އެއްވެސް ސަރުކާރަކުން އިންވެސްޓް ނުކުރާ މިންވަރަށް މި ސަރުކާރުން މަސްވެރިކަމަށް އިންވެސްޓް ކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޯޕަރޭޝަން (މިފްކޯ)ގެ މެނޭޖިންގ ޑިރެކްޓަރ އިސްމާއިލް ފައުޒީ ވިދާޅުވެއްޖެއެވެ.

މިއަހަރުގެ މެދުތެރޭގައި އެސްޓީއޯގެ ދަށުން މިފްކޯ ވަކިކޮށް، މުޅިން ވަކި ކުންފުންޏަކަށް ހަދަން ނިންމަވާފައިވާކަމަށް ރައީސްގެ ރިޔާސީ ބަޔާނުގައި ވިދާޅުވެފައިވެއެވެ. ހަމައެއާއެކު، 118 ދޯންޏެއްގައި މަސް ފިނިކުރާ ނިޒާމް ހަރުކުރުމަށް މިއަހަރުގެ ތެރޭގައި 59 މިލިއަން ރުފިޔާގެ ލުއި ލޯން ދޫކުރައްވާނެ ކަމަށްވެސް ރައީސް ވިދާޅުވެފައިވެއެވެ. އަދި އަންނަ މާޗް މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑުވާނެކަންވެސް މިއީ ރައީސްގެ ރިޔާސީ ބަޔާނުގައި ހާމަކުރައްވާފައިވާ ކަންކަމެވެ.

ރާއްޖެއެމްވީއާ ވާހަކަ ދައްކަވަމުން ފައުޒީ ވިދާޅުވީ، ފާއިތުވި ދިޔަ 3 އަހަރުގެ ތެރޭގައި މިފްކޯގެ މުވައްޒަފުން ކޮށްފައިވާ މަސައްކަތްތަކަށް ޝުކުރު ހައްގު ކަމަށެވެ.

ފައުޒީ ވިދާޅުވީ، ރައީސްގެ ރިޔާސީ ބަޔާނުގައި މިފްކޯގެ ވާހަކަ ހިމަނުއްވާފައިވާއިރު، މިފްކޯއާ ގުޅުންހުރި ގިނަ ކަންތައްތަކެއް ކުރެއްވުމުގެ ވާހަކަ ހިމަނުއްވާފައިވާ ކަމަށެވެ. އޭގެ ތެރޭގައި މިފްކޯ ވަކި ކުންފުންޏަކަށް ހައްދަވާ ވާހަކަވެސް ހިމަނުއްވާފައިވާއިރު، މިއީ މަސްވެރިންނަށްވެސް އުއްމީދީ ވާހަކަތަކެއް ކަމަށެވެ.

ފައުޒީ ވިދާޅުވީ، މި ސަރުކާރު އައިއިރު މިފްކޯއަށް ނުހަނު ބޮޑެތި ގޮންޖެހުންތައް ހުރި ކަމަށެވެ. އޭގެ ތެރޭގައި މަސްވެރިންނަށް ދޭންޖެހޭ ފައިސާއާއި ގުޅޭ ގިނަ ޝަކުވާތަކެއް ހުރި ނަމަވެސް، މި ސަރުކާރު އައިސް މަސްވެރިންނަށް ދޭންޖެހޭ 39 މިލިއަން ރުފިޔާ ދީފައިވާކަމަށް ފައުޒީ ވިދާޅުވިއެވެ. ހަމައެއާއެކު، މިފްކޯގެ ކެޕޭސިޓީއަށްވެސް އޭރު ގޮންޖެހުންތައް ހުރިނަމަވެސް، އެކަންކަން ހައްލު ކުރުމަށްވެސް މި ސަރުކާރުން ހަރުދަނާ މަސައްކަތްތަކެއް ކުރެވިފައިވާކަން ފައުޒީ ފާހަގަ ކުރެއްވިއެވެ. ފައުޒީ ވިދާޅުވާ ގޮތުގައި އެއްވެސް ސަރުކާރަކުން މަސްވެރިކަމަށް އިންވެސްޓް ނުކުރާ މިންވަރަށް މި ސަރުކާރުން ވަނީ މަސްވެރިކަމަށް އިންވެސްޓްކޮށްފައެވެ. އެގޮތުން އެއް ބިލިއަން ރުފިޔާއަށްވުރެ ބޮޑު އަދަދެއް އިންވެސްޓްކޮށްގެން މި ސަރުކާރުން މަސްވެރިކަން ތަރައްގީކުރުމުގެ މަސައްކަތް ފެށުމަށް ތައްޔާރުވަމުންދާކަން ފައުޒީ ފާހަގަ ކުރެއްވިއެވެ.

ފައުޒީ ވިދާޅުވީ މި ސަރުކާރުން މަސްވެރިކަމަށް ވީ ވައުދު ފުއްދަމުން ގެންދާ ކަމަށާއި، އެ މަންޒަރުވެސް ފެންނަމުންދާކަމަށެވެ. ފާއިތުވި 3 އަހަރުވެސް 2.6 ބިލިއަން ރުފިޔާ މަސްވެރިންނަށް ދޫކޮށްފައިވާކަން ފާހަގަ ކުރައްވަމުން ފައުޒީ ވަނީ މިފްކޯއާއި ގުޅިގެން މަސްވެރިންވެސް ކުރަމުންދާ މަސައްކަތް ފާހަގަ ކުރައްވާފައެވެ.

ތަރައްގީގެ މަސައްކަތްތައް ނިމޭއިރު މިފްކޯގެ ސްޓޯރޭޖް ކެޕޭސިޓީ 13،000އެއްހާ ޓަނަށް އިތުރުވެގެންދާނެ ކަމަށްވެސް ފައުޒީ ވަނީ ވިދާޅުވެފައެވެ.

މިފްކޯ ތަރައްގީކުރުމަށް، ސައޫދީ ފަންޑުގެ ދަށުން 1 ބިލިއަން ރުފިޔާގެ މަޝްރޫއުތަކެއް ހިންގަން ވަނީ ނިންމާފައެވެ. މި މަޝްރޫއުތަކާ ގުޅޭގޮތުން ރާއްޖެޓީވީގެ ފަސް ކާފު ޕްރޮގްރާމުގައި ވާހަކަދައްކަވަމުން ފައުޒީ ވިދާޅުވީ މިފްކޯ ތަރައްގީކުރުމަށް މީގެ ކުރީގެ އެއްވެސް ސަރުކާރަކުން ނުގެންގުޅޭ ވަރުގެ ޕްލޭނެއް މި ސަރުކާރުން ގެންގުޅޭ ކަމަށެވެ.