މިލާނާއި ޔުވެންޓަސް އެއްވަރު، ފައިދާ ނާޕޮލީއަށް

އިޓާލިއަން ލީގުގައި އާދީއްތަ ދުވަހުގެރޭ އޭސީ މިލާނާއި ޔުވެންޓަސް ބައްދަލުކުރި މެޗު އެއްވަރުވުމާއެކު، ތާވަލުގެ ދެވަނައަށް ނާޕޮލީ ޖެހިލައިފިއެވެ.

މިލާނުގެ ދަނޑުގައި ކުޅުނު މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މި މެޗުގައި މިލާނުން ޔުވެންޓަސްގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލިއިރު، މުޅި މެޗުގައިވެސް ޔުވެންޓަސްއަށް މިލާނުގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ. އެގޮތުން މެޗުގެ ފުރަތަމަ ހާފުގައި މިލާނުގެ ރަފައެލް ލެއާއޯ ފޮނުވާލި ހަމަލާއެއް ޔުވެންޓަސްގެ ގޯލްކީޕަރު ވޮސިއެޗް ޝެޒްނީ ވަނީ ދިފާއުކޮށްފައެވެ. އޭގެ ފަހުން ފުރަތަމަ ހާފުގައި މިލާނުގެ ޑޭވިޑޭ ކަލާބްރިއާ ފޮނުވާލި ނުރައްކާތެރި ދެ ހަމަލާއެއް ދިޔައީ ގޯލާ އަމާޒުނުވެއެވެ.

މި މެޗުގެ ދެވަނަ ހާފުގައިވެސް މިލާނުން ނުރައްކާތެރި ހަމަލާތަކެއް އުފެއްދިއިރު، މި ހާފުގައި އެ ޓީމުގެ ތެއޯ ހެނާންޑޭޒް އާއި އޮލިވިއޭ ޖިރޫޑް ފޮނުވާލި ހަމަލާތައްވެސް ޔުވެންޓަސްގެ ގޯލްކީޕަރު ޝެޒްނީ ވަނީ ހުއްޓުވާފައެވެ.

މި މެޗުން މި ދެ ޓީމު އެއްވަރުވިއިރު، އާދީއްތަ ދުވަހުގެރޭ ކުޅުނު މެޗުން ނާޕޮލީ ވަނީ ފުލުގައި އޮތް ސަލެނިޓާނާ އަތުން 4-1 ގެ ނަތީޖާއަކުން މޮޅުވެފައެވެ. އެއާއެކު ނާޕޮލީ ދެވަނައަށް ޖެހިލީ ކުޅުނު 23 މެޗުން 49 ޕޮއިންޓާއެކުއެވެ. ތިންވަނައިގައި އޮތް މިލާނަށްވެސް 23 މެޗުން 49 ޕޮއިންޓް ލިބިފައިވާއިރު، ތާވަލުގެ ފަސްވަނައިގައި ޔުވެންޓަސް އޮތީ 23 މެޗުން 42 ޕޮއިންޓް ހޯދައިގެންނެވެ.