ވެރޯނާ ބަލިކޮށް ޔުވެންޓަސް ހަތަރުވަނައަށް

އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ވެރޯނާ ބަލިކޮށް ތާވަލުގެ ހަތަރުވަނައަށް ޔުވެންޓަސް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ ވެރޯނާ އަތުން 2-0 ގެ ނަތީޖާއަކުންނެވެ.

މި މެޗުގެ ފުރަތަމަ އެގާރައިގައި ޔުވެންޓަސްއިން ވަނީ ނިމިދިޔަ ޓްރާންސްފާ ބާޒާރުގައި އެ ޓީމާ އަލަށް ގުޅުނު ސާބިއާގެ ފޯވާޑް ޑޫސާން ވްލަހޮވިޗާއި ސްވިޓްޒަލެންޑުގެ މިޑްފީލްޑަރު ޑެނިސް ޒަކަރިއާ ކުޅެން އަރުވާފައެވެ. އެއާއެކު މެޗު ފަށައިގެން 13 ވަނަ މިނެޓުގައި ވްލަހޮވިޗް ވަނީ ޔުވެންޓަސްއަށް ކީޑު ނަގައިދީފައެވެ. އޭނާ މި ލަނޑު ކާމިޔާބުކޮށްފައިވަނީ ޕައުލޯ ޑިބާލާ ދިން ބޯޅައަކުންނެވެ.

އޭގެ ފަހުންވެސް މި މެޗުގައި ޔުވެންޓަސްއިން ގިނަ ހަމަލާތަކެއް އުފެއްދިއިރު، އެ ޓީމުން ލީޑު ފުޅާކޮށްފައިވަނީ މެޗުގެ 61 ވަނަ މިނެޓުގައެވެ. އަލްވާރޯ މޮރާޓާ ތަނަވަސްކޮށްދިން ފުރުސަތަކުން މި ލަނޑު ޔުވެންޓަސްއަށް ކާމިޔާބުކޮށްދިނީ އެ ޓީމާ އަލަށް ގުޅުނު ޑެނިސް ޒަކަރިއާއެވެ.

މި މޮޅާއެކު ތާވަލުގެ ހަތަރުވަނައަށް ޔުވެންޓަސް ޖެހިލީ ކުޅުނު 24 މެޗުން ލިބުނު 45 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން އިންޓަ މިލާނަށް 23 މެޗުން 53 ޕޮއިންޓް ލިބިފައިވާއިރު، ދެވަނައިގައި އޮތީ އާދީއްތަ ދުވަހުގެރޭ ވެނެޒިއާ އަތުން 2-0 ގެ ނަތީޖާއަކުން މޮޅުވި ނާޕޮލީއެވެ. ނާޕޮލީ އާއި ތިންވަނައިގައި އޮތް އޭސީ މިލާނަށް 24 މެޗުން ވަނީ 52 ޕޮއިންޓް ލިބިފައެވެ.