އުސޫލުތަކާއި ހަމަތަކާއި ރައްޔިތުންގެ އުންމީދާ ދިމާލަށް ދިއުމަށް ކުރެވޭ ދަތުރަށް މެދުކެނޑުމެއް، ހުއްޓުމެއްނައިސް އެކަންކަން ފުރިހަމަވާންޖެހޭ
ކޮމަންޑޫ ދާއިރާގެ ކެމްޕެއިންގައި އައްޑޫ ސިޓީ މޭޔަރ އަލީ ނިޒާރު ވާހަކަދައްކަވަނީ
ރާއްޖޭގެ ތަރައްގީއަށް އޮތް ހަމައެކަނި ހައްލަކީ އެމްޑީޕީގެ ފިކުރާއި ފަލްސަފާކަމަށް އައްޑޫ ސިޓީގެ މޭޔަރ އަލީ ނިޒާރު ވިދާޅުވެއްޖެއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ އިންތިޚާބުގައި އެމްޑީޕީން ވާދަކުރާ ކެންޑިޑޭޓް މުހައްމަދު ރާޝިދަށް ކެމްޕެއިން ކުރުމަށް ކޮމަންޑޫގައި ބޭއްވި ހަރަކާތެއްގައި ވާހަކަދައްކަވަމުން ނިޒާރު ވިދާޅުވީ ރާއްޖޭގެ އެންމެ ދެކުނުން މިކެމްޕެއިންގައި ބައިވެރިވުން މުހިންމުވީ އުސޫލުތަކާއި ހަމަތަކެއްގެ މަތިން ކުރަމުންދާ މަސައްކަތުގައި ބޭނުންވާ ނަތީޖާއާއި ހަމައަށް ވާސިލުވުމަށް ކުރެވޭ މަސައްކަތުގައި ބައިވެރިވުމަކީ މުހިންމު ކަމަކަށްވާތީ ކަމަށެވެ. ވަކިން ޚާއްސަކޮށް ތިލަފަތަށް ވޯޓުދިނުމަށް ރާއްޖޭގެ ދެކުނުން އެހާ ދުރުން އައިސް ކޮމަންޑޫ ދާއިރާގެ ރައްޔިތުން އަރިހުން އެދެން ބޭނުންވަނީ އުސޫލުތަކާއި ހަމަތަކާއި ރައްޔިތުންގެ އުންމީދާ ދިމާލަށް ދިޔުމަށް ކުރެވޭ ދަތުރަށް މެދުކެނޑުމެއް، ހުއްޓުމެއްނައިސް އެކަންކަން ފުރިހަމަކުރުމަށްކަމަށެވެ.
ކޮމަންޑޫ ދާއިރާގެ ކުރީގެ މެމްބަރ މަރުހޫމް ހުސައިން ވަހީދު ދާއިރާގެ ރައްޔިތުންނަށްޓަކައި ކުރެއްވި އުންމީދާއި ދާއިރާއަށް ކުރައްވާފައިވާ ތަސައްވަރު ފުރިހަމަކުރުމަށްޓަކައި ރައްޔިތުންގެ ފަރާތުން ބޭނުންވާ އެއްބާރުލުން ހޯދުމަށް އަދި އެކަމަށް ހިތްވަރު ދިނުމުގެ ގޮތުންކަމަށެވެ.
ނިޒާރު ވިދާޅުވީ އަތޮޅުތަކުގެ ތަރައްގީއަށް ސަރުކާރުތަކުން ގެންގުޅޭ އުސޫލުތަކާއި ހަމަތައް އެއީ ކޮން އުސޫލަކުން ހުރި ކަންތައްތަކެއްކަން ވިސްނަންޖެހޭކަމަށެވެ. ގާނޫނުއަސާސީ އައިފަހުން ތަފާތު އެކި ވެރިން ވެރިކަންކޮށްފިކަމަށް ނިޒާރު ވިދާޅުވިއެވެ.
ނިޒާރު ވިދާޅުވީ ރާޝިދަށް ވޯޓުދިނުމަކީ އެއުސޫލާ ހަމަތަކާއި ފަލްސަފާ ދެމެހެއްޓުމަށް ކޮންމެހެން ބޭނުން ކަމެއްކަމަށެވެ. އަތޮޅުތަކުގެ ތަރައްގީއަށް ވާހަކަދައްކާނެ އެފިކުރުގެ މީހަކު ރައްޔިތުންގެ މަޖިލީހުގައި ހުންނަންޖެހޭ ކަމަށް ނިޒާރު ވިދާޅުވިއެވެ. އެހެންނޫން ކަމަށްވާނަމަ ގަބޫލުކުރާ އުންމީދުތަކަށް ބޮޑެތި ހުރަސްތަކެއް އެޅިގެންދާނެކަމަށް ނިޒާރު ވިދާޅުވިއެވެ.
އަދި އުންމީދުކުރައްވަނީ ވައުދު ފުއްދަން މަސައްކަތްކުރައްވާ ރައީސެއްގެ އިލްތިމާސް ރައްޔިތުން ފުއްދަވާނެކަމަށް ކަމަށް ނިޒާރު ވިދާޅުވިއެވެ.
