ޕޮމިސް ކަޕް މި އަހަރު ބޭއްވޭތޯ މަސައްކަތް ކުރަނީ

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ލަފާފުޅުގެ މަތިން ބާއްވާ ބައިނަލްއަގްވާމީ ފުޓުބޯޅަ މުބާރާތް "ޕޮމިސް ކަޕް" މި އަހަރު ބޭއްވޭތޯ މަސައްކަތް ކުރަމުން އަންނަ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

އޮންލައިން ނޫސް އަދަދުގެ ކުޅިވަރު ޕްރޮގްރާމް "ފޯރި" ގައި ވާހަކަ ދައްކަވަމުން ބައްސާމް ވިދާޅުވީ، ރައީސްގެ އިންވިޓޭޝަނަލް މުބާރާތެއްގެ ގޮތުގައި ބާއްވާ ޕޮމިސް ކަޕް ބާއްވަން ގަސްދުކުރަނީ އަންނަ ސެޕްޓެމްބަރު މަހުގައި ކަމަށެވެ.

ބައްސާމް ވިދާޅުވީ މި މުބާރާތް މިފަހަރު ބޭއްވުމަން ގަސްދުކުރަނީ ގައުމީ ޓީމުތައް ބައިވެރިކޮށްގެން ކަމަށާއި، މި މުބާރާތުގައި ގާތްގަނޑަކަށް ހައެއް ނޫނީ އަށް ވަރަކަށް ޓީމު ބައިވެރިވާނެ ކަމަށެވެ.

މީގެ ކުރިން ކުޅިވަރާ ބެހޭ ވަޒީރު އަޙްމަދު މަޚްލޫފް މިދިޔަ އޮކްޓޯބަރު މަހު ބޭއްވި ސާފް ޗެމްޕިއަންޝިޕްގެ ތެރެއިން ވަނީ ރާއްޖޭގައި ކޮންމެ އަހަރަކުވެސް ބައިނަލްއަގްވާމީ އިންވިޓޭޝަނަލް މުބާރާތެއް ބޭއްވުމަށް ރައީސް ވިދާޅުވެފައިވާ ކަމަށެވެ.

ބައްސާމް ވިދާޅުވީ ގައުމީ ޓީމުގެ ގިނަ މެޗުތަކެއް މިއަހަރުގެ ތެރޭގައި ސަޕޯޓަރުންނަށް ފެނިގެންދާނެ ކަމަށެވެ. އަދި ގައުމީ ޓީމުން ކާމިޔާބު ހޯދުމުގައި އެންމެ މުހިންމު ދައުރެއް އަބަދުވެސް އަދާކުރަނީ ދިވެހި ސަޕޯޓަރުން ކަމަށާއި، ދިވެހި ފުޓުބޯޅައަށް މިވަގުތު އެންމެ މުހިންމީ އެންމެ އެއްބާރުލުން ލިބިގެން ކުރަން ޖެހޭ މަސައްކަތް ކަމަށެވެ. ބައްސާމް ވަނީ ސާފް ޗެމްޕިއަންޝިޕްގައި ދިވެހި ސަޕޯޓަރުންގެ ފަރާތުން ފެނިގެންދިޔަ ސަޕޯޓު ފާހަގަކުރައްވާފައެވެ.

ގައުމީ ކޯޗު ކަމާއި ދާދި ފަހުން ހަވާލުވި އިޓަލީގެ ފްރެންޗެސްކޯ މޮރިއޭރޯގެ ކޯޗުކަމުގެ ދަށުގައި ކުޅުނު ފުރަތަމަ މުބާރާތުން މޮޅެއް ނުލިބި ނިންމާލަން ޖެހުމާއި ގުޅިގެން މޮރިއޭރޯ ވަނީ ގައުމީ ޓީމު ދެން ކުޅޭ މެޗުތަކަށް ރަނގަޅު ސްކޮޑެއް އެކުލަވާލާނެ ކަމަށް ބުނެފައެވެ. އަދި މި ފަހުން މޮރިއޭރޯ ވަނީ ކުޅުންތެރިން ޓެސްޓު ކޮށްލުމަށް ހަ ދުވަހުގެ ޓްރެއިނިން ސެޝަންތަކެއް ކުރިޔަށް ގެންގޮސްފައެވެ.