ރައީސް މައުމޫން ވެރިކަމުގައި ކަންކަން ހިނގާފައިވާ އޮތް ރައްޔިތުން ހަނދާނެއް ނުނެތޭ
ދެ ރައީސުން ށ. ކޮމަންޑޫގައި
ކުރީގެ ރައީސް އަބްދުﷲ ޔާމީންގެ ވެރިކަމުގައި ށ. ކޮމަންޑޫ އުވާލަން އުޅުއްވި ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ކޮމަންޑޫގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓްގެ ކެމްޕެއިންގައި ކޮމަންޑޫ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ. ރައީސް ނަޝީދު ވިދާޅުވީ, މިފަހަރުގެ ބައި އިލެކްޝަންގައި ކޮމަންޑޫ ގޮނޑިއަށް ސިޔާސީ ފަރާތްތަކުން މާ ބޮޑަށް ޝައުގުވެރިކަން ބަހައްޓަވާ ކަމަށާއި، ނަމަވެސް މީގެ ކުރިން ހިނގާފައިވާ ކަންކަމަށް ބަލަން ޖެހޭ ކަމަށެވެ. އަދި ކުރީގެ ރައީސް މައުމޫން އަބްދުލްގައްޔޫމުގެ 30 އަހަރުގެ ދިގު ވެރިކަމުގައި ކަންކަން ހިނގާފައިވާ އޮތް ގޮތް ރައްޔިތުން ހަނދާން ނުނެތޭ ކަމަށް އެމަނިކުފާނު ވިދާޅުވިއެވެ.
ޑިމޮކްރަސީގެ އެންމެ މުހިންމު ބޭނުމަކީ ގިނަގިނައިން އިންތިޚާބު އޮތުންކަން ފާހަގަކުރައްވައި ރައީސް ނަޝީދު ވިދާޅުވީ, އެމްޑީޕީން ވެރިކަމުގެ ނިޒާމަށް ބަދަލު ގެނައީ ރައްޔިތުންގެ ގާތަށް އައުމަށް އެދޭތީ ކަމަށާއި އެއީ ގައުމެއް ތަރައްގީ ކުރުމުގައި އެންމެ ރަނގަޅު ގޮތްކަމުގައިވާތީ ކަމަށެވެ.
މިއަދުގެ ހާލަތަށް އިޝާރާތް ކުރައްވައި ރައީސް ނަޝީދު ވިދާޅުވީ މިފަހަރުގެ އިންތިޚާބުގައި ވެސް އެމްޑީޕީ ކެންޑިޑޭޓަށް ވޯޓު ދިނުމަށް އެދޭ ކަމަށާއި، ތިލަފަތަށް ވޯޓު ދޭންޖެހޭ ގިނަ ސަބަބުތަކެއް އެބަހުރި ކަމަށެވެ. ރައީސް ނަޝީދު ވިދާޅުވީ ޑިމޮކްރަސީ އަދި އިސްލާމް ދީނުގެ މަތިވެރި އުސޫލުތެރެއިން ހުރިހާ ކަމެއް ކުރިއަށް ގެންދާއިރު، އެއްވެސް ރަށެއް ބާކީ ކުރުމެއް ނެތި، އަތޮޅުތެރެ ތަރައްގީ ކުރަމުންދާ ކަމަށެވެ. މިއަދު ރާއްޖެއަކީ ބައިނަލްއަގުވާމީ ދުނިޔެއާ ގުޅިލާމެހިފައިވާ ގައުމެއް ކަމަށް އެމަނިކުފާނު ފާހަގަކުރެއްވިއެވެ. އަދި ރާއްޖެ މިއޮތީ އަނެއްކާ ވެސް ހަތަރު އަގޮޅިއެއްގެ ކަންމަތީގައި ކަމަށާއި، އެމިސްރާބު ގެންދާނީ ޚަރާބުގެ މިސްރާބަށްތޯ ނުވަތަ ސަަލާމަތުގެ އައްސޭރިއަށްތޯ ނިންމާނީ ކޮމަންޑޫ ދާއިރާގެ ރައްޔިތުންނަށް ކަމަށެވެ.
މީގެ އިތުރުން ރައީސް ނަޝީދު ވިދާޅުވީ, ކުރީގެ ރައީސް ޔާމީންގެ ވެރިކަމުގައި މަސައްކަތްކޮށްފައިވަނީ ކޮމަންޑޫ އުވާލުމަށް ކަމަށާއި، އެމަނިކުފާނުގެ ދައުރުގައި ކޮމަންޑޫއަށް ވަޑައިގަންނަވާ ރައްޔިތުންނާ ބައްދަލުކޮށްފައިނުވާކަމަށެވެ.
ރައީސް ނަޝީދު ވިދާޅުވީ ޖަޒީރާ ވެރިކަމާއެކު މިއަދު މަންޒަރު ބަދަލުވަމުންދާ ކަމަށާއި، އަސާސީ ޚިދުމަތްތައް ރާއްޖޭގެ ހުރިހާ ރައްޔިތުންނަށް ކަށަވަރުވަމުންދާ ކަމަށެވެ. އަދި ދައުލަތަށް ލިބޭ އާމްދަނީ ޓެކްސް ވެސް އިތުރުވެ ސަރުކާރަށް އެންމެހައި ކަންކަން ކުރުމަށް ފަސޭހަވެފައިވާ ކަމަށް ރައީސް ނަޝީދު ވިދާޅުވިއެވެ.
ކޮމަންޑޫއަށް އިޝާރަތް ކުރައްވައި ރައީސް ނަޝީދު ވިދާޅުވީ, ދެކޮމަންޑޫ އެއްކޮށްލުމާއެކު 10،000 މީހުންގެ އާބާދީއަކަށް އިތުރުވާނެ ކަމަށާއި، ވަރުގަދަ އިގުތިސާދީ ސެންޓަރަކަށްވާނެ ކަމަށެވެ. ވަރުގަދަ ލާމަރުކަޒީ ނިޒާމެއްގެ ތެރެއިން ތަރައްގީ ވެގެންދާއިރު، ރައީސް ޔާމީންގެ ގަޓުހުރި ޚުދުމުޚުތާރު ވެރިކަމަށް ފުރުސަތު ދެވިގެން ނުވާނެ ކަމަށް ރައީސް ނަޝީދު ވިދާޅުވިއެވެ.
