ފޯކައިދޫގެ އައު އިންޖީނުގެ އާއި އޮފީސް ރައީސް ހުޅުވައިދެއްވައިފި

ށ. ފޯކައިދޫގައި އަލަށް އިމާރާތްކުރި އިންޖީނުގެ އާއި އޮފީސް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ހުޅުވައިދެއްވައިފިއެވެ.

ފޯކައިދޫގެ އައު އިންޖީނުގެ އާއި އޮފީސް ހުޅުވައިދެއްވީ ބުރާސްފަތި ދުވަހު ރައީސް އެރަށަށް ކުރެއްވި ދަތުރުފުޅެއްގައެވެ. މި ރަސްމިއްޔާތުގައި ރައީސް ސާލިހުގެ އިތުރުން ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ފެނަކައިގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު ބައިވެރިވެވަޑައިގެންނެވިއެވެ.

ރައީސް ވަނީ ފޯކައިދޫގައި ބޭނުންކުރަމުން އައި ޒަމާންވީ އިންޖީނުގެ ނިއްވާލެއްވުމަށްފަހު ޒަމާނީ ފެންވަރަށް ހަދާފައިވާ އައު އިންޖީނުގެ އެރަށުގައި ހުޅުވައިދެއްވާފައެވެ. ފޯކައިދޫގައި އަލަށް ޤާއިމްކުރެވުނު އިންޖީނުގޭގެ ޖުމްލަ ކެޕޭސިޓީ ވަނީ 1.5 މެގަވޯޓަށް ބަދަލުކުރެވިފައެވެ. އަދި ޑިސްޓްރިބިއުޝަން ނެޓްވޯކް އާކުރުމަށްޓަކައި ޖުމްލަ 3،000 މީޓަރުގެ ކޭބަލް ވަޅުލައި، ހަތަރު ޓްރާންސްފޯމަރު ބަހައްޓައި، ހައިވޮލްޓޭޖް ވިއުގައަކަށް ވަނީ ބަދަލުކުރެވިފައެވެ. މިއީ ދަތިކަމެއް ނެތި ކުރިއަށް އޮތް 50 އަހަރަށް ބޭނުންވާ އިތުރު ވަސީލަތްތައް ފަހިކޮށް ފުރިހަމަކުރެވިފައިވާ ޒަމާނީ އިންޖީނުގެއެއް ކަމަށް ފެނަކައިން ބުނެއެވެ.

އަސާސީ ޚިދުމަތްތައް ރައްޔިތުންނަށް ފޯރުކޮށްދިނުމަކީ ރައީސްގެ ވައުދެއް ކަމަށްވާއިރު، އެވައުދު ފުރިހަމަކޮށްދެއްވުމަށްޓަކައި ފެނަކައިން ކުރަމުން އަންނަ މަސައްކަތް ރައީސް ފާހަގަކުރެއްވިއެވެ. ރައީސް ވަނީ ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރާއި އެކުންފުނީގެ ހީވާގި މުވައްޒަފުންނަށް ޝުކުރުއަދާކުރައްވާފައެވެ.

ފެނަކައިން ކުރަމުންދާ މަސައްކަތުގެ ތެރެއިން 39 ރަށެއްގައި އައު އިންޖީނުގެ ނިންމާފައިވާއިރު، އިތުރު 31 ރަށެއްގައި އެމަސައްކަތް މިހާރު އަންނަނީ ކުރަމުންނެވެ. ފާއިތުވި 70 އަހަރުން އަތޮޅުތެރޭގައި ގާއިމްކުރެވުނު ކަރަންޓުގެ ޖުމްލް ކެޕޭސިޓީ މިދިޔަ ތިން އަހަރުން ފެނަކައިން ވަނީ ދެގުނަކޮށްފައެވެ.