މުހިއްމު މުއައްސަސާއެއް އޮތީ ގާނޫނީ ހުސްކަމެއްގެ ތެރޭގައި

ކޮރަޕްޝަނުގެ މައްސަލަތައް ބެލުމުގެ ޒިންމާ އޮތް މުއައްސަސާ އޮތީ ހުއްޓުމަކަށް އައިސްފައެވެ. އެންޓި ކޮރަޕްޝަން ކޮމިޝަން, އޭސީސީ އަށް އެކަށީގެންވާ ގޮތެއްގައި މަސައްކަތް ނުކުރެވޭ ކަމުގެ ތުހުމަތާ އެކު، އެ ކޮމިޝަނުގެ ހުރިހާ މެމްބަރުން މަގާމުން ވަކި ކުރުމުގެ މަސައްކަތް ރައްޔިތުންގެ މަޖިލީހުން ކޮށް މެމްބަރުން ވަކި ކުރަން ނިންމި ހިސާބުން ހުރިހާ މެމްބަރުން އިސްތިއުފާ ދިނީއެވެ. އެހެންކަމުން މުއައްސަސާ ހުސްކޮށް އޮންނަތާ މަހެއްވާން މިވަނީ ގާތްވެފައެވެ.

މިއާއެކު ރައްޔިތުންގެ ކަންބޮޑުވުންތައް އޮތް އެމްއެމްޕީއާރްސީގެ ޚިޔާނާތުގެ މައްސަލަ ފަދަ ކޮރަޕްޝަނުގެ ބޮޑެތި މައްސަލަތަކުގެ ތަހުގީގު ވަނީ ހުއްޓިފައެވެ. އެ ކޮމިޝަނުގެ ގާނޫނު ބުނާ ގޮތުން އެއްވެސް ކަމެއް ނިންމޭނީ ކޮމިޝަނުގެ ޖަލްސާއެއްގައި މެމްބަރުންގެ އަޣުލަބިއްޔަތު ލިބިގެންނެވެ. އެހެންކަމުން މިހާރު ކޮމިޝަން އޮތީ ގާނޫނީ ހުސްކަމެއްގެ ތެރޭގައެވެ. ކޮރަޕްޝަނުގެ މައްސަލަތަައް ފެންމަތިވިޔަސް އެ މަައްސަލަތައް ބެލޭނެ ގޮތެއް ނެތެވެ.

މެމްބަރުން ހަމައަށް ތިބެ އޭސީސީގެ މަސައްކަތް އެކަށީގެންވާ ސްޕީޑެއްގައި ކުރިއަށް ނުގޮސް އޮތް ކަމީ ހަގީގަތެކެވެ. ކޮރަޕްޝަނަށް ތުހުމަތު ކުރެވޭ އެތައް މައްސަލައެއް ބެލިއިރު ދައުވާ ކުރަން ފޮނުވީ މަދު މައްސަލަތަކެކެވެ. ދައުވާކުރަން ޕީޖީއަށް ފޮނުވާ މައްސަލަަތަކުގެ ތެރެއިންވެސް ގިނަ މައްސަލަތަކުގައި ދައުވާ ނުކުރެވެއެވެ. ތަހުގީގު ފުރިހަމަ ކުރުމަށް އަލުން އޭސީސީއަށް ފޮނުވަން ޖެހެއެވެ. އެންމެ ފަހުން އޭސީސީއާ ޕީޖީން ތަޅާފޮޅުމަކަށްދާހެންވެސް ހީވެއެވެ.

މެމްބަރުން ވަކިކުރުމުގެ ވާހަކަ ދެކެވިގެން ދިޔައީވެސް އެމްއެމްޕީއާރްސީގެ މައްސަލަ ފަދަ ބޮޑެތި މައްސަލަތައް ނުނިމި ދިގުލައިގެން ދާތީއެވެ. އެކަމަށް އެތައް މުއްދަތެއް ދިންނަމަވެސް މުއްދަތުތައް ފަހަނައަޅައި ދިޔައިރު އެއްވެސް ކުރިއެރުމެއް ނުލިބެއެވެ. އޭގެ ބަދަލުގައި ކޮމިޝަނުގެ މެމްބަރުން ދެއްކީ، އުޒުރު ތަކެކެވެ. ބަޖެޓުގެ ދަތިކަމާއި މުވައްޒަފުންގެ ދަތިކަމުގެ ވާހަކައެވެ. މިވާހަކަތައް އަޑުއެހުމަށްފަހު ބަޖެޓް ކޮމިޓީން ކޮމިޝަނުން ބޭނުންވި މިންވަރަށް މި އަހަރަށް ބަޖެޓް ދޭން ނިންމިއެވެ. އެހެންނަމަވެސް އަހަރު ފެށިގެން ދިޔައިރު، ކޮމިޝަން މިއޮތީ ހުސްކަމެއްގެ ތެރޭގައެވެ. އެއްވެސް މަަސައްކަތެއް ކުރިއަށް ގެންދެވޭ ހާލަތެއްގައެއް ނޫނެވެ. މިފަދަ މުހިއްމު މުއައްސަސާއެއްގެ މެމްބަރުން ނެތި ދުވަސްތައް ފާއިތުވެގެން ދިޔުމަކީ ރައްޔިތުންނަށާއި ދައުލަތަށްވެސް ގެއްލުން ހުރި ކަމެކެވެ.

މެމްބަރުން ވަކި ކުރުމަށް މަޖިލީހުގެ ކޮމިޓީން ނިންމި ހިސާބުން ވަރަށް ބާރު ސްޕީޑްގައި އެ މަސައްކަތް ކުރިއަށް ދިޔައެވެ. ދައުރުން ބޭރުގައި ކޮމިޓީތައް ބާއްވައި މި މައްސަލަ ކޮޅެއްގައި ޖެއްސިއެވެ. އެހެންނަމަވެސް މެމްބަރުން އަލުން އައްޔަން ކުރުމަށް އެހާ ފޯރިއެއް ނެތޭވެސް ދެންނެވިދާނެއެވެ. ކޮމިޝަނުގެ މެމްބަރު ކަމަށް ކުރިމަތިލާން ހުޅުވާލުމަށްފަހު ދެވަނަ ފަހަރަށް އެ މުއްދަތު އިތުރު ކޮށްފައިވާއިރު، މިކަމުގައި އިތުރު މަސައްކަތެއް މިހާތަނަކަށް ނުކުރެއެވެ. 

އޭސީސީގެ އިތުރުންވެސް ދައުލަތުން ބޮޑު ޚަރަދުކޮށް އެއްވެސް ނަތީޖާއެއް ނުނެރެވޭ ކޮމިޝަންތައް މަދެއް ނޫނެވެ. އެތައް ބާރެއް ދީފައިވާ މަރު ކޮމިޝަނުންވެސް މާ ބޮޑު މަސައްކަތްތަކެއް ކުރާތަނެއް ނުފެނެއެވެ. މިނިވަން މުއައްސަސާތައް އުފައްދަނީ މުހިންމު ބޭނުންތަކުގައެވެ. އެހެންކަމުން މުއައްސަސާއެއް ގާނޫނީ ހުސްކަމެއްގެ ތެރޭގައި އޮތުމަކީ މައްސަލައެކެވެ.