ފޯކައިދޫއިން ބަންޑާރަ ގޯތި ދޫކުރަނީ

ށ.ފޯކައިދޫ އިން ދިރިއުޅުމަށްޓަކައި ބަންޑާރަ ގޯތި ދޫކުރުމަށް އެރަށު ކައުންސިލުން ނިންމާއިފިއެވެ.

ފޯކައިދޫ ކައުންސިލުން މައުލޫމާތު ދޭ ގޮތުގައި ދޫކުރުމަށް ނިންމާފައިވަނީ 2000 އަކަފޫޓުގެ 120 ބަންޑާރަ ގޯއްޗެވެ. އަދި ދޫކުރުމަށް ނިންމާފައިވާ 120 ގޯތި ހިމެނޭ ސަރަޙައްދު އެ އިދާރާގެ ނޯޓިސް ބޯޑުގައި ބެހެއްޓިފައި ހުންނާނެ ކަމަށް ވެސް ކައުންސިލުން މައުލޫމާތު ދޭއެވެ.

ފޯކައިދޫ ކައުންސިލްގެ ރައީސް އަޙުމަދު އާސިފް ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ އެ ރަށުގައި ގޯތި ދޫނުކުރާތާ 10 އަހަރު ވެފައިވާ ކަމަށެވެ. އަދި ދިރިއުޅުމަށްޓަކައި ގޯތި ބޭނުންވާ ފަރާތްތަށް އެރަށުގައި ވަރަށް ގިނަކަަމަށެވެ.

އާބާދީގައި 2000 އެއްހާ މީހުން ދިރިއުޅޭ ފޯކައިދޫގައި ގޯތި ދޫކުރުމަށް ނިންމާފައިވަނީ "ދިރިއުޅުމަށްޓަކާއި ބަންޑާރަ ގޯތި ދޫކުރުމާއި ބެހޭ އުސޫލް" އާއި އެއްގޮތަށް ކަމަށް ފޯކައިދޫ ކައުންސިލް އިދާރާއިން މައުލޫމާތު ދެއެވެ. އެހެންކަމުން ޝަރުޠު ފުރިހަމަވާ ފަރާތްތަކުން ގޯއްޗަށް އެދޭ ފޯމް ފުރިހަމަ ކުރުމަށް ފަހު ފޯމާއި އެކު ހުށަހަޅަންޖެހޭ އެންމެހާ ލިޔެކިޔުންތަށް ފޯކައިދޫ ކައުންސިލް އިދާރާއަށް ހުށަހެޅުމަށް އެ އިދާރާއިން އެދިފައިވޭއެވެ. އަދި ފުރިހަަމަ ނުވާ ފޯމްތަށް ބާޠިލް ކުރެވޭކަމަށްވެސް ކައުންސިލުން މައުލޫމާތުދޭއެވެ.

ފޯމް ދޫކުރުމާއި ބަލާއިގަތުން އޮންނާނީ 25 ޖަނަވަރީ 2022 އިން 15 ފެބްރުއަރީ 2022 ވަނަ ދުވަހުގެ ނިޔަލަށް ބަންދު ނޫން ކޮންމެ ދުވަހެއްގެ ހެނދުނު 9:00 އިން 13:30ގެ ނިޔަަލަށް ފޯކައިދޫ ކައުންސިލް އިދާރާގައެވެ.