ގްރޭޓަރ މާލޭ އިންޓަރކަނެކްޝަން މެދުވެރިކޮށް ހުޅުލެއަށް ކަރަންޓުދޭން ފަށައިފި
23 ޖެނުއަރީ 2022 | އާދީއްތަ 11:25ގްރޭޓަރ މާލެ އިންްޓަރކަނެކްޝަން މަޝްރޫއުގެ ދަށުން، މާލެއާއި ހުޅުމާލޭގައި 95 އެމްޕީވީގެ 4 ޓްރާންސްފޯމަރު ވަނީ ބަހައްޓާފައި
ގްރޭޓަރ މާލެ އިންޓަރކަނެކްޝަން މެދުވެރިކޮށް ހުޅުލެއަށް ކަރަންޓު ދޭން ފެށުން
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ގްރޭޓަރ މާލެ އިންޓަރކަނެކްޝަން ގްރިޑް މެދުވެރިކޮށް، ހުޅުލެއަށް ކަރަންޓުފޯރުކޮށްދޭން ފަށައިފިއެވެ.
ސްޓެލްކޯއިން ބުނީ، މާލެ، ހުޅުމާލެ އަދި ހުޅުލޭގެ ކަރަންޓު އެއް ވިއުގައަކުން ގުޅާލުމަށްޓަކައި، ހުޅުލޭގެ ގްރިޑާއި އިންޓަރކަނެކްޝަން ގްރިޑް ހުކުރު ދުވަހުގެ ރޭ ގުޅާލައި، ހުޅުލެއަށް ކަރަންޓު ފޯރުކޮށްދޭން ފަށާފައިވާ ކަމަށް ބުންޏެވެ.
އެ ދެ ގްރިޑް ގުޅާލާފައިވަނީ، ހުޅުލެއަށް ކަރަންޓު ފޯރުވައިދިނުމަށް ސްޓެލްކޯއާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އާ ދެމެދު ވެފައިވާ އެއްބަސްވުމުގެ ދަށުންނެވެ. ހުޅުލެއަށް ކަރަންޓު ފޯރުކޮށްދިނުމަށް ސްޓެލްކޯއާއި އެމްއޭސީއެލްއާ ދެމެދު އެއްބަސްވުމުގައި ސޮއިކޮށްފައި ވަނީ މި މަހުގެ 6 ވަނަ ދުވަހުއެވެ.
ގްރޭޓަރ މާލެ އިންޓަރކަނެކްޝަން ގްރިޑަކީ ހަކަތައިގެ ސިނާއަތުގައި މިހާތަނަށް ރާއްޖޭގައި ހިންގާފައިވާ އެންމެ ބޮޑު މަޝްރޫއެވެ. މި މަޝްރޫއުގެ ދަށުން ރާއްޖޭގައި މިހާތަނަށް ބަހައްޓާފައިވާ އެންމެ ބޮޑު ޓްރާންސްފޯމަރުތައްވެސް ބަހައްޓާފައިވާ ކަމަށް ސްޓެކްކޯއިން މައުލޫމާތުދެއެވެ.
އެގޮތުން، މާލެއާއި ހުޅުމާލޭގައި 95 އެމްޕީވީގެ ހަތަރު ޓްރާންސްފޯމަރު ބަހައްޓާފައި ވެއެވެ. އަދި ހުޅުލޭގައި 8 އެމްޕީވީގެ ދެ ޓްރާންސްފޯމަރެއް ބަހައްޓާފައިވެއެވެ.
ގްރޭޓަރ މާލެ އިންްޓަރކަނެކްޝަން މަޝްރޫއުގެ ދަށުން މާލެއާއި ހުޅުމާލޭގެ ކަރަންޓު އެއް ވިއުގައަކުން ގުޅާލާފައި ވަނީ ޖުލައި 18، 2021ގައެވެ.
