ގެވެށި އަނިޔާ ލިބޭ މީހުންނަށް ޚާއްޞަ ތިން މަރުކަޒެއް ޤާއިމްކުރަނީ
3 ފެބުރުއަރީ 2022 | ބުރާސްފަތި 09:16އެމަރުކަޒުތައް ބިނާކުރާނީ ރ. އުނގޫފާރާ، ހުޅުމާލެ އަދި ސ. ހިތަދޫގައި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިއަހަރަށް ރިޔާސީ ބަޔާން އިއްވަވަނީ
ގެވެށި އަނިޔާގެ ޝިކާރައަށްވާ ފަރާތްތަށް ދުޅަހެޔޮ ދިރިއުޅުމަކަށް އަނބުރާ ގެނައުމަށް ތިން މަރުކަޒެއް ޤާއިމުކުރުމަށް ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މިއަހަރަށް ރިޔާސީ ބަޔާން އިއްވަވަމުން ރައީސް ވިދާޅުވީ އެމަރުކަޒުތައް ބިނާކުރާނީ ރ. އުނގޫފާރާ، ހުޅުމާލެ އަދި ސ. ހިތަދޫގައި ކަމަށެވެ.
މީގެއިތުރުން ރައީސް ވިދާޅުވީ ކޮވިޑުގެ ހާލަތާއި ގުޅިގެން މަސްތުވާތަކެތީގެ މައްސަލަ އިތުރަށް ގޯސްވެފައިވާއިރު، އެ ދޮރުތައް ބަންދުކޮށް، ހުއްޓުވުމަށް ސަރުކާރަށް ގިނަ ގޮންޖެހުންތަކަކާއި ކުރިމަތިލާން ޖެހުނު ކަމަށެވެ. އަދި މަސްތުވާތަކެއްޗަކީ އޭގާ ވަރަށް ބޮޑު ފަހަތެއް އޮންނަ އިންތިޒާމްވެ ގުޅިގެން ހިންގާ ބައިނަލްއަޤްވާމީ ބޮޑު ވިޔަފާރި އެއް ކަމަށާއި އެދޮރުތައް ބަންދުކޮށް އެވިޔަފާރި ހުއްޓުވުމަކީ އިންތިހާ އަށް ގޮންޖެހުން ބޮޑު ކަމެއްކަމަށެވެ.
ރާއްޖޭގައި ގެވެށި އަނިޔާ ހުއްޓުވުމަށް އެކަމާއި ބެހޭ ޤާނޫނެއް ހެދި އަންނަނީ ތަންފީޒުކުރެވެމުންނެވެ. މިދިޔަ އަހަރުގެ ނޮވެމްބަރު މަހުގެ ނިޔަލަށް ފެމެލީ ޕްރޮޓެކްޝަން އޮތޯރިޓީ (އެފްޕީއޭ) އަށް ހުށަހަޅާފައި ވަނީ ގެވެށި އަނިޔާގެ 475 މައްސަލައެއް ކަމަށް އެއިދާރާގެ ތަފާސްހިސާބުތަކުން ދައްކައެވެ. އެގެކުރީ އަހަރު ގެވެށި އަނިޔާގެ ޖުމްލަ 615 މައްސަލައެއް ހުށަހަޅާފައިވެއެވެ.
