ކެނެޑާ އާއި އެމެރިކާ ގުޅޭ ބޯޑަރު ސަރަހައްދުގައި ގަދަ ފިނީގެ ސަބަބުން މަރުވި އިންޑިޔާ އާއިލާ ދެނެގަނެވިއްޖެ

އެމެރިކާ އާއި ކެނެޑާ ބޯޑަރު ގުޅޭ ސަރަހައްދާއި ކައިރިން މިދިޔަ ހަފްތާގައި ގަދަ ފިނީގެ ސަބަބުން މަރުވެފައިވާ އިންޑިޔާގެ އާއިލާ ދެނެގަނެވިފައިވާކަމަށް ކެނެޑާގެ އޮފިޝަލުން ބުނެފިއެވެ.

ގަދަ ފިނީގެ ސަބަބުން މިމީހުން މަރުވެފައި ތިއްބާ ފެނިފައިވަނީ މެނަޓޯބާ ސަރަހައްދުންނެވެ. އޮޓާވާގައި ހުންނަ އިންޑިޔާގެ ހައިކޮމިޝަނުން ނެރެފައިވާ ބަޔާނެއްގައި ބުނެފައިވަނީ މަރުވެފައިވަނީ އުމުރުން 39 އަހަރުގެ ޖަގްދިޝް ބަލްދޭވްބައި ޕަޓޭލް އާއި އުމުރުން 37 އަހަރުގެ ވައިޝާލިބެން ޖަގްދިޝްކުމާރު ޕަޓޭލް އާއި އުމުރުން 11 އަހަރުގެ ވިހާންގީ ޖަގްދޭޝްކުމާރު ޕަޓޭލް އާއި އުމުރުން އެންމެ ތިން އަހަރުގެ ދަރްމިކް ޖަގްދޭޝްކުމާރު ޕަޓޭލްއެވެ.

ހައި ކޮމިޝަންގެ ބަޔާނުގައި ބުނެފައިވަނީ މިމީހުންގެ ތިމާގެ މީހުންނަށް މިހާރު މިކަން އަންގާފައިވާކަމަށެވެ. ބަޔާނުގައި އިތުރަށް ބުނެފައިވަނީ އެއްތަނުން އަނެއްތަަނަށް ދަތުރުކުރާއިރު އަދި އެހެން ގައުމަކަށް ހިޖުރަކުރާނަމަ އެގައުމަކަށް ދެވެނީ ރައްކާތެރި ، ގާނޫނާ އެއްގޮތަށް އޮތް މަގަކުންތޯ ޔަގީންކުރާނަމަ މިފަދަ ހިތާމަވެރި ހާދިސާތައް ނުހިނގާނެކަމަށެވެ.

މިކަން ތަހުގީގުކުރާ ފަރާތްތަކުން ބުނެފައިވަނީ މިއާއިލާ ބޯޑަރު ހުރަސްކުރުމަށް މަސައްކަތްކޮށްފައިވަނީ ފައިމަގުގައި ޖެނުއަރީ މަހުގެ 19 ވަނަ ދުވަހު އެންމެ ބޮޑަށް ފިނި މޫސުމުގެ އަސަރު ކުރި ދުވަހު ކަމަށެވެ.

އޮފިޝަލުން ބުނެފައިވަނީ އެމީހުން ދަތުރުކުރަމުންދިޔައީ 18 މީހުން ހިމެނޭ ގްރޫޕަކާއެކު ކަމަށެވެ. ނަމަވެސް ފަހުން އެމީހުން ގްރޫޕުން ވަކިވި ފަހުން ފިނީގެ ތޫފާނަކާ ކުރިމަތިވީކަމަށް އޮފިޝަލުން ބުނެއެވެ.

ރޯޔަލް ކެނޭޑިއަން މައުންޓެޑް ޕޮލިސް (އާރުސީއެމްޕީ)ން ބުނެފައިވާ ގޮތުގައި އެމީހުންނަށް ބެލެވޭ ގޮތުގައި މިއާއިލާ ކެނެޑާއަށް އައިސްފައިވަނީ ޖެނުއަރީ މަހުގެ 12 ވަނަ ދުވަހުއެވެ. ފުރަތަމަ އެމީހުން އައީ ޓޮރަންޓޯ އަށެވެ. އެއަށްފަހު އެމަރސަން އަށް ދެން މެނަޓޯބާ އަށެވެ. މެނަޓޯބާއަށް މިއާއިލާ އައިސްފައިވަނީ ޖެނުއަރީ 18 ހިސާބުގައި ކަމަށް ބެލެވޭކަމަށްވެސް ކެނެޑާ ފުލުހުން ބުނެއެވެ.

ކްރިމިނަލް އޮޕަރޭޝަން އޮފިސަރ ރޮބް ހިލް ވިދާޅުވީ ބެލެވޭ ގޮތުގައި މިމީހުން އެސަރަހައްދަށް ގެނައުމަށްފަހު އެތާނގައި ބައިތިއްބާފައި މިމީހުން ގެނައި މީހުން ދިޔައީއެވެ. އެއީ އެސަރަހައްދުން އެއްވެސް ދުއްވާ އެއްޗެއް ފެނިފައިނުވާތީ ކަމަށް ރޮބް ވިދާޅުވިއެވެ.

