ފެށޭ ދައުރާއެކު މަޖިލީހުގެ މަސައްކަތްތައް އިޝާރާތް ބަހުންވެސް ގެނެސްދޭނެ

މިއަހަރަށް ރައްޔިތުންގެ މަޖިލީހުގެ ޖަލްސާތައް ހުޅުވުމަށް ފެބްރުއަރީ މަހުގެ 3 ވަނަ ދުވަހު ބާއްވާ ޖަލްސާ އިޝާރާތް ބަހުން ގެނެސްދޭނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.

ފެބްރުއަރީ 3 ވާ ބުރާސްފަތި ދުވަހު ބޭއްވުމަށް ހަމަޖެހިފައިވާ ޖަލްސާއަކީ ރިޔާސީ ބަޔާން އިއްވާ ޖަލްސާއެވެ. ރައްޔިތުންގެ މަޖިލީހުން ކުރަމުންދާ މަސައްކަތްތައް ހުރިހާ އެންމެންނަށްވެސް އެނގޭނެ ގޮތަކަށް ފޯރުކޮށްދިނުމުގެ މަސައްކަތުގެ ދަށުން މަޖިލީހުން ވަނީ މޯލްޑިވްސް ޑެފް އެސޯސިއޭޝަނާއި ބައްދަލުކޮށް އެކަން ކުރެވޭނެ ގޮތްތަކާއި ގުޅޭގޮތުން މަޝްވަރާކޮށްފައެވެ. އެކަމާއި ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަންގެ ޑިރެކްޓަރު ހަސަން ޒިޔާއު ވިދާޅުވީ ބުރާސްފަތި ދުވަހު ފެށޭ އައު ދައުރާއެކު މަޖިލީހުން ކުރާ ބައެއް މަސައްކަތްތައް އިޝާރާތް ބަހުން ގެނެސްދޭނެކަމަށެވެ.

އެގޮތުން އެންމެ ފުރަތަމަ އިޝާރާތް ބަހުން ގެނެސްދޭނީ ރައްޔިތުންގެ މަޖިލީހުގެ ޚާއްސަ ޖަލްސާތަކާއި މަޖިލީހުގެ ސޯޝަލް މީޑިޔާ އެކައުންޓްތަކަށް ޕޯސްޓްކުރާ ވީޑިއޯތަކެވެ. އެގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ޖަލްސާ އިޝާރާތް ބަހުން ގެނެސްދޭނެކަމަށް ޒިޔާއު ވިދާޅުވިއެވެ.

ރައްޔިތުންގެ މަޖިލީހުން ކުރަމުންދާ މަސައްކަތްތައް އިޝާރާތް ބަހުން ގެނެސްދިނުމަށް ނިންމާފައިމިވަނީ މިދިޔަ އަހަރުގެ ޑިސެމްބަރު މަހު ބޭއްވި ޔޫތް ޕަލަމެންޓްގައި ބައިވެރިވި އަޑުއެހުމުން މަހުރޫމްވެފައިވާ ކުއްޖެއް ކަމުގައިވާ، ނާއިޝް އޭނާ ފަދަ އަޑުއިވުމުން މަހުރޫމްވެފައިވާ ޒުވާނުންނަށް މަޖިލީހުގެ މަސައްކަތްތައް ދެނެގަނެވޭނެ ގޮތެއް ވާނެތޯ ކުރި ސުވާލަކާ ގުޅިގެންނެވެ. އެސުވާލަށް ޖަވާބު ދެއްވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދުވަހު ވިދާޅުވީ އެކަން ހަމަޖެއްސުމަށް މަސައްކަތްކުރައްވާނެ ކަމަށެވެ.

ރައްޔިތުންގެ މަޖިލީހަކީ ރައްޔިތުންނާއި ގުޅުންހުރި ގިނަ މަސައްކަތްތަކެއް ކުރަމުން އަންނަ ތަނެކެވެ. އެގޮތުން ކޮންމެ ހަފްތާއަކުވެސް ތިން ދުވަހު ޖަލްސާތައް ބާއްވާއިރު ކޮމިޓީ ބައްދަލުވުންތައް ހަފްތާގެ ހުރިހާ ދުވަހަކުހެން ކުރިޔަށް ގެންދެއެވެ.

މަޖިލީހުން ކުރާ މަސައްކަތްތައް އިޝާރާތް ބަހުން ގެނައުމަށް ނިންމާފައިވާއިރު އެކި އިދާރާތަކުން ނެރޭ ވީޑިއޯތަކާއި ބައެއް މުހިންމު އެންގުންތަކާއި ނޫސްވެރިންގެ ބައްދަލުވުންތަކާއި ސަރުކާރުން ބާއްވާ މުހިންމު ޖަލްސާތަކާއި އަދި ހުކުރު ޚުތުބާ ފަދަ ގިނަ މީހުން ބަލާ ވީޑިއޯތައް އިޝާރާތް ބަހުންވެސް ގެނެސްދެމުންދެއެވެ.