗަކީ އަސީލް މާހިރު ކަނޑުމަތިން ހޮވި ތަކެތިކަމަށާއި، ޝަހީބާއި ގުޅުމެއް ނެތްކަމަށް އަސީލް ބުނާ ބުނުން ދިފާއުން ފާހަގަ ކުރެއެވެ.
އޭގެ އިތުރުން، އަހުމަދު މޫސާގެ ފަރާތުން ހުށައެޅި ދިފާއީ ހެކިންގެ ތެރޭގައި 130 ކިލޯގެ މަސްތުވާތަކެތީގެ މައްސަލަައިގައި ބޭނުން ކޮށްފައިވާ ދޯންޏަކީ އެކަމަށްޓަކައި ބޭނުންކުރި ދޯންޏެއްކަން ނޭނގޭ ކަން ސާބިތު ކުރުމަށް ހުށައެޅި ހެކިން ހިމެނެއެވެ.
ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ އިސްގާޒީ އަހުމަދު ޝަކީލެވެ.
ޝަހީބް އިބްރާހީމާއި އަހްމަދު މޫސާގެ އިތުރުން 130 ކިލޯގެ މަސްތުވާތަކެތީގެ މައްސަލައިގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާޒާއި އިގްބާލްގެ މައްޗަށެވެ.
އެ ހަ މީހުންގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން ތިން ދައުވާއެއް އުފުލާފައިވެއެވެ. އެއީ މަސްތުވާތަކެތީގެ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ރާއްޖެ އެތެެރެކުރުމުގެ ކުށުގެ ދައުވާއަކާއި ޖަދުވަލް 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއަކާއި އަދި ޑައިމޯފިން ޓްރެފިކްކުރުމުގެ ކުށުގެ ދައުވާއެވެ. މި 3 ދައުވާ ސާބިތުވެއްޖެނަމަ އެމީހުންގެ މައްޗަށް 75 އަހަރުގެ ހުކުމެއް އައުމަކީ އެކަށީގެންވާ ކަމެކެވެ.
