ފޯކައިދޫ ކޮމިޔުނިޓީ ސެންޓަރ ޕްރޮޖެކްޓް ކައުންސިލުން ކުރިޔަށް ގެންދިޔުމަށް ހަވާލުކޮށްފި

ށ. ފޯކައިދޫ ކޮމިޔުނިޓީ ސެންޓަރ ޕްރޮޖެކްޓް ކައުންސިލުން ކުރިޔަށް ގެންދިއުމަށް ހަވާލުކޮށްފިއެވެ.

ލޯކަލް ގަވަރމެންޓް އޮތޯރިޓީ (އެލްޖީއޭ)އިން ބުނީ އިންޑިޔާ ސަރުކާރުގެ ހިލޭއެހީގެ ދަށުން ގާއިމުކުރުމަށް ހަމަޖެހިފައިވާ ފޯކައިދޫ ކޮމިޔުނިޓީ ސެންޓަރ ޕްރޮޖެކްޓް ބުރާސްފަތި ދުވަހު އެރަށުގެ ކައުންސިލުން ކުރިޔަށްގެންދިއުމަށް ހަވާލުކޮށްފައިވާ ކަމަށެވެ.

އެލްޖީއޭއިން ބުނީ މި ޕްރޮޖެކްޓް 5.2 މިލިއަނަށް 26 ނޮވެމްބަރ 2019 ވަނަ އަހަރު ބަޔަކާއި ހަވާލުކޮށްފައިވާ ކަމަށެވެ. ނަމަވެސް ކޮވިޑް-19 ހަލަތާއި، އަދި މިނޫނަސް ތަފާތު ސަބަބުތަކާއި ހުރެ މި ޕްރޮޖެކްޓް ކުރިޔަށް ނުގެންދެވުމުން ކޮންޓްރެކްޓް މިއަހަރު ބާތިލްކޮށްފައިވާކަމަށް އެލްޖީއޭއިން ބުނެއެވެ.

އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 69 ވަނަ މާއްދާގައިވާ ގޮތުގެ މަތީން މި ޕްރޮޖެކްޓް ކައުންސިލާއި ހަވާލުކޮށްގެން ކުރިޔަށް ގެންދިޔުމަށް ވެވުނު އެއްބަސްވުމުގައި އެލްޖީއޭގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ ފާތިމަތު އަފްޝާން ލަތީފް އެވެ. އަދި ކައުންސިލްގެ ފަރާތުން ސޮއިކުރެއްވީ ފޯކައިދޫ ކައުންސިލްގެ ރައީސް މުހައްމަދު ރާޝިދު އެވެ.

މި މަހުގެ ތިންވަނަ ދުވަހު ވެސް ވަނީ މި އޮތޯރިޓީގެ ބަޖެޓްގައި ހިމެނޭ 3 ޕީ.އެސް.އައި.ޕީ މަޝްރޫއުއެއް ކައުންސިލުތަކުން ކުރިޔަށް ގެންދިޔުމަށް ހަވާލުކޮށްފައެވެ. އެއީ 2،815،320.04 (ދެމިލިއަން އަށްލައްކަ ފަނަރަހާސް ތިން ސަތޭކަ ވިހި ރުފިޔާ ހަތަރު ލާރި)އަށް ހއ. ކެލާ މަސްމާރުކޭޓް، 2،500،000.00 (ދެމިލިއަން ފަސްލައްކަ) ރުފިޔާއަށް ހދ. ވައިކަރަދޫ މަސްމާރުކޭޓް އަދި 3،500،000.00 (ތިން މިލިއަން ފަސްލައްކަ) ރުފިޔާއަށް ބ. ފުޅަދޫ ކައުންސިލް އިދާރާގެ މަސައްކަތެވެ.

2021 ވަނަ އަހަރު އަލަށް ފެށުމަށް 24 ޕްރޮޖެކްޓެއް އެލްޖީއޭއަށް ވަނީ ލިބިފައެވެ.