ރާއްޖޭގެ މޫސުމް: ވައިޓް އެލާޓަށް ބަދަލުކޮށް، އެލާޓްގެ ވަގުތު އިތުރުކޮށްފި

ރާއްޖެއަށް މިހާރު ކުރަމުންދާ ހުޅަނގު މޫސުމްގެ ވިއްސާރައާ ގުޅިގެން ބުރާސްފަތި ދުވަހު ހެނދުނު ޔެލޯ އެލާޓް ނެރުމަށްފަހު، މެންދުރު ފަހުން ފެށިގެން ވައިޓް އެލާޓަށް ދަށްކޮށް އެލާޓްގެ ވަގުތު އިތުރުކޮށްފި އެވެ.

މެޓް އޮފީހުން ބުނީ ގދ. އަތޮޅާއި ހއ. އަތޮޅުގެ ރަށްރަށަށް މޫސުން ގޯސްވުމާއި ގުޅިގެން ބުރާސްފަތި ދުވަހުގެ 14:00 އިންފެށިގެން ރޭގަނޑު 20:00 އާހަމައަށް ވައިޓް އެލާޓް ނެރެފައިވާ ކަމަށެވެ.

މި އެލާޓް ނެރެފައިވަނީ ބޯކޮށް ވާރޭވެހި ގުގުރުމާއެކު ވިއްސާރަ ކުރާނެ ކަމަށް ލަފާކުރެވޭތީ ކަމަށާއި އަދި ވިލާގަނޑުގައި ގަޑިއަކު 45 މޭލު ބާރުމިނުގައި ވައިޖެހޭނެ ކަމަށް މެޓް އޮފީހުން ބުނެ އެވެ. އާއްމު ގޮތެއްގައި 23 މޭލާއި 29 މޭލުގެ ބާރުމިނުގައި ވައިޖެހޭނެ ކަމަށް ވެސް މެޓް އޮފީހުން ބުނެއެވެ.

ބުރާސްފަތި ދުވަހު ހެނދުނު ރާއްޖޭގެ އުތުރާއި މެދުރާއްޖެތެރެއަށް ޔެލޯ އެލާޓް ނެރެފައިވަނިކޮށް، ފ. ނިލަންދޫއަށް ވަނީ ގަނޫރޯޅިއެއް އަރާފަ އެވެ. މިނަގޫރޯޅީގެ ސަބަބުން ނިލަންދޫގެ ހަ ގެއަކަށް ބޮޑެތި ގެއްލުންތަކެއް ވެފައިވެއެވެ. ބައެއް ގޭގެ ފުރާޅު އެއްލާލާފައިވެސް ވެއެވެ.

މެޓް އޮފީހުންނާއި ސިފައިންނާއި ފުލުހުން ވެސް ބުނެފައިވަނީ މިދުވަސްވަރު ރާއްޖޭގެ މޫސުން ގޯސް ކަމަށާއި ހާއްސަކޮށް ކަނޑުދަތުރުފަތުރު ކުރާ ފަރާތްތަކުން ހާއްސަ ސަމާލުކަމެއް ދިނުމަށް އިލްތިމާސް ކުރާ ކަމަށެވެ. އާއްމު ރައްޔިތުން ރައްކާތެރުކަމުގެ ފިޔަވަޅުތައް އަޅައި މުދާ ރައްކާތެރިގޮތެއްގައި ބެހެއްޓުމަށްވެސް ކަމަބެހޭ ފަރާތްތަކުން ވަނީ އިލްތިމާސްކޮށްފަ އެވެ.