މާލޭގެ އެތެރޭގެ ދަތުރުތައް ނަގަން ޓެކްސީ ޑްރައިވަރުން އިންކާރެއް ނުކުރޭ: ޑްރައިވަރުންގެ ޖަމްއިއްޔާ
25 ޖެނުއަރީ 2022 | އަންގާރަ 13:26އަގުތައް އެންމެ އެކަށީގެންނެއް ނުވޭ
މަޖީދީމަގު
މާލޭގެ އެތެރޭގެ ދަތުރުތައް ނަގަން ޓެކްސީ ޑްރައިވަރުން އިންކާރުނުކުރާ ކަމަށާއި، ދަތުރުގެ އަގުތަކުގައި ވަރަށް ބޮޑަށް މައްސަލަ އުޅޭ ކަމަށް ޓެކްސީ ޑްރައިވަރުންގެ ޖަމްއިއްޔާއިން ބުނެފިއެވެ.
ރާއްޖެއެމްވީއަށް އެޖަމްއިއްޔާގެ މެންބަރު އަބްދުﷲ އިބްރާހިމް ވިދާޅުވީ، ޓެކްސީ ޑްރައިވަރުންގެ ކަންބޮޑުވުންތަކަށް މިސަރުކާރުން ހައްލު ހޯދައިނުދޭ ކަމަށާއި، ޓްރާންސްޕޯޓު މިނިސްޓްރީގެ ފަރާތުން އެއްވެސް އެއްބާރުލުމެއް ނުލިބޭ ކަމަށެވެ. މިހާތަނަށް މަޝްވަރާކޮށް މައްސަލައަށް ހައްލު ގެނައުމަށް ކުރި މަސައްކަތް ނާކާމިޔާބު ވެފައިވާ ކަމަށް އޭނާ ވިދާޅުވިއެވެ.
ޓެކްސީ ތަކުގެ އަގުތަކަށް އިޝާރާތް ކުރައްވައި އަބްދުﷲ ވިދާޅުވީ، އަގުތައް ކަނޑައަޅާފައިވަނީ ޓެކްސީ ސެންޓަރުތަކާއި އަދި ޑްރައިވަރުންނާ މަޝްވަރާ ކުރުމެއް ނެތި ކަމަށާއި، މަޝްވަރާ ކުރި ކަމަށް ޓްރާސްޕޯޓު މިނިސްޓްރީން ބުނި ނަމަވެސް އެއީ ދޮގެއް ކަމަށެވެ. މަޝްވަރާކޮށްފައިވަނީ ވެސް ކަމާނުގުޅޭ، މިނިސްޓްރީން ބޭނުންވާ ވަކި ބަޔަކާ ކަމަށް އޭނާ ވިދާޅުވިއެވެ.
އަބްދުﷲ ވިދާޅުވީ ޕެޓްރޯލް އަގު އުފުލިގެންދާއިރު ވެސް ޓެކްސީތަކުގެ އަގު މަތި ނުކުރެވޭ ކަމަށާއި، ނަމަވެސް ހުރިހާ ވިޔަފާރިއެއްގެ އަގުތައް މައްޗަށް ދާ ކަމަށެވެ. ދިރިއުޅުމުގެ އެހެނިހެން ޚަރަދުތައް އިންތިހާއަށް މަތިވެފައިވާ ކަމަށް އަބްދުﷲ ވިދާޅުވިއެވެ.
މާލޭގެ އެތެރޭގެ ދަތުރުތައް ނަގަން ޓެކްސީ ޑްރައިވަރުން އިންކާރުކުރާ ވާހަކަތަކަށް ރައްދު ދެއްވައި އަބްދުﷲ ވިދާޅުވީ އެއީ ދޮގެއް ކަމަށާއި، މެޖޯރިޓީ ޑްރައިވަރުން އެގޮތަށް އެކަން ނުކުރާނެ ކަމަށެވެ. މާލޭއިން ހުޅުމާލެގެ ދެވަނަ ފިޔަވައްސަށް ދިއުމަށް އެތައް ވަގުތެއް ނަގާއިރު، ލިބެނީ 90 ރުފިޔާ ކަމަށް އޭނާ ވިދާޅުވިއެވެ. އަދި މާލޭގެ އެތެރެއިން 25 ރުފިޔާ ދަތުރަށް ނަގާއިރު ދެވަނަ ފިޔަވައްސަށް ދިއުމަށް ނަގާ ވަގުތާ އަޅާބަލާއިރު ނުބައްދަލު ކަމަށް އޭނާ ވިދާޅުވިއެވެ.
