ދެ ކޮމަންޑޫ ގުޅާލާއިރު އިޤްތިސާދީ މަސައްކަތްތައް ކުރިއަށްދާނެ ގޮތް ޕްލޭންކޮށް ރައްޔިތުންނާއި މަޝްވަރާ ކުރާނެ: ރައީސް

ދެ ކޮމަންޑޫ ގުޅާލާއިރު އިޤްތިސާދީ މަސައްކަތްތައް ކުރިއަށްދާނެ ގޮތް ޕްލޭންކޮށް ރައްޔިތުންނާއި މަޝްވަރާކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.

ށ. ކޮމަންޑޫ ދައިރާގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދުއަށް ތާއިދު ހޯއްދެއްވުމަށް އެރަށުގައި ބޭއްވެވި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ ދެ ކޮމަންޑޫ ގުޅާލުމުގެ މަސައްކަތް ބާރަށް ކުރިއަށްދާއިރު އެތަނުގައި އިޤްތިސާދީ މަސައްކަތްތައް ކުރިއަށް ގެންދިޔުމަށް ޕްލޭން ކުރަމުންދާ ކަމަށެވެ. އަދި ރައްޔިތުންގެ މަޝްވަރާއާއެކު އެކަންތައްތައް ކުރިއަށްގެންދަވާނެ ކަމަށެވެ.

އެޖެންޑާ 19 ގެ ދަށުން ރައްޔިތުންނަށް ވެވަޑައިގެންފައިވާ ވައުދުތައް މިސަރުކާރުން ފުއްދަވަމުން ގެންދަވާކަމަށާއި އަދި ކޮމަންޑޫއަށް ވެވަޑައިގަންނަވާފައިވާ ވައުދުތައް ވެސް އެބަހުރި ކަމަށް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އެގޮތުން ރަށުގެ ބަނދަރު ތަރައްޤީ ކުރުމާއި އައިސް ލިބޭނެ ގޮތާއި ދެ ކޮމަންޑޫ ގުޅާލަން ރައްޔިތުން ބޭނުންވާ ކަމަށް ވިދާޅުވިއެވެ.

ރައީސް ވިދާޅުވީ ކޮމަންޑޫގެ ސިއްހީ މަރުކަޒު އަޕްގްރޭޑްކޮށް ރައްޔިތުން ބޭނުންވާ ކަންތައްތައް ކޮށްދެއްވާނެކަމަށެވެ. އަދި އެމްޑީޕީގެ ކެންޑިޑޭޓް ރާޝިދާއެކު އެދާއިރާގެ ރައްޔިތުންނަށް ވެވަޑައިގަންނަވާފައިވާ ވައުދުތައް ފުއްދެވުމަށް ސަރުކާރުން މަސައްކަތް ކުރައްވާނެ ކަމަށް ރައީސް ވިދާޅުވިއެވެ.

އެދާއިރާގެ ގޮނޑި ކާމިޔާބު ނުކުރެވުނަސް ރައްޔިތުންގެ މަޖިލީހުގެ މެޖޯރިޓީ އޮތުމާއެކު ސަރުކާރުގެ އަމާޒަކީ ދާއިރާގެ ކުރިމަގާއި ތަރައްޤީއަށް މަސައްކަތް ކޮށްދިނުން ކަމުގައިވެސް ރައީސް ވިދާޅުވިއެވެ.