އިންޑިއާ އައުޓް ކެމްޕޭންގައި ރައްޔިތުން ބައިވެރިވަނީ ހިތާ ދެކޮޅަށް: ބިގޭ
އިންޑިއާ އައުޓް ކެމްޕޭނުގައި ރައްޔިތުން ބައިވެރިވަނީ ހިތުގެ އަޑިން އެކަން ގަބޫލުކޮށްގެނެއް ނޫން
އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ)- ބިގޭ ވިދާޅުވީ، ކޮމަންޑޫ ދާއިރާގެ ރައްޔިތުންވެސް އިންޑިއާ އައުޓް ކެމްޕޭންގައި ބައިވެރިވަނީ ހިތާ ދެކޮޅަށް ކަމަށް
އިދިކޮޅު ކޯލިޝަނުން ކުރިއަށް ގެންދާ އިންޑިއާ އައުޓް ކެމްޕޭންގައި ރައްޔިތުން ބައިވެރިވަނީ ހިތާ ދެކޮޅަށްކަމަށް އަލިފުށީ ދާއިރާގެ މެމްބަރުމުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ބިގޭ ވިދާޅުވީ، ރައީސް ޔާމީނު އިސްވެ ހުންނަވައި ކުރިއަށް ގެންދަވާ އިންޑިއާ އައުޓް ކެމްޕޭނުގައި ރައްޔިތުން ބައިވެރިވަނީ ހިތުގެ އަޑިން އެކަން ގަބޫލުކޮށްގެނެއް ނޫން ކަމަށެވެ. އެގޮތުން ކޮމަންޑޫ ދާއިރާގެ ރައްޔިތުންވެސް އެ ކެމްޕޭންގައި ބައިވެރިވަނީ ހިތާ ދެކޮޅަށްކަމަށް ބިގޭ ވިދާޅުވިއެވެ. އެކަން އެ ދާއިރާގެ ރައްޔިތުންގެ ވާހަކައިންވެސް އެނގިގެންދާކަން ބިގޭ ފާހަގަ ކުރެއްވިއެވެ.
ބިގޭ ވިދާޅުވީ، ބޭސްފަރުވާ ކުރުމާއި ޒަރޫރީ އެކި ކަންކަމަށް އަބަދުވެސް ދިވެހިން އިންޑިއާއަށް ދާން ޖެހޭ ކަމަށެވެ. ވީއިރު މި ހަރަކާތުގެ ސަބަބުން އިންޑިއާއަށް ދާން ފަސްޖެހޭ މިންވަރަށް އާންމު ރައްޔިތުން ކަންބޮޑުވާކަމަށް ބިގޭ ވިދާޅުވިއެވެ. ޚުދު އެ ހަރަކާތްތަކުގައި ބައިވެރިވާ ރައްޔިތުންގެވެސް އެ ކަންބޮޑުވުން އޮންނަކަމަށް ބިގޭ ވިދާޅުވިއެވެ. ކަން އެހެން އޮތް އިރުވެސް، ބައެއް ފަރާތްތަކުން މި ހަރަކާތުގައި ހިތާ ދެކޮޅަށްވެސް ބައިވެރިވަމުންދަނީ ހަމައެކަނި އިދިކޮޅުގެ ލީޑަރޝިޕްގެ އެދުމުގެ މަތިންކަންވެސް ބިގޭ ފާހަގަ ކުރެއްވިއެވެ.
ބިގޭ އެހެން ވިދާޅުވެފައިވާއިރު، އިންޑިއާ އައުޓް ކެމްޕެއިނަކީ ކުރީގެ ރައީސް ޔާމީނަށް ތާއީދު ހޯދުމަށް ހިންގާ ކެމްޕެއިނެއް ކަމަށް ގިނަ ފަރާތްތަކުން ދަނީ ބުނަމުންނެވެ. މިއީ 2018ގެ އިންތިޚާބުން ރައީސް ޔާމީން ބަލިވުމުން، ތާއީދު ހޯދުމުގެ ބޭނުމުގައި ކުރަމުން އަންނަ ކަމެއް ކަމަށް ޕޮލިސީ ރިސާރޗް ގްރޫޕުން ދާދިފަހުން ބުނެފައިވެއެވެ.
އިދިކޮޅު ލީޑަރު ކުރީގެ ރައީސް އަބްދުﷲ ޔާމީން ޖަލު ހުކުމުން މިނިވަންވެވަޑައިގަތުމާއެކު "އިންޑިއާ އައުޓް" ހަރަކާތް ގެންދަނީ ދުވަހެއް ދުވަހަކަށް ފުޅާ ކުރައްވަމުންނެވެ. އެގޮތުން އެކި ރަށްރަށަށް ވަޑައިގެން އެ ކެމްޕޭން ހިންގަމުން ގެންދާއިރު، އިންޑިއާ އަސްކަރިއްޔާ މި ގައުމުން ބޭރު ކުރުމުގެ ނަމުގައި ފެށި ހަރަކާތް މިހާރު ވަނީ ބަދަލުވާން ފަށާފައެވެ. އެގޮތުން އަމިއްލަ ގޭގޭގައިވެސް އިންޑިއާ އައުޓް ޖެހުމަށް ރައީސް ޔާމީން ގޮވާލައްވާފައިވާއިރު، މިއީ ސިޔާސީ ގޮތުން ވަކި މަގުސަދެއް ހާސިލު ކުރުމަށް ހިންގަމުން ގެންދާ ހަރަކާތެއްގެ ގޮތުގައި ގިނަ ބަޔަކު ދަނީ ސިފަ ކުރަމުންނެވެ.
"އިންޑިއާ އައުޓް" ކެމްޕެއިންގެ ސަބަބުން ދިމާވާ ގެއްލުންތަކުގެ މައްސަލަ އެއްވެސް ފަރާތަކުން ޖައްސައިފިނަމަ އެމައްސަލަ ބަލާނެކަމަށް އިލެކްޝަންސް ކޮމިޝަނުންވެސް ވަނީ ބުނެފައެވެ. އިލެކްޝަންސް ކޮމިޝަންގެ ރައީސް ފުއާދު ތައުފީގު ރާއްޖެޓީވީއަށް މައުލޫމާތު ދެއްވަމުން ވިދާޅުވީ, އިދިކޮޅު ޕީޕީއެމް/ޕީއެންސީން ކުރިއަށްގެންދާ އިންޑިއާ އައުޓް ކެމްޕެއިނުގެ ސަބަބުން ގައުމުގެ އާންމު މަސްލަހަތަށް ބުރޫއަރާފާނެކަމަށް ހޯމް މިނިސްޓްރީން އަންގައިފިނަމަ، އެމައްސަލަ އެކޮމިޝަނުން ބަލާނެކަމަށެވެ.
އަދި ސިޔާސީ ޕާޓީތަކުގެ ބެލެނިވެރި ފަރާތަކީ އިލެކްޝަންސް ކޮމިޝަނަށް ވާއިރު، އެފަދަ މައްސަލައެއް ހުށަހަޅައިފިނަމަ އެމައްސަލަ ބެލުމަށްފަހު އަޅަންޖެހޭ ފިޔަވަޅުތައް އަޅާނެކަމަށްވެސް ފުއާދު ވަނީ ވިދާޅުވެފައެވެ.
