ޑަބްލިއުޓީއޯ ޕްރޮޓޮކޯލްގައި ބައިވެރިވުމުގެ މައްސަލަ ދިރާސާކުރުމަށް ޚާރިޖީ ގުޅުންތަކާއި ބެހޭ ކޮމިޓީއަށް

ދުނިޔޭގެ ވިޔަފާރީގެ ޖަމިއްޔާ ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) ގެ ޕްރޮޓޮކޯލްއެއްގައި ބައިވެރިވާން ރުހުން ހޯދަން ހުށަހެޅި މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ބައިވެރިވުމަށް މަޖިލީހުގެ ރުހުން ހޯދުމަށް ރައީސް އިބްރާހިމް މުހައްމަދު ސާލިހު ފޮނުއްވި ސިޓީ މަޖިލީހުގެ އަމީން އާންމު ވަނީ އިއްވަވާފައެވެ. މަޖިލީހަށް ހުށަހަޅާފައިވަނީ ޑަބްލިއުޓީއޯގެ ޓްރޭޑް ރިލޭޓަޑް އެސްޕެކްޓްސް އޮފް އިންޓެލެކްޗުއަލް ޕްރޮޕަޓީ ރައިޓްސް (ޓްރިޕްސް) ގެ އެއްބަސްވުމަށް ބަދަލު ގެނައުމަށްޓަކައި އެކުލަވާލައިފައިވާ ޕްރޮޓޮކޯލް، ޕްރޮޓޮކޯލް އެމެންޑިން ދަ ޓްރިޕްސް އެގްރީމެންޓް ރާއްޖެއިން ބަަލައިގަނެ ތަސްދީގު ކުރުމަށެވެ.

ޤާނޫނު އަސާސީގެ 93 ވަނަ މާއްދާގައި ވަނީ ވެރިކަން ހިންގާ ފަރާތުން ބައިވެރިވާ ބައިނަލްއަޤުވާމީ މުއާހަދާތަކަށް އަމަލުކުރަންވާނީ ރައްޔިތުންގެ މަޖިލީހަށް ހުށަހަޅައި މަޖިލީހުން އެކަން ފާސް ކުރުމަށް ފަހުއެވެ.