ގައިޑްލައިން އާއި އުސޫލުތަކާއެކު އިންތިޚާބު ކުރިއަށް ގެންދަން އެޗްޕީއޭގެ މައްސަލައެއް ނެތް
23 ޖެނުއަރީ 2022 | އާދީއްތަ 08:54މިހާރު އަޅަންޖެހޭ ފިޔަވަޅުތަކާއި ގުޅޭ މަޝްވަރާތައް ކޮންމެ ދުވަހަކުވެސް ކުރިއަށްދޭ
ކޮމަންޑޫ ދާއިރާގެ ބައި އިލެކްޝަނާއެކު އަންނަ މަހުގެ 5 ވަނަ ދުވަހު ތިން ދާއިރާއެއްގެ ބައި އިލެކްޝަން ބޭއްވުމަށް ހަމަޖެހިފައިވޭ
ކޮވިޑް-19 އާ ގުޅިގެން އަޅާފައިވާ ފިޔަވަޅުތަކާއެކު ކޮމަންޑޫ ދާއިރާގެ ބައި އިލެކްޝަން ކުރިއަށް ގެންދިއުމާމެދު ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިއުތިރާޒެއް ނެތް ކަމަށް ބުނެފިއެވެ.
އާދިއްތަ ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑެމޮލޮޖިސްޓް ޑރ އިބްރާހިމް އަފްޒަލް ވިދާޅުވީ، މިހާރު ވިސްނުން ހުރީ ކޮވިޑް ބައްޔާއެކު ދިރިއުޅުމަށް ކަމަށެވެ. އެގޮތުން އިންތިޚާބަކީވެސް އާންމު ދިރިއުޅުމުގެ ކަންކަމުގެ ތެރެއިން ގުޅިގެންދާ ކަމެއްކަން ފާހަގަ ކުރައްވައި ޑރ އަފްޒަލް ވިދާޅުވީ، މިހާރު އެޗްޕީއޭގެ ވިސްނުމަކީ ގައިޑްލައިނާއި އުސޫލުތަކާއެކު އިންތިޚާބު ކުރިއަށް ގެންދިއުމުގެ ފުރުސަތު ދިނުން ކަމަށެވެ. އެގޮތުން އުސޫލުތަކާ އެއްގޮތަށް އެކަންކަން ކުރިއަށް ދޭތޯ އެޗްޕީއޭއިން ބަލާނެ ކަމަށާއި، އެގޮތަށް އެކަން ކުރިއަށް ނުދާނަމަ ދެން އަޅަންޖެހޭ ފިޔަވަޅުތައްވެސް އަޅުއްވާނެ ކަމަށް ޑރ އަފްޒަލް ވިދާޅުވިއެވެ.
ޑރ އަފްޒަލް ވިދާޅުވީ އެޗްއީއޯސީގައި ކޮންމެ ދުވަހަކުވެސް މިހާރު އަޅަންޖެހޭ ފިޔަވަޅުތަކާއި ގުޅޭ މަޝްވަރާތައް ކުރިއަށްދާ ކަމަށެވެ. އަދި ކޭސްތައް ކުރިއަށްދާ ގޮތުން ކޮންމެ ދުވަހަކުވެސް ފިޔަވަޅުތަކަށް ބަދަލު އައުން އެކަށީގެންވާކަމަށެވެ.
ކޮމަންޑޫ ދާއިރާގެ ބައި އިލެކްޝަނާއެކު އަންނަ މަހުގެ 5 ވަނަ ދުވަހު ތިން ދާއިރާއެއްގެ ބައި އިލެކްޝަން ބޭއްވުމަށް ހަމަޖެހިފައިވެއެވެ. އެއީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ތެރެއިން ތ.ވިލުފުށި އަދި ގއ.ގެމަނަފުށީ ދާއިރާއެެވެ.
ކޮމަންޑޫ ދާއިރާއަށް ތިން ކެނޑިޑޭޓެއް ވާދަކުރެއެވެ. އެއީ ވެރިކަންކުރާ މައި ޕާޓީ އެމްޑީޕީގެ ފަރާތުން މުޙައްމަދު ރަޝީދާއި، އިދިކޮޅު ޕީޕީއެމްގެ ފަރާތުން މޫސާ ފަތުހީ އާދަމާއި، ދާދި ފަހުން އުފެއްދި ސިޔާސީ ޕާޓީ އެމްއެންޕީގެ ފަރާތުން ވާދަކުރާ ޢަބްދުލްހަންނާން އިދުރީސްއެވެ.
ކޮމަންޑޫ ދާއިރާގައި ހިމެނޭ ތިން ރަށްކަމަށްވާ ކޮމަންޑޫއާއި، ފޯކައިދޫ އަދި މަރޮށި ހިމެނޭ އެ ދާއިރާގައި 3،316 މީހުންނަށް ވޯޓްލުމުގެ ހައްގު ލިބިގެންވެއެވެ. އަދި 6 ވޯޓް ފޮށްޓެއް އެ އިންތިޚާބުގައި ބަހައްޓަން ނިންމާފައިވެއެވެ.
ބައި އިލެކްޝަންތަކުގައި ވޯޓް ފޮށި ބެހެއްޓުމަށް ނިންމާފައިވަނީ އެ ދާއިރާތަކުގެ ރަށްތަކުގެ އިތުރުން މާލޭގައި ހުންނަ އިންތިޚާބުތަކާއި ބެހޭ މައި މަރުކަޒުގައެވެ. މި އިންތިޚާބަށް ހުރިހާ ޕާޓީއަކުންވެސް ގެންދަނީ ފުޅާ ދާއިރާއެއްގައި ކެމްޕޭން ކުރަމުންނެވެ. މި ކެމްޕޭން ޙަރަކާތްތަކުގައިވެސް ގިނަ ބަޔަކު ބައިވެރިވަމުންދެއެވެ.
