ރައީސް ޔާމީނަކީ ވެރިކަމަށް ގެންނަން ހެޔޮވާވަރު ބޭފުޅެއް ނޫން - ނަސީމް
އެމްޑީޕީގެ މާލިމީންނަކީ ޑިމޮކްރީސައި ރާއްޖެ ދުށް އެންމެ މޮޅު ދެ ބޭފުޅުން
އަހުމަދު ނަސީމް - ހެލްތް މިނިސްޓަރ
ކުރީގެ ރައީސް އަބްދުﷲ ޔާމީނަކީ ރާއްޖޭގެ ވެރިކަމަށް ގެންނަން ހެޔޮވާވަރުގެ ބޭފުޅެއް ނޫން ކަމަށް ހެލްތް މިނިސްޓަރ އަހުުމަދު ނަސީމް ވިދާޅުވެއްޖެއެވެ.
މިނިސްޓަރ ނަސީމް މިހެން ވިދާޅުވީ ކޮމަންޑޫ ދާއިރާގެ ބައި އިލެކްޝަންގެ ކެމްޕެއިން ޖަލްސާއެއްގައި ށ.މަރޮށީގައި ވާހަކަފުޅު ދައްކަވަމުންނެވެ. ނަސީމް ވިދާޅުވީ، ރަށްރަށުގެ އަމާންކަން ނައްތަލުމަށް ކުރާ މަސައްކަތަކީ ސީދާ ރައީސް ޔާމީންގެ އިރުޝާދުގެ ދަށުން ހިންގާ އަމަލުތައް ކަމަށެވެ. ރަށެއްގެ ހެލްތް ސެންޓަރުގައި ޑޮކްޓަރެއް ނުވަތަ ނަރުހެއް މަދު ވުމުން ރައްޔިތުން ނުކުމެ އެތަނުގައި ތަޅު އެޅުވުމަކީ ގާނޫނާ ޚިލާފު ކަމެއް ކަމަށެވެ. އެއީ ސީދާ ރައީސް ޔާމީންގެ އިރުޝާދުގެ ދަށުން ހިންގާ ކަންކަން ކަމުގައި ނަސީމް ވިދާޅުވިއެވެ. އެފަދަ ގާނޫނާ ޚިލާފު ކަންކަން ނުކުރުމަށް ރައްޔިތުންނަށް ނަސީމް އިލްތިމާސް ކުރެއްވިއެވެ. އަސާސީ ޚިދުމަތް ދޭ އެފަދަ ތަންތަން ތަޅު އަޅުވައިގެން ތިބުމަށް އިދިކޮޅަށް ޖާގަ ނުދެއްވާނެ ކަމަށް ނަސީމް ވިދާޅުވިއެވެ.
ނަސީމް ވިދާޅުވީ، އިންޑިއާ އައުޓް ޖަހައިގެން ރައީސް ޔާމީން ކުރައްވަނީ ވަރަށް ލަތުވެތި ކަމެއް ކަމަށެވެ. އެއީ ސީރިއަސް މައްސަލައެއް ކަމަށާއި، އެކަން ހުއްޓުވަން ޖެހޭ ކަމަށެވެ.
ގާތްގަނޑަކަށް 17 އަހަރުވަންދެން ރައީސް ޔާމީނާއެކު މަސައްކަތް ކުރެއްވި ކަމަށާއި، އެއީ އެއްގޮތަކަށްވެސް ވެރިކަމަށް ގެންނަން ހެޔޮވާވަރުގެ ބޭފުޅެއް ނޫން ކަމަށެވެ. މިހާރުވެސް ކެމްޕެއިން ކުރެއްވުމުގެ ނަމުގައި ރަށްރަށަށް ވަޑައިގެން އިންނަވަނީ ޑިގް ކުޅުއްވުމަށް ކަމަށެވެ. އަބަދުވެސް ރައީސް ޔާމީން ވިސްނުންފުޅު ގެންގުޅުއްވަނީ ކޮންމެވެސް މަކަރެއް ހައްދަވައިގެން ގޮނޑިއެއް ހޯއްދަވަން ކަމަށް ނަސީމް ވިދާޅުވިއެވެ. މިއީ 2013ގައިވެސް ފެނިފައި އޮތް މަންޒަރެއް ކަމަށެވެ.
ނަސީމް ވިދާޅުވީ އެމްޑީޕީގެ މާލިމީންނަކީ ޑިމޮކްރީސައި ރާއްޖެ ދުށް އެންމެ މޮޅު ދެ ބޭފުޅުން ކަމަށެވެ. އެ ދެބޭފުޅުންގެ މިންނެތް މަސައްކަތުން މުޅި ރާއްޖެ ބަދަލު ކުރައްވައިފި ކަމަށާއި، އެއީ ކުރިން ކުރެވޭނެ ކަމުގެ ޔަގީންކަން އޮތް ކަމެއް ނޫން ކަމަށެވެ. ކޮވިޑް ކޮންޓްރޯލް ކުރުމާއި ވެކްސިން ޕްރޮގްރާމްގައިވެސް ރާއްޖެއަކީ، އެންމެ ކާމިޔާބު ގައުމުތަކުގެ ލިސްޓްގައި ގުނާލެވޭ ގައުމެއް ކަމަށެވެ. އެހެންކަމުން މިހާރުވެސް މަސައްކަތް ކުރަންވީ މި ސަރުކަރު ނަގަހައްޓައި ދެމެހެއްޓުމަށް ކަމަށެވެ.
