ޚާއްސަ އެހީއަށް ބޭނުންވާ 30 އަށްވުރެ ގިނަ މުވައްޒަފުން އެމްޓީސީސީގެ ވަޒީފާތަކުގައި މިހާރުވެސް އެބަތިބި
1 ފެބުރުއަރީ 2022 | އަންގާރަ 09:00މިއަހަރު މި ޕްރޮގްރާމްގެ ދަށުން 140 މީހުން ތަމްރީނުކުރުމަށް ފުރުސަތު ހުޅުވިގެންދާނެ
ހުނަވަރު އެޕްރެންޓިސްޝިޕް ޕްރޮގްރާމްގެ މައުލޫމާތު ހިއްސާ ކުރުމަށް ބޭއްވި ނޫސްވެރިންގެ ބައްދަލުވުން
ޚާއްސަ އެހީއަށް ބޭނުންވާ 30 އަށްވުުރެ ގިނަ މުވައްޒަފުން މިހާރުވެސް އެމްޓީސީސީގެ ވަޒީފާގައި އެބަތިބި ކަމަށާއި އަދިވެސް ފުރުސަތު އެބައޮތް ކަމަށް އެމްޓީސީސީން ބުނެފިއެވެ.
އެ ކުންފުނިން ކުރިއަށްގެންދާ ‘ހުނަވަރު’ ޕްރޮގްރާމުގެ އިތުރު ބުރެއް ފެށުމާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ އެ ކުންފުނީގެ ހުރިހާ ވަޒީފާތަކަށް ވެސް އެންމެނަށް މަރުޙަބާ ކިޔާ ކަމަށެވެ. އަދި އެއްވެސް ތަފާތު ކުރުމެއް އެކުންފުނިން ނުގެންގުޅޭނެ ކަމަށެވެ.
އާޒިމް އިތުރަށް ވިދާޅުވީ އެމްޓީސީސީގެ ވަޒީފާގައި މިހާރު ތިބި ޚާއްސަ އެހީއަށް ބޭނުންވާ މުވައްޒަފުންނަށް ވެސް އެހެން މުވައްޒަފުންނެކޭ އެއްވަރުގެ މުސާރައާއި އެލަވަންސް ވެސް ލިބޭނޭ ކަމަށެވެ. އަދި އެކުންފުނީގެ ހުރިހާ ވަޒީފާއަށް މުވައްޒަފުން ނެރެނީ ފުރިހަމަ ތަމްރީނު ދިނުމަށްފަހުގައި ކަމަށެވެ.
ހުނަވަރު ޕްރޮގްރާމްގެ މަޤްސަދަކީ ތަމްރީނާއި ތަޖުރިބާ ލިބިފައިވާ މަސައްކަތްތެރި މުވައްޒަފުން އެމްޓީސީސީގެ އެކި ވަޒީފާތަކަށް ހޯދުމެވެ. ހުނަވަރު ޕްރޮގްރާމް ބެހިގެން ވަނީ 2 ބަޔަކަށެވެ. އެއީ ހުނަވަރު ލައިސެންސިންގ ޕްރޮގްރާމާއި ހުނަވަރު ޓެކްނިކަލް ސްކިލްސް ޕްރޮގްރާމެވެ. މިއަހަރު މި ޕްރޮގްރާމްގެ ދަށުން 140 މީހުން ތަމްރީނުކުރުމަށް ފުރުސަތު ހުޅުވިގެންދާނެއެވެ. މި ޕްރޮގްރާމްގެ ދަށުން ވެލްޑިންގ، މެރިން އަދި ޓަގް މެކޭނިކް މަސައްކަތް، ހެވީ ވެހިކަލް އޮޕަރޭޓަރުން، ޓިންކަރުން އަދި ކޮންސްޓްރަކްޝަން ސައިޓް ސުޕަވައިޒް ކުރުން ފަދަ ދާއިރާތަކަށް މީހުން ތަމްރީން ކުރެވިގެންދާނެއެވެ.
މިޕްރޮގްރާމްގެ ދަށުން ކޮންމެ ބައިވެރިޔަކުވެސް 3 މަސް ދުވަހުގެ މުއްދަތަށް ތަމްރީން ކުރެވިގެންދާނެއެވެ. އަދި މި ޕްރޮގްރާމްގެ ބައިވެރިންނަށް 5000 ރުފިޔާގެ އެލަވަންސެއް ކޮންމެ މަހަކު ލިބޭނެއެވެ.
