ކޮވިޑް ބަލީގައި ހޮސްޕިޓަލުގައި ފަރުވާދެމުން އަންނަ މީހުންގެ އަދަދު 60ށް އަރައިފިއެވެ.

ހެލްތު ޕްރޮޓެކްޝަން އެޖެންސީ އެޗްޕީއޭއިން އާންމުކޮށްފައިވާ ތަފާސް ހިސާބުތައް ދައްކާގޮތުން ހޯމަ ދުވަހުގެ އަދަދުތަކާއެކު މިހާތަނަށް ރާއްޖެއިން 151،913 މީހަކު ވަނީ ޕޮޒިޓިވްވެފައެވެ.

އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00ށް ނެގި ސާމްޕަލްތަކުގެ ތެރެއިން 1576 މީހުން ވަނީ ޕޮޒިޓިވްވެފައެވެ. ހޯމަ ދުވަހު 1576 މީހުން ޕޮޒިޓިވްވިއިރު، އާދީއްތަ ދުވަހު 1757 މީހުން, އަދި ހޮނިހިރު ދުވަހު 1589 މީހުން ޕޮޒިޓިވްވެގެން ރިޕޯޓްކުރިއެވެ.

މި 24 ގަޑިއިރު ތެރޭގައި މާލެ ސަރަހައްދުން ނެގި 1942 ސާމްޕަލާއެކު ޖުމްލަ 5343 ސާމްޕަލް ވަނީ ނަގާފައެވެ. މީގެ ތެރެއިން 1576 މީހުން ޕޮޒިޓިވްވިއިރު، އޭގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 517 މީހުންނާއި، ރަށްރަށުން ޕޮޒިޓިވްވި 771 މީހުންނާއި، ރިސޯޓްތަކުން ޕޮޒިޓިވްވި 87 މީހުންނެވެ. މިމީހުންގެ އިތުރުން މި 24 ގަޑިއިރު ތެރޭގައި ޕޮޒިޓިވްވި 201 މީހުން ޕޮޒިޓިވްވީ ކޮން ތަނަކުން ކަމެއް ދެނެގަނެވިފައެއް ނުވެއެވެ.

ހޯމަ ދުވަހު 1969 މީހަކު ބަލިން ރަނގަޅުވެފައިވާއިރު، ޖުމްލަ 134،841 މީހުން ވަނީ ބަލިން ރަނގަޅުވެފައެވެ. އެކްޓިވް ކޭސްތަކުގެ އަދަދު 16755ށް ދަށްވެފައިވާއިރު، މީގެ ތެރެއިން ހޮސްޕިޓަލްތަކުގައި ފަރުވާދެމުން އަންނަނީ 60 މީހުންނަށެވެ. މިއީ އޭގެ ކުރީ ދުވަހާ އަޅައިބަލާއިރު 8 މީހުން އިތުރު އަދަދެކެވެ.

މިހާތަނަށް 284 މީހުން ވަނީ ބަލީގައި ނިޔާވެފައެވެ. ހޯމަ ދުވަހު އެކަކު ނިޔާވެގެން ރިޕޯޓް ކުރިއެވެ. އެއީ 67 އަހަރުގެ ދިވެހި އަންހެނެކެވެ. އޭނާއަށް ފަރުވާ ދެމުން ދިޔައީ ހުޅުމާލެ މެޑިކަލް ފެސިލިޓީގައެވެ. އާދީއްތަ ދުވަހު 2 މީހަކު ނިޔާވެގެން ރިޕޯޓް ކުރިއެވެ. އެއީ 75 އަހަރުގެ ދިވެހި އަންހެނަކާއި 21 އަހަރުގެ ދިވެހި ފިރިހެނެކެވެ. މި މަހުގެ މިހާތަނަށް 7 މީހަކު ވަނީ ބަލީގައި ނިޔާވެފައެވެ. ނިމިގެންދިޔަ ޖެނުއަރީ މަހު އެކަނި ވެސް 15 މީހުން ނިޔާވެގެން ރިޕޯޓް ކުރިއެވެ.

މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 27 އިންސައްތައިގައެވެ. މިއީ އޭގެ ކުރީ ދުވަހާ އަޅައިބަލާއިރު 2 އިންސައްތަ އިތުރު އަދަދެކެވެ. މާލެ ސަރަހައްދުގައި ޚާއްސަ ފިޔަވަޅުތަކެއް އަޅާފައިވާ އިރު، މާލެ ސަރަހައްދުން ރަށްރަށަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލުތަކެއް ވަނީ މިހާރު ކަނޑައަޅާފައެވެ.