މިއަހަރުގެ ފުރަތަމަ މަހުވެސް ރާއްޖޭގެ ފަތުރުވެރިކަމަށް ކުރިއެރުން

ނިމިދިޔަ ޖެނުއަރީ މަހުގެ ފުރަތަމަ 29 ދުވަހު 122،000 އަށްވުރެ ގިނަ ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ހާމަކޮށްފިއެވެ.

ޓުއަރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ 29 ވަނަ ދުވަހު ރާއްޖެ އައި ފަތުރުވެރިންގެ އަދަދު ވަނީ 2021 ވަނަ އަހަރުގެ މި މުއްދަތާ އަޅާ ބަލާއިރު 45.7 އިންސައްތަ އިތުރުވެފައެވެ. މިއަހަރުގެ މި މުއްދަތުގައި 122،575 ފަތުރުވެރިން ރާއްޖެ އައިސްފައިވާއިރު، 2021 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 84،148 ފަތުރުވެރިން ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ.

2020 ވަނަ އަހަރުގެ މި މުއްދަތުގައި 164،502 ފަތުރުވެރިން ރާއްޖެ އައިސްފައިވެއެވެ. އަދި 2019 ވަނަ އަހަރުގެ މި މުއްދަތުގައި 141،168 ފަތުރުވެރިން ވަނީ ރާއްޖެ އައިސްފައެވެ.

ޓުއަރިޒަމް މިނިސްޓްރީން ބުނީ މިއަހަރުގެ މި މުއްދަތުގައި ދުވާލެއްގެ މައްޗަށް 4،227 ފަތުރުވެރިން ރާއްޖެ އައިސްފައިވާކަމަށެވެ. މިއަހަރު އެންމެ ގިނަ ފަތުރުވެރިން އައިސްފައިވަނީ ޖެނުއަރީ 2 ވަނަ ދުވަހު ކަމަށް ޓުއަރިޒަމް މިނިސްޓްރީން ބުނެފައިވެއެވެ.

މިއަހަރުގެ މިހާތަނަށް އައި ފަތުރުވެރިންގެ އެންމެ ބޮޑު ބައެއް ހިއްސާކުރަނީ ރަޝިއާ މާކެޓުގެ ފަތުރުވެރިންނެވެ. އެގޮތުން ރަޝިއާ މާކެޓުން އައި ފަތުރުވެރިން 18.1 އިންސައްތަ ހިއްސާކުރާއިރު، ދެވަނައަށް އެންމެ ގިނައިން ފަތުރުވެރިން އައިސްފައިވަނީ ޔޫކޭ މާކެޓުން ކަމަށް ޓުއަރިޒަމް މިނިސްޓްރީން ބުނެފައިވެއެވެ. ޔޫކޭ މާކެޓަށްފަހު އެންމެ ގިނަ ފަތުރުވެރިން އައިސްފައިވަނީ އިންޑިއާއިން ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ. އެއަށްފަހު އިޓަލީ، ޖަރުމަނު، ޔޫކްރޭން، ފްރާންސް، އެމެރިކާ، ސައުދީ އަރަބިއާ އަދި އޮސްޓްރޭލިއާ ހިމެނެއެވެ.

މީގެ އިތުރުން ރާއްޖޭގައި ހުރި ފަތުރުވެރިންގެ އެކޮމޮޑޭޝަން ފެސިލިޓީތަކުގެ ތެރެއިން 941 ތަނެއް މިވަގުތު ޚިދުމަތަށް ހުޅުވާލާފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. މި ފެސިލިޓީތަކުގައި 53،942 ބެޑް ކެޕޭސިޓީ އެބަހުރި ކަމަށް ވެސް އެމިނިސްޓްރީން ހާމަކޮށްފައިވެއެވެ. ބެޑް ކެޕޭސިޓީގެ 72 އިންސައްތަ ހިއްސާކުރަނީ ރިސޯޓުތަކުންނެވެ. 20 އިންސައްތަ ގެސްޓްހައުސްތަކުން ހިއްސާކުރާއިރު، 5 އިންސައްތަ ސަފާރީތަކުން އަދި 3 އިންސައްތަ ހިއްސާކުރަނީ ހޮޓެލްތަކުންނެވެ.

މިއަހަރު ނިމުމުގެ ކުރިން 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. 2021 ވަނަ އަހަރު 1.3 މިލިއަން ފަތުރުވެރިން ގެނައުމަށް އަމާޒުކޮށް، އެއަމާޒު ކާމިޔާބުކޮށް 2021 ވަނަ އަހަރު ނިމުނުއިރު 1.32 މިލިއަން ފަތުރުވެރިން ވަނީ ރާއްޖެ ގެނެސްފައެވެ.