އެފްރިކާ ކަޕް އޮފް ނޭޝަންސްގެ ކުއާޓާ ފައިނަލުގައި ހޮނިހިރު ދުވަހުގެރޭ ކުޅުނު މެޗުތަކުން މޮޅުވެ މުބާރާތް ބާއްވާ ގައުމު ކަމަށްވާ ކެމަރޫނާއި ބުރްކީނާ ފާސޯ ސެމީ ފައިނަލަށް ދަތުރުކޮށްފިއެވެ.

ސެމީގެ ޖާގައެއް ކެމަރޫން ހޯދީ ގެމްބިއާ އަތުން 2-0 ގެ ނަތީޖާއަކުން މޮޅުވެގެންނެވެ.

މި މެޗުގައި ކެމަރޫނުން މޮޅު ކުޅުމެއް ދެއްކައި ގިނަ ހަމަލާތަކެއް އުފެއްދި ނަމަވެސް، މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. އެކަމަކު ދެވަނަ ހާފުގެ ފަށައިގެން 12 މިނެޓުގެ ތެރޭގައި ކެމަރޫނުން ވަނީ މެޗުގައި ފެނިގެންދިޔަ ދެ ލަނޑުވެސް ކާމިޔާބުކޮށްފައެވެ. އެގޮތުން ދެވަނަ ހާފު ފަށައިގެން ފަސްވަނަ މިނެޓުގައި ކެމަރޫނުން ލީޑު ނެގިއިރު، ކޮލިންސް ފައި ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ކާލް ޓޯކޯ އެކަމްބީއެވެ.

އަދި އޭގެ ހަތް މިނެޓު ފަހުން ކެމަރޫނުން ލީޑު ފުޅާކުރިއިރު، މާޓިން ހޯންގުލާ ދިން ބޯޅައަކުން މި ލަނޑުވެސް އެ ޓީމަށް ކާމިޔާބުކޮށްދިނީ ޓޯކޯ އެކަމްބީއެވެ. އޭގެ ފަހުންވެސް މި މެޗުގައި ކެމަރޫނުން ގިނަ ހަމަލާތަކެއް އުފެއްދި ނަމަވެސް، ގެމްބިއާއަށް މުޅި މެޗުގައިވެސް ކެމަރޫނުގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ.

މި މެޗުން މޮޅުވެ މުބާރާތުގެ ސެމީއަށް ކެމަރޫން ދަތުރުކުރިއިރު، ސެމީގެ ފުރަތަމަ މެޗުގައި ކެމަރޫން ކުޅެން ޖެހޭނީ ކުއާޓާގައި މިސްރާއި މޮރޮކޯ ކުޅޭ ކުއާޓާ ފައިނަލް މެޗުން މޮޅުވާ ޓީމަކާއެވެ.

މީގެ އިތުރުން މި މުބާރާތުގެ ސެމީގެ ޖާގައެއް ބުރްކީނާ ފާސޯއިން ހޯދީ ހޮނިހިރު ދުވަހުގެރޭ ކުޅުނު މެޗުން ޓިއުނީޝިއާ އަތުން 1-0 ގެ ނަތީޖާއަކުން މޮޅުވެގެންނެވެ.

މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ ފުރަތަމަ ހާފު ނިމުމުގެ ކުރިން ބުރްކީނާ ފާސޯއިން ވަނީ ލީޑު ނަގާފައެވެ. ފުރަތަމަ ހާފުގެ އިތުރު ވަގުތުގައި އުފެއްދި ކައުންޓަ އެޓޭކެއްގައި އޭރިއާ ތެރެއަށް ވަދެ މި ލަނޑު އެ ޓީމަށް ކާމިޔާބުކޮށްދިނީ ޑަންގޯ އުއްޓާރާއެވެ.

އޭގެ ފަހުން މެޗުގެ ދެވަނަ ހާފުގައި އުއްޓާރާއަށް ރެފުރީ ވަނީ ސީދާ ރަތް ކާޑެއް ދައްކާފައެވެ. މެޗު ނިމެން އަށް މިނެޓަށް ވެފައި ވަނިކޮށް އުއްޓާރާ ކުރި ފައުލަކާ ގުޅިގެން ރެފުރީ އޭނާއަށް އެންމެ ފުރަތަމަ ރީނދޫ ކާޑެއް ދެއްކި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ވަނީ އެ ނިންމުން ބަދަލުކޮށް، ރަތް ކާޑެއް ދައްކާފައެވެ.

މި މެޗުން މޮޅުވެ މުބާރާތުގެ ސެމީއަށް ބުރްކީނާ ފާސޯ ދަތުރުކުރިއިރު، ސެމީގައި އެ ޓީމު ކުޅޭނީ އެކުއަޓޯރިއަލް ގިނީ އާއި ސެނެގާލް ކުޅޭ ކުއާޓާ ފައިނަލް މެޗުން މޮޅުވާ ޓީމަކާއެވެ.