ރާއްޖެއިން ބުރުންޑީއަށް ފުރަތަމަ ފަހަރަށް އޮނަރަރީ ކޮންސުލް އެއް
ބުރުންޑީއާ ދެމެދު ޑިޕްލޮމެޓިކް ގުޅުން ޤާއިމްކުރީ މީގެ އެއް ހަފްތާ ކުރިން، 20 ޖެނުއަރީ ގައި
ދިވެހިރާއްޖެއިން ބުރުންޑީއަށް ފުރަތަމަ ފަހަރަށް އޮނަރަރީ ކޮންސުލް އެއް އައްޔަނު ކުރުން
ބުރުންޑީގައި ހުންނަވާ ދިވެހިރާއްޖޭގެ ފުރަތަމަ އޮނަރަރީ ކޮންސުލް މރ. ސިލްވިއޭ ބަންކިންބާގާ އަށް އެމަގާމު ހަވާލުކުރިކަމުގެ ލިޔުން، މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ޚަލީލު ހަވާލުކޮށްދެއްވައިފިއެވެ.
މިނިސްޓްރީ އޮފް ފޮރިން އެފެއަރޒްގައި ބުދަ ދުވަހު ބޭއްވި ރަސްމިއްޔާތެއްގައި އޮނަރަރީ ކޮންސުލްކަމަށް އައްޔަންކުރިކަމުގެ ލިޔުން ބަންކިންބާގާ އާ ހަވާލުކުރުމާ ގުޅިގެން މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު ވިދާޅުވީ، އޮނަރަރީ ކޮންސުލް އައްޔަންކުރެވުމާއެކު ދެޤައުމުގެ މެދުގައި ވިޔަފާރިއާއި އިންވެސްޓްމަންޓް އަދި އެހެނިހެން ދާއިރާތަކުން ގުޅުން ބަދަހިވެގެންދާނެކަމަށް އުއްމީދު ކުރައްވާކަމަށެވެ.
ދިވެހިރާއްޖެއާ ބުރުންޑީއާ ދެމެދު ޑިޕްލޮމެޓިކް ގުޅުން ޤާއިމްކުރީ މީގެ އެއް ހަފްތާ ކުރިން، 20 ޖެނުއަރީ ގައިކަމަށް ފޮރިން މިނިސްޓްރީން މައުލޫމާތު ދެއެވެ.
12 މިލިއަނެއްހާ މީހުންގެ އާބާދީއެއް އޮންނަ ބުރުންޑީއާ ދިވެހިރާއްޖެއާ ދެމެދު ޑިޕްލޮމެޓިކް ގުޅުން ޤާއިމްކުރުމުގެ އެއްބަސްވުމުގައި ސޮއިކުރެވުނީ ނިއުޔޯކްގައި ހުންނަ ދިވެހިރާއްޖޭގެ ދާއިމީ މިޝަންގައި ބޭއްވި ރަސްމިއްޔާތެއްގައެވެ.
ބުރުންޑީއާއެކު ޚާރިޖީ ގުޅުން ރަސްމީކޮށް ޤާއިމުކުރުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރައްވާފައިވަނީ އ.ދ އަށް ކަނޑައަޅާފައި ހުންނަވާ ރާއްޖޭގެ ޕާމަނެންޓް ރެޕްރެޒެންޓޭޓިވް ތިލްމީޒާ ހުސައިންއެވެ. ބުރުންޑީގެ ފަރާތުން މި އެއްބަސްވުމުގައި ސޮއިކުރެއްވީ އެޤައުމުގެ ޕާމަނެންޓް ރެޕްރެޒެންޓޭޓިވް ޒެފެރިން މާނިރާ ޓާންގާއެވެ. މި އެއްބަސްވުމުގައި ސޮއިކޮށްފައިވަނީ ނިއުޔޯކުގައި ހުންނަ ރާއްޖޭގެ ޔޫއެން އޮފީހުގައި ކުރިއަށް ގެންދިޔަ ރަސްމިއްޔާތެއްގައެވެ.
ގިނަ ޤައުމުތަކަކާއެކު ޚާރިޖީ ގާތް ގުޅުމެއް ބޭއްވުމަކީ އަދުގެ ރައީސް އިބްރާހިމް މުހައްމަދު ސޯލިހުގެ ވަރަށް މުހިންމު ސިޔާސަތެކެވެ.
