އޮމިކްރޯން ވޭރިއަންޓާއި ގުޅިގެން ޕާކިސްތާނުގައި ރިކޯޑް މިންވަރަކަށް ކޮވިޑް-19 ކޭސްތައް މައްޗަށް ޖެހިލައިފިއެވެ.

އެގޮތުން ހުކުރު ދުވަހު އެގައުމުން 7000 މީހުންނަށް ކޮވިޑް ޖެހުނުއިރު މިއީ ޕެންޑަމިކް ފެށުނު ފަހުން އެގައުމުން އެއް ދުވަހު އެންމެ ގިނަ މީހުންނަށް ކޮވިޑް ޖެހިގެން ރިޕޯޓްކުރި ދުވަހެވެ. މިއާއެކު އެގައުމުން އަންނަނީ ވައިރަސް ފެތުރުން ކޮންޓްރޯލް ކުރުމަށް ފިޔަވަޅުތައް ވަރުގަދަ ކުރަމުންނެވެ.

ޕާކިސްތާނުގައި މިވަގުތު ކޮވިޑް ޕޮޒިޓިވިޓީ ރޭޓް ހުރީ 12.93 އިންސައްތައިގައެވެ. ޕާކިސްތާނުގެ އެންމެ ބޮޑު ސިޓީކަމުގައިވާ ކަރާޗީގައި ކޮވިޑަށް ޕޮޒިޓިވްވާ ރޭޓް ހުރީ 46.58 އިންސައިތަގައެވެ. މިއާއެކު ޕާކިސްތާނުގެ ނޭޝަނަލް ކޮމާންޑް އޮޕަރޭޝަން ސެންޓަރ (އެންސީއޯސީ)ން މިހާރު ނިންމާފައިވަނީ ޖެނުއަރީ މަހުގެ 21 ވަނަ ދުވަހުން ފެށިގެން ޕޮޒިޓިވިޓީ ރޭޓް 10 އިންސައްތައަށްވުރެ މަތިން ހުރި ސަރަހައްދުތަކުގައި ރެސްޓޯރެންޓްތަކުގެ އެތެރޭގައި ތިބެގެން ޚިދުމަތް ނުދިނުމަަށެވެ.

ސަރުކާރުން ވަނީ އުމުރުން 30 އަހަރުން މަތީ އެންމެން ބޫސްޓަރ ޑޯޒް ޖެހުމަށް އަންގާފައެވެ. އަދި އުމުރުން 12 އަހަރުން މަތީ އެންމެން ވެކްސިން ޖެހުމަށް ވަނީ މަޖުބޫރުކޮށްފައެވެ.

ޕާކިސްތާނުގައި މިހާރު ފެންނަމުންދާ ކޭސްތައް ޕީކަށް އަރާނެކަމަށް ބެލެވެނީ ކުރިޔަށް އޮތް ދެހަފްތާގައި ކަމަށް އެގައުމުގެ މާހިރުން ދެކެއެވެ.

ޕާކިސްތާނުގެ 70 މިލިއަން މީހުން ވަނީ ދެ ޑޯޒް ފުރިހަމަކޮށްފައެވެ. އެއީ 32 އިންސައްތަ މީހުންނެވެ.