އަފްހަމްގެ މަރާ ގުޅިގެން ފުލުހުންގެ ޓީމެއް ލަންކާއަށް ހިނގައްޖެ
7 ފެބުރުއަރީ 2022 | ހޯމަ 18:21ލަންކާ ފުލުހުންނާ ގުޅިގެން، ދިވެހި ފުލުހުން މިމައްސަލައިގެ ތަހުގީގު ކުރިޔަށް ގެންދާކަމަށް ސީޕީ ވިދާޅުވި
ލަންކާއިން ގެއްލިގެން ހޯދަމުންދިޔަ ދިވެހި ދަރިވަރު އަފްހަމް ނަސީރު
ސްރީލަންކާގައި މަރާލާފައި އޮއްވާ ފެނުނު ދިވެހި ޒުވާނާ ކަމުގައިވާ އަފްހަމް ނަސީރުގެ މަރާ ގުޅިގެން ކުރިޔަށްދާ ތަހުގީގުގައި ދިވެހި ފުލުހުންވެސް މަސައްކަތްކުރަމުން އަންނަކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ޒަޚަމްތަކަކާއެކު އަފްހަމް މަރާލާފައި އޮއްވާ ފެނިފައިވަނީ ހޮނިހިރު ދުވަހުއެވެ. އޭނާ ގެއްލިގެން ރިޕޯޓްކޮށްފައިވަނީ ހުކުރު ދުވަހުގެ ރެއެވެ. އޭނާ ގެއްލުނުއިރު ދިރިއުޅެމުން އައީ ލަންކާގެ ދެހިވެލާގައެވެ.
މިމައްސަލައާ ގުޅިގެން ކޮމިޝަނަރ އޮފް ޕޮލިސް ކުރެއްވި ޓްވީޓެއްގައި ވިދާޅުވީ ލަންކާ ފުލުހުންނާ ގުޅިގެން ދިވެހި ފުލުހުން މިމައްސަލައިގެ ތަހުގީގުކުރިޔަށް ގެންދާކަމަށެވެ. އަދި ފުލުހުންގެ ސީނިއަރ އޮފިސަރަކާއި ކްރައިމް އިންވެސްޓިގޭޝަން ކޮމާންޑްގެ އިންވެސްޓިގޭޓަރެއް ކޮލަމްބޯއަށް ހޯމަ ދުވަހު ގޮސްފައިވާކަމަށް ސީޕީ ވިދާޅުވިއެވެ.
މި ހާދިސާއާގުޅޭ ވީޑިއޯ ވަނީ އާންމުކޮށްފައެވެ. އެގޮތުން ލަންކާގެ ޓީވީއަކުން މި ހާދިސާއާގުޅޭ ބައެއް މަންޒަރުތައް ގެނެސްދީފައިވާއިރު، އެ ސަރަހައްދުން ދެމީހެއްގެ ހަށިގަނޑު ފެނިގެންދެއެވެ. ލަންކާ ފުލުހުންވެސް އެ ސަރަހައްދުގައި ހަރަކާތްތެރިވާ މަންޒަރު ފެންނައިރު، ފެނުނު 2 ހަށިގަނޑުގެ ދެމެދުގައި ގާތްގަނޑަކަށް 300 މީޓަރުގެ ދުރުމިނެއް ހުންނާނެކަމަށް ރިޕޯޓު ކޮށްފައިވެއެވެ. ދެވަނަ މީހާގެ ހަށިގަނޑު ފެނުނު ސަރަހައްދުން ވަޅިއެއްވެސް ފެނިފައިވާކަމަށް ވަނީ ރިޕޯޓު ކޮށްފައެވެ.
ވީޑިއޯއިންވެސް ފެންނަ ގޮތުގައި އެމީހުންގެ ހަށިގަނޑުގައި ގިނަ ޒަޚަމްތަކެއް ހުއްޓެވެ.
އުމުރުން 23 އަހަރުގެ އަފްހަމް ނަސީރު މަރާލާފައި އޮއްވާ ފެނުނު ބީޗް ސަރަހައްދުން، އަފްހަމްގެ ބައެއް ތަކެތިކަމަށް ބެލެވޭ ސާމާނުވެސް ފެނިފައިވެއެވެ. އަފްހަމަކީ 2019ގައި ލަންކާއަށް ބަދަލުވެ، ބިޒްނަސް މެނޭޖްމަންޓުން މަތީ ތައުލީމު ހާސިލުކުރަމުންދިޔަ ދަރިވަރެކެވެ.
