ސޫދާން ބަލިކޮށް މިސްރު ދެވަނަ ބުރަށް

އެފްރިކާ ކަޕް އޮފް ނޭޝަންސްގައި ބުދަ ދުވަހުގެރޭ ކުޅުނު މެޗުން ސޫދާން ބަލިކޮށް، މުބާރާތުގެ ދެވަނަ ބުރުގެ ޖާގައެއް މިސްރުން ހޯދައިފިއެވެ.

ކެމަރޫނުގައި ކުރިއަށްދާ މި މުބާރާތުގެ ގްރޫޕް ޑީގައި ކުޅުނު މެޗުން މިސްރު މޮޅުވީ ސޫދާން އަތުން 1-0 ގެ ނަތީޖާއަކުންނެވެ.

މި މެޗުގައި މިސްރުން ކާމިޔާބުކުރި ހަމައެކަނި ލަނޑު އެ ޓީމުން ޖަހާފައިވަނީ މެޗުގެ ފުރަތަމަ ހާފުގައެވެ. މެޗުގެ 35 ވަނަ މިނެޓުގައި އަބްދުﷲ އަލް ސައީދު ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ މުހައްމަދު އަބްދުލްމޯނެއިމެވެ. މި މެޗުގައި މިސްރުގެ ތަރި މުހައްމަދު ސަލާހަށް އެންމެ އެދެވޭ ކުޅުމެއް ދެއްކިފައި ނުވާއިރު، އޭނާ ހުއްޓުވުމުގައި ސޫދާނުގެ ޑިފެންޑަރުން ވަނީ ކާމިޔާބު ހޯދާފައެވެ.

މި ނަތީޖާއާއެކު ދެވަނަ ބުރަށް މިސްރު ދަތުރުކޮށްފައިވަނީ ގްރޫޕް ޑީގެ ދެވަނަ ޓީމުގެ ގޮތުގައެވެ. އެގޮތުން މިސްރަށް ކުޅުނު ތިން މެޗުން ހަ ޕޮއިންޓް ލިބިފައިވާއިރު، އެއްވަނައިގައި އޮތް ނައިޖީރިއިން ވަނީ ކުޅުނު ތިން މެޗުންވެސް މޮޅުވެ ނުވަ ޕޮއިންޓް ހަމަކޮށްފައެވެ. މި ގްރޫޕުގައި ބުދަ ދުވަހުގެރޭ ކުޅުނު މެޗުން ނައިޖީރިއާ މޮޅުވީ ގިނީ-ބިސާއު އަތުން 2-0 ގެ ނަތީޖާއަކުންނެވެ. އަދި މި ގްރޫޕުގެ ތިންވަނައިގައި އޮތް ސޫދާނާއި ފުލުގައި އޮތް ގިނީ-ބިސާއު އަށް ލިބިފައިވަނީ އެންމެ ޕޮއިންޓެކެވެ.

އެފްރިކާ ކަޕް އޮފް ނޭޝަންސްގައި ޖުމްލަ ހަ ގްރޫޕް ހިމެނޭއިރު، ކޮންމެ ގްރޫޕަކުންވެސް އެންމެ މޮޅު ދެ ޓީމު ދެވަނަ ބުރުގައި ވާދަކުރާނެއެވެ. ދެން ދެވަނަ ބުރުގެ ޖާގައެއް ލިބޭނީ ތިންވަނައިގައި ނިންމާ ހަ ޓީމުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ޓީމަކަށެވެ. މިހާތަނަށް މި މުބާރާތުގެ ގަދަ 16 ގެ ޖާގައެއް ހޯދާފައިވާ ޓީމުތަކަކީ މިސްރާއި ނައިޖީރިއާގެ އިތުރުން ބުރްކީނާ ފާސޯ، ގެބޮން، ސެނެގާލް، ގިނީ، ކެމަރޫން، މޮރޮކޯ، ކޭޕް ވާޑޭ އަދި މަލާވީއެވެ. ބާކީ ޖާގަތައް ކަށަވަރުވާނީ ބުރާސްފަތި ދުވަހުގެރޭ ކުޅޭ މެޗުތަކަށްފަހުއެވެ.