މާލެއިން ބޭރުގައި ފުރަތަމަ ފަހަރަށް ގާއިމުކުރާ ބައިނަލްއަގުވާމީ ފެންވަރުގެ މަލްޓި ޕަރޕަސް ސްޕޯޓްސް ކޮމްޕްލެކްސްތައް ބީލަމަށް ހުޅުވާލުމަށް ޓެންޑަރ ބޯޑަށް ފޮނުވައިފިއެވެ.
މާލޭ ސޯޝަލް ސެންޓަރު ފިޔަވައި ރާއްޖޭގައި ގާއިމުކުރާ ފުރަތަމަ މަލްޓި ޕަރޕަސް އިންޑޯ ކޮމްޕްލެކްސްތައް ގާއިމްކުރުމުގެ މަޝްރޫއަކީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ކުރިއަށްގެންދާ މަޝްރޫއެކެވެ.
މިމަޝްރޫއުގެ ދަށުން ރާއްޖޭގެ އެކި ސަރަހައްދުތަކަށް ބަހާލައިގެން 6 މަލްޓި ޕަރޕަސް އިންޑޯ ސްޕޯޓްސް ކޮމްޕްލެކްސްް ތަރައްގީކުރުމަށް ވަނީ ނިންމާފައެވެ. މި ސްޕޯޓްސް ކޮމްޕްލެކްސް ތަރައްގީކުރުމަށް ނިންމާފައިވާ ރަށްތަކަކީ ރ. އަލިފުށި، ރ. ދުވާފަރު، އއ. އުކުޅަސް، ފުވައްމުލައް ސިޓީ އަދި އައްޑޫ ސިޓީ ފޭދުއާއި މީދޫއެވެ. ޔޫތު މިނިސްޓްރީން ބުނީ މަލްޓި ޕަރޕަސް އިންޑޯ ކޮމްޕްލެކްސްގެ މަސައްކަތް ކުރިއަށްގެންދިއުމަށް ބޭނުންވާ އިދާރީ މަސައްކަތްތައް ފުރިހަމަކުރުމަށްފަހު، މިހާރުވަނީ ޓެންޑަރ ބޯޑަށް ފޮނުވާފައިކަމަށެވެ.
މި ކޮމްޕްލެކްސްތަކަކީ ހޭންޑްބޯލް، ނެޓްބޯލް، ވޮލީބޯލް އަދި ބާސްކެޓްބޯޅައިގެ ބައިނަލްއަގުވާމީ ފެންވަރުގެ މުބާރާތްތައް ބޭއްވޭ ފެންވަރަށް ތަރައްގީކުރާ އިމާރާތްތަކެކެވެ. އަދި މި ތަންތަން ފަރުމާކޮށްފައިވަނީ މިފަދަ ފެސިލިޓީއަކުން ކުޅުންތެރިންނަށް ބޭނުންވާނެ ވަސީލަތްތަކާއި، އަދި ކުޅިބަލަން ވަންނަ މީހުންނަށް ފަސޭހައި ތިބެވޭނެ އިންތިޒާމްތަކާއެކުއެވެ.
އަތޮޅުތަކުގައި ކުޅިވަރު ކުޅެވޭނެ ވަސީލަތްތައް ގާއިމުކުރުމަށް ރައީސުލްޖުމްހުރިއްޔާ އިބްރާހިމް މުހައްމަދު ސާލިހުގެ ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މިހާރުވެސް ފުޓްސަލް ދަނޑުތަކާއި ފުޓްބޯޅަ ދަނޑުތައް ގާއިމުކުރުމުގެ މަސައްކަތް އެކި ރަށްރަށުގައި ކުރިއަށްދެއެވެ. މީގެއިތުރުން އައުޓްޑޯ އަދި އިންޑޯ އެކިއެކި ކުޅިވަރުތައް ކުޅެވޭނެ އިންތިޒާމްވެސް ސަރުކާރުން ގެންދަނީ ހަމަޖައްސަމުންނެވެ.
