ރަޔާންގެ ވަކިވުން މުޅި ދުނިޔެއަށް ގެނުވީ ފުން ހިތާމައެއް

މޮރޮކޯގެ އިގްރާން ވިލެޖުގައި ދިރިއުޅެމުންދިޔަ އުމުރުން އެންމެ ފަސް އަހަރުގެ ރަޔާން އޮރަމް ދިޔައީ އެ ސަރަހައްދުގެ އުސްބިންތަކުގެ މަތީގައި ކޮންމެވެސް ކުޅިވަރެއްގައި މަޝްއޫލުވެއެވެ. އޭރު ރަޔާންގެ ބައްޕަވެސް އެ ސަރަހައްދުގައި ހުއްޓެވެ. އެކަމަކު އޭނާ ހުރީ މަސައްކަތެއް ކުރަން ކަމުން ރަޔާންގެ ހަރަކާތްތަކަށް މާބޮޑު ސަމާލުކަމެއް ދެވިފައެއް ނުވެއެވެ. އެހެންނަމަވެސް އިރުކޮޅެއް ފަހުން ރަޔާންގެ އެއްވެސް ޚަބަރެއް ނުވެގެން ރަޔާން ހޯދަން ވަނީ ފަށާފައެވެ.

ރަޔާން ހޯދުމުގެ މަސައްކަތް އާއިލާއިން ކުރަމުން ދަނިކޮށް ވަޅެއް ކައިރީގައި ކުޑަކުއްޖެއްގެ ފިޔަވަޅު ހުރިތަން ފެނިގެން އެ އާއިލާއިން ވަނީ އެ ވަޅަށް އަލިކޮށް ވަޅުގެ އެތެރެ ބަލާފައެވެ. އެ ވަޅަކީ ބޭނުންކުރާ ވަޅެއް ނޫނެވެ. އަދި އެވަޅުގައި މައްޗެއްވެސް ޖަހާފައެއް ނެތެވެ. ރަޔާންގެ އާއިލާއިން ވަނީ ފޯނުގެ ކެމެރާ ޖައްސުމަށްފަހު އެ ފޯނު ވަޅަށް ތިރިކޮށްގެން ބަލާފައެވެ. މިގޮތަށް ބެލި ބެލުމުން ރަޔާން އެ ވަޅަށް ވެއްޓިފައި އޮތްކަން ވަނީ ކަށަވަރުކުރެވިފައެެވެ. އެހާ ހިސާބުން ރަޔާންގެ އާއިލާއިން ވަނީ އެކަން އަންގަންޖެހޭ ފަރާތްތަކަށް އަންގާފައެވެ. އެއީ ފެބްރުއަރީ މަހުގެ 1 ވަނަ ދުވަހެވެ.

ރަޔާން ވެއްޓުނު ވަޅަކީ 105 ފޫޓުގެ ފުން ވަޅެކެވެ. އެ ވަޅުގެ އެންމެ މަތިން ފުޅާމިނުގައި 45 ސެންޓިމީޓަރު ހުރިނަމަވެސް ވަޅުގެ އެތެރެ ވަރަށް ހަންޏެވެ. އެހެންކަމުން ވަޅުތެރެއަށް ފައިބައިގެން ރަޔާން ސަލަމަތްކުރުމަށްވެސް ވަނީ ދަތިވެފައެވެ. އަދި އެސަރަހައްދަކީ ފަރުބަދަމަތީ ސަރަހައްދެއް ކަމުން, ވަޅު އިތުރަށް ފުޅާކޮށްފިނަމަ ބިންގަނޑު ކަނޑައިގެން ދިއުން ފަދަ ކަމެއް ދިމާވެދާނެތީ އެކަން ކުރުމަށްވެސް ދަތިވީއެވެ. އެހާހިސާބުން ދެން މަސައްކަތްފެށީ ރަޔާން ވެއްޓިފައި އޮތް ހިސާބުން އަޑިން ބިންގަނޑު ކޮނުމަށެވެ.

ރަޔާން ސަލާމަތްކުރުމުގެ މަސައްކަތް ކުރަމުންގެންދިޔައިރު އެ މަސައްކަތުގައި ހަރަކާތްތެރިވި މީހުން ގެންދިޔައީ ރަޔާނަށް ބޭނުންވާ ކާނާއާއި ބޯފެނާއި، އޮކްސިޖަންފަދަ ތަކެތި ފޯރުކޮށްދެމުންނެވެ. އަދި ކެމެރާ ތިރިކޮށްގެން ރަޔާންގެ ހަރަކާތްތައް ބަލަމުންގެންގޮސްފައިވެއެވެ. ވަޅުގައި ރަޔާން އޮތީ އަރިއަކަށް އޮށޯވެލައިގެން ކަމަށާއި, އަދި ބޮލަށް އެކި ވަރުގެ ޒަޚަމްތައް ލިބިފައިވާކަމަށް ރެސްކިއު ޓީމުން ބުނެފައިވެއެވެ. ރެސްކިއު ޓީމުން ގެންދިޔައީ ރަޔާން ހޯދުމުގެ މަސައްކަތް ހުއްޓުމެއްނެތި ކުރަމުންނެވެ. އެވަގުތު ރަޔާންގެ ހިތަށް އަރައި ފައިބާނީ ކީކޭބާއެވެ؟

4 ދުވަހުގެ މަސައްކަތަށްފަހު ރަޔާން ސަލާމަތްކުރެވުނީ ފެބްރުއަރީ 5 ވަނަ ދުވަހުއެވެ. އެހެންނަމަވެސް އެ ވަޅުން ނަގާފައިވަނީ ރަޔާންގެ ފުރާނަ ނެތް މަސްގަނޑެވެ. ރަޔާން ސަލާމަތްކުރެވުމުގެ ކުރިން ރަޔާން ވަނީ މި ދުނިޔެ ދޫކޮށް ގޮސްފައެވެ. إِنَّا لِلَّٰهِ وَإِنَّا إِلَيْهِ رَاجِعُونَ. 5 ދުވަސްވީއިރުވެސް ރަޔާންގެ އާއިލާއިން ތިބީ ނޭވާ ހިފަހައްޓާލައިގެންނެވެ. އަލް ޖަޒީރާއާ ވާހަކަދައްކަމުން ރަޔާންގެ މަންމަ ބުނީ ދަރިފުޅު ސަލާމަތުން ވަޅުން ނެގޭތޯ ވަރަށް ދުއާކުރިކަމަށެވެ.

ރަޔާންގެ މުޅި އާއިލާ މިވަގުތު ވަނީ ނުހަނު ފުން ހިތާމައެއްގެ ތެރޭގައެވެ. ހަމައެކަނި ރަޔާންގެ އާއިލާއެއް ނޫނެވެ. މުޅި ދުނިޔެއިންވެސް ދަނީ މި ހިތާމައިގައި ބައިވެރިވަމުންނެވެ. ރަޔާންގެ ފުުރާނައަށް ހެޔޮ ރަހުމަތް ލައްވައި ސުވަރުގޭގެ ދާއިމީ ނިއުމަތް މިންވަރުކުރައްވާތޯ ދުއާ ކުރަމުންނެވެ. މަތްﷲ ރަޔާންގެ މައުސޫމް ފުރާނައަށް ހެޔޮ ރަހުމަތް ލައްވައި، ސުވަރުގޭގެ ދައިމީ ނިއުމަތް މިންވަރު ކުރައްވާށި! އަދި މި އުނދަގޫ ވަގުތުގައި ރަޔާންގެ އާއިލާއަށް ކެތްތެރިކަން ދެއްވާށި! އާމީން!