އިންޑިއާ އައުޓް ކެމްޕޭނަކީ ވަކި އިމެއް ނެތި ކުރުމަށް ދޫކޮށްލެވެން އޮތް ކަމެއް ނޫން، މަޖިލީހުން ބަލާނެ
29 ޖެނުއަރީ 2022 | ހޮނިހިރު 07:00އެމައްސަލަ ހުށައަޅައިފިނަމަ ބަލާނެކަމަށް އިލެކްޝަންސް ކޮމިޝަނުން ވަނީ ބުނެފައި
އިދިކޮޅުން ހިންގާ އިންޑިއާ އައުޓް ކެމްޕެއިންގެ ތެރެއިން
އިންޑިއާ އައުޓް ކެމްޕޭނަކީ ވަކި އިމެއް ނެތި ކުރުމަށް ދޫކޮށްލެވެން އޮތް ކަމެއް ނޫން ކަމަށާއި، އެކަން މަޖިލީހުން ބަލާނެކަމަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ރާއްޖެއާ ދޭދޭ ގައުމުތަކުގެ ގުޅުމަށް ބުރޫއަރާ ގޮތަށް އިންޑިއާ އައުޓް ކެމްޕޭން ހިންގުމަށް ފުރުސަތު ނުދޭނެކަމަށް ސަރުކާރުން ބުނި ނަމަވެސް، މިހާތަނަށް އެކަމަށް މާބޮޑު ފިޔަވަޅެއް އަޅާފައެއް ނުވެއެވެ. އަދި ދުވަހެއް ދުވަހަކަށް އިންޑިއާ އައުޓް ކެމްޕޭން ފުޅާ ކުރަމުންދާއިރު، އެކަމާ ގުޅޭގޮތުން ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ބިގޭ ވިދާޅުވީ، އެއީ އާންމުންގެ ތެރޭގައިވެސް އަދި ރައްޔިތުންގެ މަޖިލީހުގައިވެސް މަޝްވަރާ ކުރެވޭ މައުޟޫއެއް ކަމަށެވެ. އެގޮތުން ގައުމީ ސަލާމަތަށް ނުރައްކާވެދާނެ ކަންކަމާއި، ދިވެހި ރައްޔިތުންނަށް ނިކަމެތިކަން ލިބިދާނެ ކަންކަން މިއީ ބަލައިގަނެވޭ ކަމެއް ނޫންކަމަށް ބިގޭ ވިދާޅުވިއެވެ.
ވަކިން ޚާއްސަކޮށް ގައުމެއްގެ ވެރިކަން ކުރައްވާފައި ދައުލަތުން އިނާޔަތްތައް ނަންގަވަމުން ގެންދަވާ ބޭފުޅަކު އެގޮތަށް އުޅުއްވުމަކީ ރައްޔިތުން ބަލައިގަންނަ ކަމެއް ނޫންކަމަށްވެސް ބިގޭ ވިދާޅުވިއެވެ.
ބިގޭ ވިދާޅުވީ، ގައުމާއި ދޭތެރޭގައި ވިސްނާ ފިކުރުކުރާ އަދި ގައުމުދެކެ ލޯބިވާ ރައްޔިތުން މި ކަންކަން ބަލައިނުގަންނާނެ ކަމަށެވެ. އަދި އިންޑިއާ އައުޓް ހަރަކާތަކީ ވަކި ސިޔާސީ ވިސްނުމެއްގައި ކުރަމުންގެންދާ ކަމެއްގެ ގޮތުގައި ރައްޔިތުންވެސް ދެކޭކަމަށް ބިގޭ ވިދާޅުވިއެވެ.
އޭގެ އިތުރުން، ގައުމީ ސަލާމަތަށް ބަލާއިރު، އިދިކޮޅުގެ ހަރަކާތަކީ ވަކި އިމެއް ނެތި ކުރުމަށް ދޫކޮށްލެވޭން އޮތް ކަމެއް ނޫންކަމަށްވެސް ބިގޭ ވިދާޅުވިއެވެ. އަދި އެ މަޝްވަރާ ރައްޔިތުންގެ މަޖިލީހުގެ މެމްބަރުންގެ ތެރޭގައި މިހާރު ކުރެވެމުންދާކަންވެސް ބިގޭ ފާހަގަ ކުރެއްވިއެވެ. މިވަގުތު އެވާހަކަތައް ކުރިއަށްދަނީ ނުރަސްމީ މަޝްވަރާތަކެއްގެ ގޮތުގައިކަމަށާއި, މަޖިލިސް ޗުއްޓީ ނިމުމުން އެކަމުގެ ރަސްމީ މަސައްކަތް ފެށިގެންދާނެކަމަށް ދޭހަވާ މޭރުމުން ބިގޭ ވަނީ ވާހަކަ ދައްކަވާފައެވެ.
ބިގޭ ވިދާޅުވީ، 3 ފެބްރުއަރީގައި މަޖިލިސް ޖަލްސާތައް އަލުން ފެށުމުން މެމްބަރުންގެ މެދުގައި މަޝްވަރާކޮށް މިކަންކަމާގުޅިގެން ފިޔަވަޅުތަކެއް އަޅުއްވާނެކަމަށް ގަބޫލުކުރެެއްވޭކަމަށެވެ.
ބިގޭ އެހެން ވިދާޅުވެފައިވާއިރު، "އިންޑިއާ އައުޓް" ކެމްޕެއިންގެ ސަބަބުން ދިމާވާ ގެއްލުންތަކުގެ މައްސަލަ އެއްވެސް ފަރާތަކުން ޖައްސައިފިނަމަ އެމައްސަލަ ބަލާނެކަމަށް އިލެކްޝަންސް ކޮމިޝަނުން ވަނީ ބުނެފައެވެ. އެގޮތުން އެއީ ގައުމީ ސަލާމަތަށް ހުރި ނުރައްކަލެއްކަމަށް އެމްއެންޑީއެފުން ނުވަތަ ކަމާގުޅުންހުރި އިދާރާއަކުން އަންގައިފިނަމަ، އެކަން ބަލައި އަޅަންޖެހޭ ފިޔަވަޅުތައް އީސީން އަޅާނެކަމަށްވެސް ވަނީ ބުނެފައެވެ.
