ދެހިވެލަ ބީޗް ސަރަހައްދުން ފެނުނީ އަފްހާމްގެ ހަށިގަނޑު: އާއިލާ
އަފްހާމްގެ އާއިލާގެ މީހަކުވެސް ވަނީ ދެހިވެލަ ބީޗް ސަރަހައްދުން ފެނިފައިވަނީ އަފްހާމްގެ ހަށިގަނޑުކަން ކަށަވަރު ކޮށްދީފައި
ލަންކާއިން ގެއްލިގެން ހޯދަމުންދިޔަ ދިވެހި ދަރިވަރު އިފްހާމް ނަސީރު
ދެހިވެލަ ބީޗް ސަރަހައްދުން ފެނިފައިވަނީ ސްރީލަންކާއިން ގެއްލުނު ދިވެހި ޒުވާނާ ދ. މީދޫ، މާކޯނި، އަފްހާމް ނަސީރުގެ ހަށިގަނޑުކަމަށް އޭނާގެ އާއިލާއިން ބުނެފިއެވެ.
އުމުރުން 21 އަހަރުގެ އަފްހާމް ގެއްލިގެން ހޯދަން ފަށާފައިވަނީ ހުކުރު ދުވަހުގެ ރޭގައެވެ. އޭނާ ގެއްލުނުއިރު ދިރިއުޅެމުން އައީ ލަންކާގެ ދެހިވެލާގައެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި ދެހިވެލަ ބީޗް ސަރަހައްދުގައި މަރާލާފައި އޮތް ދެ މީހެއްގެ ހަށިގަނޑު ފެނިފައިވެއެވެ. އަދި މަރާލާފައި އޮއްވާ ފެނިފައިވާ ދެ މީހުންގެ ތެރެއިން އެކަކީ އަފްހާމް ކަމަށް ލަންކާގެ ބައެއް ނޫސްތަކުގައި ވަނީ ރިޕޯޓުކޮށްފައެވެ. މަރުވެފައި އޮއްވާ ފެނުނު ދެމީހުންގެ ހަށިގަނޑަށްވެސް ބޮޑެތި ޒަޚަމްތަކެއް ދީފައިވެއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަމުން އަފްހާމްގެ އާއިލާގެ މީހަކުވެސް ވަނީ ދެހިވެލަ ބީޗް ސަރަހައްދުން ފެނިފައިވަނީ އަފްހާމްގެ ހަށިގަނޑުކަން ކަށަވަރު ކޮށްދީފައެވެ. ނަމަވެސް އެކަމާއި ގުޅޭ ތަހުގީގާއި، އެ ޙާދިސާއާއި ގުޅޭ މައުލޫމާތު އަދި އާއިލާއަށްވެސް މުޅިން ސާފު ނުވާކަމަށް އޭނާ ބުންޏެވެ.
އެކަމާއި ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވެފައިވަނީ ލަންކާގައި ދިވެހި ފިރިހެނަކު މަރާލާފައިވާކަމަށް ދެކެވޭ ވާހަކަ ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި ކަމާ ގުޅުން ހުރި އިދާރާތަކާއި ގުޅިގެން ބަލަންޖެހޭ ކަންކަން ބަލަމުންދާކަމަށްވެސް ފުލުހުންގެ މީޑިއާ އޮފިޝަލު ވިދާޅުވިއެވެ.
މި ޙާދިސާއާއި ގުޅޭ ވީޑިއޯއެއް މީސްމީޑިއާގައި ދަނީ ދައުރުވަމުންނެވެ. އެގޮތުން ލަންކާގެ ޓީވީއަކުން މި ޙާދިސާއާއި ގުޅޭ ބައެއް މަންޒަރުތައް ގެނެސްދީފައިވާއިރު، އެ ސަރަޙައްދުން ދެމީހެއްގެ ހަށިގަނޑު ފެނިގެންދެއެވެ. ލަންކާ ފުލުހުންވެސް އެ ސަރަޙައްދުގައި ޙަރަކާތްތެރިވާ މަންޒަރު ފެންނައިރު، ދެމީހުންގެ ހަށިގަނޑު ފެނުނު ސަރަޙައްދުގައި ގާތްގަނޑަކަށް 300 މީޓަރުގެ ދުރުމިނެއް ހުންނާނެކަމަށް ރިޕޯޓު ކޮށްފައިވެއެވެ. ދެވަނަ މީހާގެ ހަށިގަނޑު ފެނުނު ސަރަޙައްދުން ވަޅިއެއްވެސް ފެނިފައިވާކަމަށް ވަނީ ރިޕޯޓު ކޮށްފައެވެ.
ވީޑިއޯއިންވެސް ފެންނަ ގޮތުގައި އެމީހުންގެ ހަށިގަނޑުގައި ގިނަ ޒަޚަމްތަކެއް ހުއްޓެވެ.
އެކަމާއި ގުޅޭގޮތުން ރާއްޖެއެމްވީން ސުވާލު ކުރުމުން ފޮރިން މިނިސްޓްރީން ބުނީ، އެކަމާއި ގުޅޭގޮތުން ލަންކާގެ ކަމާބެހޭ އިދާރާތަކާއި މަޝްވަރާ ކުރަމުންދާ ކަމަށެވެ. އަދި ދިވެހި ފުލުހުން ލަންކާ ފުލުހުންނާއި ގުޅިގެން މަސައްކަތް ކުރަމުންދާކަމަށް މިނިސްޓްރީން ވަނީ ބުނެފައެވެ.