މީގެ އިތުރުން އަބްދުﷲ ވިދާޅުވީ ޓެކްސީ ޑްރައިވަރުން މިއަދު އެމަސައްކަތް ކުރަނީ ގިނަ ތަކުލީފުތަކާއެކު ކަމަށާއި، އެމަސައްކަތުން ލިބެނީ ގެއްލުން ކަމަށެވެ. ވިޔަފާރީގައި ފައިދާ ނުވާ ކަމަށް އޭނާ ވިދާޅުވިއެވެ. މާލޭގެ މަގުތައް ހުންނަ ގޮތުން ވެސް ގިނަ ދަތިތަކާ ކުރިމަތިލާންޖެހޭ ކަމަށް އޭނާ ވިދާޅުވިއެވެ.
މާލޭގެ އެތެރޭގެ ދަތުރުތައް ނަގަން ޓެކްސީ ޑްރައިވަރުން އިންކާރުނުކުރާ ކަމަށް ޓެކްސީ ޑްރައިވަރުންގެ ޖަމްއިއްޔާއިން ބުނި ނަމަވެސް މި ފަހަކަށް އައިސް މާލޭގެ އެތެރޭގެ ދަތުރުތަށް ނެގުމަށް ޓެކްސީ ޑްރައިވަރުން އިންކާރުކުރާ މައްސަލަ ވަނީ ފެންމަތިވެފައެވެ. އޭގެ ބަދަލުގައި މާލެއިން ހުޅުމާލެއަށް ނުވަތަ އެއާޕޯޓަށް ކުރާ ދަތުރުތައް އެފަރާތްތަކުން އަންނަނީ ނަގަމުންނެވެ. ގިނަ ބަޔަކު ގަބޫލުކުރާ ގޮތުގައި ޓެކްސީ ޑްރައިވަރުން މިގޮތަށް ކަންތައް ކުރަނީ ކުޑަ ވަގުތުކޮޅެއްގެ ތެރޭގައި ގިނަ ފައިސާ ހޯދުމަށްޓަކައެވެ.
މިމައްސަލަ ބޮޑުވުމާ ގުޅިގެން ހަމައެކަނި ހުޅުމާލެއާއި އެއާޕޯޓަށް ދަތުރުކުރާ ޓެކްސީތައް ރިޕޯޓުކޮށްދިނުމަށް ޓްރާންސްޕޯޓް މިނިސްޓްރީން ވަނީ އެދިފައެވެ. އާންމުން ޓެކްސީގެ ޚިދުމަތަށް އެދުމުން ބޭނުންވާ ޚިދުމަތް ފޯރުކޮށް ނުދޭ ފަރާތްތަކުގެ މައުލޫމާތު މިނިސްޓްރީގެ ފޯނު ނަންބަރު 7943434 މެދުވެރިކޮށް ވައިބަރ މެސެޖުން ހިއްސާކުރުމަށް ވަނީ އެދިފައެވެ. އާންމުންނަށް ޚިދުމަތް ދިނުމުގައި ޓެކްސީ ސެންޓަރުތަކުގެ މައްޗަށް ގާނޫނާއި ގަވާއިދުތަކުން ލާޒިމުކުރާ ކަންކަން ފުރިހަމަ ނުކުރާ ފަރާތްތަކާމެދު ކުރިއަށް އޮތްތަނުގައި ފިޔަވަޅު އަޅާނެކަމަށް މިނިސްޓްރީން ބުނެއެވެ.
މާލެ ތެރޭގައި އާންމުކޮށް ޓެކްސީ ދަތުރުތައް ކޮށްދެނީ 25 ރުފިޔާއަށެވެ. ނަމަވެސް މާލެއާ ހުޅުމާލޭގެ އެއްވަނަ ފިޔަވައްސާ ދެމެދުގެ ދަތުރުތައް ކުރަނީ 75 ރުފިޔާއަށެވެ. ދަންވަރު 12ގެ ފަހުން މި ދަތުރުތައް ކުރަނީ އިތުރަށް ފަސް ރުފިޔާ ޗާޖުކޮށްފައެވެ.
މާލެއާ ހުޅުމާލޭގެ ދެވަނަ ފިޔަވައްސާ ދެމެދު ކުރާ ދަތުރުތަކަށް އާންމުކޮށް ނަގަނީ 90 ރުފިޔާއެވެ. އަދި މާލެއާ އެއާޕޯޓާ ދެމެދު ދަތުރުކޮށްދޭ އާންމު އަގަކީ 65 ރުފިޔާއެވެ. ދަންވަރު 12ގެ ފަހުން މި ދަތުރުތައް ކުރާނަމަ އިތުރަށް 10 ރުފިޔާ ޗާޖުކުރެއެވެ.
