މަސްތުވާތަކެތީގެ މައްސަލަ ހައްލުކުރުމަށް ކަސްޓަމްސްއަށް ބަދަލުތަކެއް ގެނެސްގެން މަސައްކަތް ކުރަންޖެހޭ: ޝަރީފް

މަސްތުވާތަކެތީގެ މައްސަލަ ހައްލުކުރުމަށް ކަސްޓަމްސްއަށް ބަދަލުތަކެއް ގެނެސްގެން މަސައްކަތް ކުރަންޖެހޭ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޝަރީފް ވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މަސްތުވާތަކެތި ހުއްޓުވުމަށް ކުރަމުންދާ މަސައްކަތް ވަރަށް ފުޅާކޮށްފައިވާ ކަމަށާއި، މިކަމުގައި އަމަލުކުރާ ގޮތް މިސަރުކާރުގައި ވަރަށް ތަފާތު ކަމަށެވެ. ކަސްޓަމްސްގެ ގާނޫނު ޒިންމާ އަދާކުރުމަށް ވަރަށް ގިނަ އެހީތެރިކަމެއް ދެމުންދާ ކަމަށް ޝަރީފް ވިދާޅުވިއެވެ. އަދި މަސްތުވާތަކެތީގެ މައްސަލަ ހައްލުކުރުމަކީ ސަރުކާރުގެ އަމާޒަކަށްވާއިރު، ކަސްޓަމްސްއަކީ ޕްރައިމަރީ މެންޑޭޓް އޮތް މުއައްސަސާއަކަށް ވާތީ ސަރުކާރުން ބޭނުންވާ މަސައްކަތް ކުރުމަށް އިތުރު ބަދަލުތަކެއް ގެނެސްގެން މަސައްކަތް ކުރަން ޖެހޭ ކަމަށެވެ.

މިސަރުކާރުގައި ހައިރާންވާ މިންވަރަށް މަސްތުވާތަކެތި އަތުލައިގަނެފައިވާކަން ފާހަގަކޮށް ޝަރީފް ވިދާޅުވީ 2020 އަދި 2021 ވެސް އެއްފަހަރާ ގިނަ އަދަދެއްގެ މަސްތުވާތަކެތި އަތުލައިގަނެވިފައިވާ ކަމަށެވެ.

ޝަރީފް ވިދާޅުވީ ރާއްޖެ އުފެދިފައިވާ ގޮތުން ރާއްޖެއަށް އެތެރެވެވޭ ބައިވަރު ދިމަދިމާ ހުންނަ ކަމަށާއި، އެއީ މަސްތުވާތަކެތި އަތުލައިގަތުމަށް ކުރަމުންދާ މަސައްކަތަށް ދިމާވާ ވަރަށް ބޮޑު ގޮންޖެހުމެއް ކަމަށެވެ. އަދި ޒަމާނުއްސުރެ އެގޮތަށް ރާއްޖެއަށް މަސްތުވާތަކެތި އެތެރެ ކުރާ ކަމަށް ގަބޫލު ކުރެވޭ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ މަސްތުވާތަކެތީގެ މައްސަލައަކީ ބޮޑު މައްސަލައެއް ކަމަށްވާއިރު، ކުރިއަށް އޮތްތަނުގައި ކަމާބެހޭ ހުރިހާ މުއައްސަސާއެއް ގުޅިގެން މަސައްކަތް ކުރަން ޖެހޭ ކަމަށެވެ. ޚާއްސަކޮށް ކަސްޓަމްސްގެ ފަރާތުން ކުރިއަށް ގެންދާ އޮޕަރޭޝަންތަކުގައި ފުލުހުންގެ ފުރިހަމަ އެއްބާރުލުން ލިބޭ ކަމަށް ޝަރީފް ވިދާޅުވިއެވެ. އަދި ވިދާޅުވީ އޮޕަރޭޝަންތަކުގެ އިތުރުން ކޮންމެ ދުވަހަކު މަސައްކަތް ކުރާއިރު އޮފިސަރުންގެ ރައްކާތެރިކަމަށް ވެސް ޚާއްސަ ސަމާލުކަމެއްދޭ ކަމަށެވެ.