އިންޑިޔާގެ ކޮންސިޔުލޭޓުގެ ޚާއްސަ ޓީމެއް ކެނެޑާގެ މިމައްސަލަ ތަހުގީގުކުރަމުން އަންނަ ޓީމާއެކު އަންނަނީ މަސައްކަތްކުރަމުންނެވެ. މެނަޓޯބާގެ ފުލުހުން ބުނާގޮތުގައި މިމީހުންގެ ހަށިގަނޑު ފެނުނީ އެމެރިކާގެ ބޯޑަރު ސަރަހައްދު ޕެޓްރޯލްކުރި އެޖެންޓުންތަކެއް އިންޑިޔާ ބައެއް އެސަރަހައްދުން އެމީހުންގެ ބެލުމުގެ ދަށަށް ގެނައިކަމަށް ބުނިފަހުންނެވެ.

ކުޑަކުދިންނާއި ގުޅުންހުރި އެއްޗެހިތަކެއް އަޅާފައިވާ ބެކްޕެކެއް އަޅުވައިގެން ހުރި މީހަކު ތަހުގީގު ޓީމުން ހޯދާފައިވާއިރު އެމީހާ ތަހުގީގުގައި ބުނެފައިވަނީ އެބެކްޕެކަކީ 18 މީހުންގެ ގްރޫޕުން ވަކިވި މީހުންގެ ބެކްޕެކެއްކަމަށެވެ.

މިމައްސަލަ ތަހުގީގުކުރާ ފަރާތްތަކުން ބުނާ ގޮތުގައި ބެލެވެނީ މިއީ އިންސާނީ ވަގުފާރީގެ ސްކީމެއްގެ ތެރެއިން ހިނގާފައިވާ ކަމެއްކަމަށެވެ.

އަނެއްކޮޅުން އިންޑިޔާގެ ގުޖުރާތުގައި ޓްރެވަލް އެންޑް ޓޫރިޒަމް ކުންފުންޏެއް ހިންގަމުންދިޔަ ހަ މީހަކު މިހާދިސާ އާ ގުޅިގެން ފުލުހުން ވަނީ ހައްޔަރުކޮށްފައެވެ. ގާނދީނަގަރްގެ ފުލުހުންގެ އޮފިޝަލެއް ކަމުގައިވާ އޭކޭ ޖަލާލު ވިދާޅުވީ ގާނޫނާއި ގަވާއިދާ ޚިލާފަށް މިއާއިލާ އެސަރަހައްދަށް ފޮނުވާލި މީހުން ހޯދުމަށް މަސައްކަތްކުރަމުންދާ ކަމަށެވެ. ގުޖުރާތު ޕޮލިސްގެ ޑިރެކްޓަރ ޖެނެރަލް އަޝިޝް ބާޓިއާ ވިދާޅުވީ ތަހުގީގުގައި މިހާރު މަސައްކަތްކުރަނީ މިގްރޫޕް އެސަރަހައްދަށް ފޮނުވާލުމަށް ޓްރެވެލް އެޖެންޓެއްގެ އެހީތެރިކަން ހޯދާފައިވޭތޯއެވެ.

ފުލުސް އޮފިސަރ އޭކޭ ޖަލާލު ވިދާޅުވީ އިންސާނީ ވަގުފާރީގެ މައްސަލަ ވަނީ ވަރަށް ބޮޑުވެފައި ކަމަށާއި މިކަމުގައި ސިޔާސީ މީހުންވެސް ބައިވެރިވާކަމަށެވެ. އަދި ބައެއް މީހުން އެމެރިކާ އަށާއި ކެނެޑާއަށް ދިޔުމަށް އެމީހުންގެ އަތުގައި ހުންނަ ބިމާއި ގެވެސް ވިއްކާކަމަށް ޖަލާލު ވިދާޅުވިއެވެ.

އިންޑިޔާގައި ވަޒީފާގެ ފުރުސަތުތައް ހަނިވުމާއެކު އެތައް ބަޔަކު ދަނީ ކެނެޑާއަށް ހިޖުރަކުރަމުންނެވެ. އެމެރިކާގެ ކަސްޓަމްސް އެންޑް ބޯޑަރ ޕެޓްރޯލުން ބުނާގޮތުގައި ކެނެޑާ މަގުން އެމެރިކާއަށް އެތެރެވަނީ މަދުބައެކެވެ. އެގޮތުން 2009 ވަނަ އަހަރު 6806 މީހުން ބޯޑަރ ހުރަސްކޮށް އެމެރިކާއަށް ވަނުމަށް މަސައްކަތްކޮށްފައިވާއިރު އެ އަދަދު 2021 ގައި ހުރީ 916ގައެވެ.

އެމެރިކާގެ ކަސްޓަމްސް އެންޑް ބޯޑަރ ޕެޓްރޯލުން ވަނީ 2019 ވަނަ އަހަރު ބޯޑަރު ހުރަސްކޮށް އެމެރިކާއަށް އެތެރެވާން މަސައްކަތްކުރި 339 އިންޑިޔާ މީހުން ހައްޔަރުކޮށްފައެވެ. 2020 ވަނަ އަހަރު އެއަދަދު ވަނީ 41ށް ތިރިވެފައެވެ.