އިސްރާއީލްގެ ރައީސް ޔޫއޭއީއަށް ވަޑައިގެންނެވުމާ ދިމާކޮށް ހޫތީން މިސައިލެއް ފޮނުވާލައިފި
1 ފެބުރުއަރީ 2022 | އަންގާރަ 03:16ސްޕޯކްސްމަން ވަނީ ޔޫއޭއީގައި ދިރިއުޅޭ ފަރާތްތަކުން އެގައުމުގެ މުހިންމު ހެޑްކުއަރޓަރތަކާއި ފެސިލިޓީތަކަށް ނުދިޔުމަށް ބުނެ އިންޒާރުދީފައި
އިސްރާއީލްގެ ބޮޑުވަޒީރު ޔޫއޭއީއަށް ކުރައްވަމުން ގެންދަވާ ދަތުރުފުޅުގެ ތެރެއިން
އިސްރާއީލްގެ ރައީސް އައިސާކް ހަރޒޮގް ޔުނައިޓެޑް އަރަބް އެމިރޭޓްސް (ޔޫއޭއީ)ށް ކުރައްވާ ދަތުރުފުޅާ ދިމާކޮށް ޔަމަނުގައި ހަރަކާތްތެރިވާ ހޫތީ ހަނގުރާމަވެރިން އެގައުމަށް އަމާޒުކޮށް ފޮނުވާލި ބެލެސްޓިކް މިސައިލެއް ބްލޮކް ކޮށްލާފައިވާކަމަށް ޔޫއޭއީން ބުނެފިއެވެ.
މިއީ ފާއިތުވި ދެ ހަފްތާތެރޭގައި ހޫތީ ހަނގުރާމަވެރިން ޔޫއޭއީއަށް ފޮނުވާލި މިފަދަ ތިން ވަނަ ހަމަލާއެވެ. ހަމަލާ އާ ގުޅޭގޮތުން ވާހަކަދައްކަމުން ހޫތީންގެ ސްޕޯކްސްމަން ވިދާޅުވީ އަބޫދާބީއަށް އަމާޒުކޮށް މިސައިލެއް ފޮނުވާލާފައިވާކަމަށެވެ. ސްޕޯކްސްމަން ވަނީ ޔޫއޭއީގައި ދިރިއުޅޭ ފަރާތްތަކުން އެގައުމުގެ މުހިންމު ހެޑްކުއަރޓަރތަކާއި ފެސިލިޓީތަކަށް ނުދިޔުމަށް ބުނެ އިންޒާރުވެސް ދީފައެވެ.
ހޫތީން ޖެނުއަރީ މަހުގެ 17 ވަނަ ދުވަހު އަބޫދާބީގެ ތެޔޮވަޅުތަކަށް އަމާޒުކޮށް ފޮނުވާލި ޑްރޯން ހަމަލާގައި ތިން މީހަކު ވަނީ މަރުވެފައެވެ. އެހަމަލާ އާ ގުޅިގެން ޔަމަނުގައި ސައުދީ ކޯލިޝަނުން ދެމުންގެންދާ ހަމަލާތައް ވަނީ ވަރުގަދަކޮށްފައެވެ. ޔޫއޭއީއަކީ ސައުދީ ކޯލިޝަންގައި ހިމެނޭ ގައުމެކެވެ.
މިހަމަލާތައް އެމެރިކާއިން ކުށްވެރިކޮށްފައިވާއިރު އެމެރިކާއިން އަންނަނީ ކޮންމެ ދުވަހަކުހެން ޔޫއޭއީއަށް އޮތް ނުރައްކަލުގެ މިންވަރާއި ގުޅޭގޮތުން އެގައުމާ މަޝްވަރާކުރަމުންނެވެ.
ޔޫއޭއީގެ ސީނިއަރ އޮފިޝަލަކު މިހަމަލާތައް ސިފަކުރެއްވީ ބޭނުމެއްނެތް ރުޅިއެރުވުމެއްގެ ގޮތުގައެވެ. މިފަދަ ހަމަލާތައް ދީގެން ޔޫއޭއީ ޓެސްޓްކުރުމަށް ކުރަމުންދާ ކަންކަމަކީ ހެދޭ ގޯހެއްކަމަށް އޮފިޝަލް ވިދާޅުވިއެވެ.
ޔޫއޭއީން ބުނެފައިވަނީ މިސައިލްގެ ބައިތައް ވެއްޓިފައިވަނީ މީހުން ދިރިނޫޅޭ ހިސާބަކަށް ކަމަށެވެ.
އިސްރާއީލްގެ ރައީސް ޔޫއޭއީއަށް ކުރައްވާ ފުރަތަމަ ދަތުރުފުޅުގައި ސަލާމަތީ ކަންކަމާއި ދެގައުމުގެ ގުޅުމާއި ގުޅޭގޮތުން ޔޫއޭއީގެ ޕްރިންސް ޝެއިޚް މުހައްމަދު ބިން ޒަޔެދް އަލް ނަހްޔާން އާ މަޝްވަރާ ކުރައްވާފައިވެއެވެ.
