ސަރުކާރުން ހުރިހާ ޚަރަދެއް ކުރާ ގޮތަށް ޕްރިންސިޕަލުން ތަމްރީނު ކުރުމަށް ހުޅުވާލި ފުރުސަތުގައި 60އަށްވުރެ ގިނަ ފަރާތުން ކުރިމަތިލައިފިއެވެ.
އެޑިއުކޭޝަން މިނިސްޓްރީން ވަނީ މިދިޔަ އަހަރުގެ ނޮވެމްބަރު މަހު މެލޭޝިޔާއިން, މާސްޓަސް އިން ސްކޫލް އެޑްމިނިސްޓްރޭޝަން ފުރިހަމަކުރަން 20 ސްކޮލަޝިޕެއް ހުޅުވާލާފައެވެ.
ސްކޮލަޝިޕަށް ކުރިމަތިލުމުގެ ޝަރުތުތަކުގެ ތެރޭގައި ހިމެނެނީ ކިޔަވައިދިނުމުގެ ރޮނގުން ނުވަތަ ތައުލީމީ ދާއިރާއިން ބެޗެލަރސް ޑިގްރީ ހާސިލް ކޮށްފައި ވުމާއި, ޓީޗަރެއްގެ ގޮތުގައި މަދުވެގެން 5 އަހަރު ދުވަހު މަސައްކަތް ކޮށްފައިވުމެވެ. އަދި މި ސްކޮލަރޝިޕްތައް ލިބޭ ފަރާތްތަކުން ސަރުކާރުގެ ސްކޫލެއްގައި ވަކި މުއްދަތަކަށް މަސައްކަތް ކުރުން, ނުވަތަ ބޮންޑެއް އޮންނާނެއެވެ. ސްކޮލަރޝިޕަށް ހޮވޭ މީހުން ކިޔެވުމަށް ދާ ޚަރަދާއި، މުސާރައާއި އެއްވަރުގެ އެލަވަންސެއްގެ އިތުރުން, ދެކޮޅު ޓިކެޓް ސަރުކާރުން ދިނުމަށް ހަމަޖައްސާފައިވެއެވެ.
ކޮންމެ އަހަރަކުވެސް 20 ޕްރިންސިޕަލުން ތަމްރީން ކުރުމަކީ މިސަރުކާރުގެ އަމާޒެއް ކަމަށް މިނިސްޓަރ އޮފް އެޑިއުކޭޝަން ޑރ. އާއިޝަތު އަލީ ވަނީ ވިދާޅުވެފައެވެ. މީގެ އިތުރަށް މިމަހުގެ ތެރޭގައި ވަނީ އިގިރޭސިވިލާތުގެ ގައިޑް އެޑިއުކޭޝަނާއި އެޑިއުކޭޝަން މިނިސްޓްރީ ގުޅިގެން ޕްރިންސްޕަލުން ތަމްރީން ކުރުމުގެ ޕްރޮގްރާމެއްވެސް ފަށާފައެވެ. ސްކޫލްތައް ހިންގަން ރަނގަޅު ގާބިލް މީހުން މިދުވަސްވަރު ނުލިބޭ ކަމަށާއި، މިގޮތަށް ދިމާވަނީ ޕްރިންސިޕަލުންގެ މުސާރަ ކުޑަވުމުގެ ސަބަބުން ކަމަށް މިނިސްޓަރ ވަނީ ވިދާޅުވެފައެވެ. އަދި މިކަމަށް ހައްލެއް ހޯދައިދިނުމުގެ ގޮތުން, ރަށުން ބޭރަށް ދާނަމަ އިތުރު އެލަވަންސެންދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ނިންމަވާފައިވާ ކަމަށެވެ. އެގޮތުން މިހާރު ހަމަޖައްސަވާފައިވަނީ އެޑިއުކޭޝަން މިނިސްޓްރީގެ އެދިވަޑައިގަތުމަށް އެހެން ރަށަކަށް ދާނަމަ އިތުރަށް 3000 ރުފިޔާގެ އެލަވަންސެން ދިނުމަށް ކަމަށްވެސް އެޑިއުކޭޝަން މިނިސްޓަރ ވިދާޅުވިއެވެ.
