ކޮވިޑްގައި މިއަދުގެ 4 ވަނަ މަރު!
މިއާއެކު ރާއްޖެއިން ކޮވިޑްގައި ނިޔާވި މީހުންގެ އަދަދު ވަނީ 269އަށް އަރާފައި
ކޮވިޑުގައި ނިޔާވާ މީހުން ވަޅުމަށް ޚާއްސަ ކުރެވިފައިވާ ހުޅުމާލެ ސަހަރާ
ލ. ގަމުގައި ހުންނަ ކޮވިޑް ފެސިލިޓީގައި ފަރުވާދެމުންދިޔަ އިތުރު މީހަކު ނިޔާވެ، ބުރާސްފަތި ދުވަހު ކޮވިޑް ބަލީގައި ނިޔާވީ މީހުންގެ އަދަދު ހަތަރަކަށް އަރައިފިއެވެ.
ރާއްޖެއިން ބުރާސްފަތި ދުވަހު ފުރަތަމަ މީހާ ނިޔާވެފައި ވަނީ ހުޅުމާލޭ ކޮވިޑް ފެސިލިޓީގައި ފަރުވާ ދެމުން ދަނިކޮށެވެ. އެއީ 63 އަހަރުގެ އަންހެނެކެވެ.
ދެވަނަ މީހާ ނިޔާވީ ލ. ގަން ރީޖަނަލް ހޮސްޕިޓަލްގައި ހުންނަ ކޮވިޑް ފެސިލިޓީގައި ފަރުވާ ދެމުން ދަނިކޮށެވެ. އެއީ 79 އަހަރުގެ ފިރިހެނެކެވެ.
ތިން ވަނަ މީހާ ނިޔާވެފައި ވަނީ އައްޑޫ ސިޓީންނެވެ. އެއީ އުމުރުން 76 އަހަރުގެ ދިވެހި ފިރިހެނެކެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)ން ބުނީ، މެންދުރު 1:47ހާއިރު ގަމު ކޮވިޑް މެޑިކަލް ފެސިލިޓީގައި ފަރުވާދެމުންދިޔަ އުމުރުން ދުވަސްވީ ދިވެހި ފިރިހެނަކު ނިޔާވެފައިވާ ކަމަށެވެ. އެއީ 84 އަހަރުގެ މީހެކެވެ.
މިއާއެކު ރާއްޖެއިން ކޮވިޑްގައި ނިޔާވި މީހުންގެ އަދަދު ވަނީ 269އަށް އަރާފައެވެ.
