މާފުށީ ޖަލުގައި ތިބި ހައިރިސްކް ގައިދީން ގެއަށް ބަދަލު ކުރަން ފަށައިފި
ބައްޔަށް 12 އޮފިސަރަކު ވެސް ވަނީ ޕޮޒިޓިވްވެފައި
މާފުށި ޖަލަށް ކޮމިޝަނަރ އޮފް ޕްރިޒަންސް ކުރެއްވި ޒިޔާރަތުގެ ތެރެއިން
މާފުށީ ޖަލުގައި ތިބި ހައިރިސްކް ގައިދީން ގެއަށް ބަދަލު ކުރަން ފަށައިފިއެވެ.
މިއީ މާފުށީ ޖަލުގައި ކޮވިޑް ހާލަތު ގޯސްވަމުން އަންނާތީ އަޅާފައިވާ ފިޔަވަޅެކެވެ. އެހެންނަަވެސް މިކަމުގެ އިތުރު ތަފްސީލެއް މޯލްޑިވްސް ކަރެކްޝަނަލް ސަރވިސް އިން ނުދެއެވެ. ކަރެކްޝަނުން ބުނީ ހައި ރިސްކް ގައިދީން މިހާރު ގެއަށްބަދަލު ކުރުމުގެ މަސައްކަތް ފަށާފައިވާ ކަމަށެވެ.
ޖަލުގައި ތިބި ހައިރިސްކް މީހުން ގެއަށް ބަދަލު ކުރުމުގެ މަސައްކަތް ކަރެކްޝަނުން ކުރަމުންދާއިރު މާފުށީ ޖަލުން 66 ގައިދީއަކު މިހާރުވެސް ޕޮޒިޓިވްވެ ފަރުވާ ހޯދަމުން ގެންދެއެވެ. ބައްޔަށް 12 އޮފިސަރަކު ވެސް ވަނީ ޕޮޒިޓިވްވެފައެވެ. އަދި 215 ގައިދީންނާއި ތިން އޮފިސަރުން މިހާރު ވެސް ތިބީ ކަރަންޓީނުގައެވެ.
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވަނީ ހުކުރު ދުވަހު މާފުށީ ޖަލަށް ޒިޔާރަތްކުރައްވައި، ޖަލުގެ އެލާޓް ހާލަތުގައި މަަަސައްކަތްތައް ދާގޮތާއި ގައިދީންގެ ހާލަތު ބައްލަވާ ލައްވާފައެވެ.
ޖަލުގައި ބަލި ފެތުރެމުންދާތީ ކުއްލި ހާލަތަށް ގެނެސްފައިވަނީ މި މަހުގެ 14ވަނަ ދުވަހުއެވެ.
ޖަލު އާންމު ހާލަތަކަށް ގެނެވެންދެން ރައްކާތެރިކަމުގެ ފިޔަވަޅެއްގެ ގޮތުން ގައިދީންނާއި ބަންދުކޮށްފައިވާ މީހުންނަށް އާއިލީ ބައްދަލުވުންތަކާއި ވަކީލު ބައްދަލުވުންތަކުގެ އިތުރުން ކޯޓު އަޑުއެހުންތައް ކުރިއަށް ގެންދިއުމަށް ނިންމާފައި ވަނީ އޮންލައިންކޮށެވެެ.
މީގެ ކުރިންވެސް ޖަލުތަކުގައި ހާލަތު ގޯސްވެ 522 މީހުން ޕޮޒިޓިވްވެ، 17 ހައިރިސްކް ގައިދީން ވަގުތީ ގޮތުން ގޭބަންދަށް ބަދަލުކުރަން ޖެހުނެވެ.
