ލަންކާއިން ގެއްލުނު ޒުވާނާ މަރުވެފައި އޮއްވާ ފެނިއްޖެ
5 ފެބުރުއަރީ 2022 | ހޮނިހިރު 18:49ގެއްލުނުއިރު ދިރިއުޅެމުން އައީ ލަންކާގެ ދެހިވެލާގައި
ލަންކާއިން ގެއްލިގެން ހޯދަމުންދިޔަ ދިވެހި ދަރިވަރު އިފްހާމް ނަސީރު
ސްރީލަންކާއިން ގެއްލުނު ދިވެހި ޒުވާނާ މަރުވެފައިއޮއްވާ ފެނިއްޖެއެވެ.
ގެއްލިގެން ހޯދަމުން ގޮސްފައިވަނީ ދ. މީދޫ، މާކޯނި، އިފްހާމް ނަސީރުއެވެ. އުމުރުން 21 އަހަރުގެ އިފްހާމް ގެއްލިގެން ހޯދަން ފަށާފައިވަނީ ހުކުރު ދުވަހުގެ ރޭގައެވެ. އޭނާ ގެއްލުނުއިރު ދިރިއުޅެމުން އައީ ލަންކާގެ ދެހިވެލާގައެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި ދެހިވެލަ ބީޗް ސަރަހައްދުގައި މަރާލާފައި އޮތް ދެ މީހެއްގެ ހަށިގަނޑު ފެނިފައިވެއެވެ. އަދި މަރާލާފައި އޮއްވާ ފެނިފައިވާ ދެ މީހުންގެ ތެރެއިން އެކަކީ އިފްހާމް ކަމަށް ލަންކާގެ ބައެއް ނޫސްތަކުގައި ވަނީ ރިޕޯޓުކޮށްފައެވެ. މަރުވެފައި އޮއްވާ ފެނުނު ދެމީހުންގެ ހަށިގަނޑަށްވެސް ބޮޑެތި ޒަޚަމްތަކެއް ދިފައިވެއެވެ.
އިފްހާމް ގެއްލިގެން އޭނާގެ އާއިލާއިން ހޯދަމުން އައި އިރު، އާއިލާއިން ބުނީ އެންމެ ފަހުން އޭނާގެ ޚަބަރެއްވީ ހުކުރު ދުވަހުގެ ރޭ ކަމަށެވެ. އަދި އޭނާ އެންމެ ފަހުން ފެނުނުއިރު ލައިގެންހުރީ ލައިގެން ހުރީ ކަޅު ކުލައިގެ ޓީޝާޓެއް ކަމަށެވެ.
ލަންކާގައި ތައުލީމު ހާސިލުކުރަމުން އައި އިފްހާމް ގެއްލުމާއެކު ފޮރިން މިނިސްޓްރީން ވަނީ އޭނާ ހޯދުމަށް ލަންކާގެ ކަމާބެހޭ އިދާރާތަކާ އެކު މަސައްކަތްކޮށްފައެވެ. އަދި މަރުވެފައިވާ ދެމީހުންގެ މައުލޫމާތު ލިބިފައިވީ ނަމަވެސް އޭގެ ތެރޭގައި އިފްހާމްގެ ހަށިގަނޑު ހިމެނޭކަން މިނިސްޓްރީއަށް މިހާތަނަށް ޔަގީންކުރެވިފައެއްް ނުވެއެވެ. މިކަމާ ގުޅޭގޮތުން ދިވެހި ފުލުހުންގެ ބަހެއް މިހާތަނަށް ލިބިފައެއް ނުވެއެވެ.
