ހައިކޯޓުން އެންމެ ގިނަ މައްސަލަ ނިންމީ 2021 ވަނަ އަހަރު
މިދިޔަ އަހަރު ހައި ކޯޓަށް ޖުމްލަ 835 މައްސަލައެއް ހުށަހެޅުނު
ދިވެހިރާއްޖޭގެ ހައި ކޯޓު
ހައިކޯޓުގެ ތާރީހުގައި އެންމެ ގިނަ މައްސަލަ ނިންމީ މިދިޔަ 2021 ވަނަ އަހަރުކަމަށް އެ ކޯޓުގެ ތަފާސްހިސާބުތަކުން ދައްކައިފިއެވެ.
ހައި ކޯޓުން އާންމުކުރި ތަފާސްހިސާބު ދައްކާ ގޮތުން 2021 ވަނަ އަހަރު އެކޯޓުން 672 މައްސަލައެއްވަނީ ނިންމާފައެވެ. އެއީ މީގެ ކުރީ އަހަރު ތަކުގައި ހުށަހެޅުނު މައްސަލަތައްވެސް ހިމެނޭ ގޮތަށެވެ. މީގެ ކުރިން އެންމެ ގިނަ މައްސަަލަ ނިންމާފައިވަނި 2017 ވަނަ އަހަރުއެވެ. އެ އަހަރު 552 މައްސަލަ ނިންމިއެވެ.
މިދިޔަ އަހަރު ހައިކޯޓަށް ޖުމްލަ 835 މައްސަލައެއް ހުށަހެޅުނެވެ. އޭގެ ތެރެއިން ރަޖިސްޓްރީ ކުރީ 625 މައްސަލައެކެވެ.
އެންމެ ގިނަ މައްސަލަތައް ކޯޓުގައި ރަޖިސްޓްރީ ކުރީ ސެޕްޓެމްބަރު މަހުއެވެ. އެ މަހު 104 މައްސަލައެއް ހުށަހެޅި 85 މައްސަލައެއް ރަޖިސްޓްރީ ކުރިއެވެ. އެންމެ ގިނަ މައްސަލަ ނިންމީ މާޗު މަހު އެވެ. އެ މަހު 100 މައްސަލައެއް ނިންމިއެވެ.
ނިންމި މައްސަލަތަކާއި ރަޖިސްޓްރީ ކުރި މައްސަލަތަކުގެ ބާވަތައް ބަލާއިރު ގިނައީ މަދަނީ މައްސަލަތަކެވެ. އެ ބާވަތުގެ 242 މައްސަލައެއް 2021ވަނަ އަހަރު ރަޖިސްޓްރީ ކުރިއެވެ. އަދި 325 މައްސަލައެއް ނިންމިއެވެ. ދެން އެންމެ ގިނައިން ނިންމީ ޖިނާއި މައްސަލަތަކެވެ. އެ ބާވަތުގެ 192 މައްސަލަ ރަޖިސްޓްރީ ކުރެވި، 214 މައްސަލަ ނިންމިއެވެ. ވަޒީފާއަ ބެހޭ 67 މައްސަލައެއް ނިންމި އިރު 2021ވަނަ އަހަރު 133 މައްސަލަ ރަޖިސްޓްރީ ކުރިއެވެ.
