ގއ. ދާންދޫ ބަނދަރު ބޮޑުކުރުމުގެ މަސައްކަތާއި ބ. ކަމަދޫ ބަނދަރު މަރާމާތު ކުރުމުގެ މަސައްކަތް އެމްޓީސީސީއާ ހަވާލުކޮށްފި އެވެ.

އެ ދެ މަޝްރޫއުގެ އެއްބަސްވުމުގައި ހައުސިންގ އެންޑް އިންފްރާންސްޓްރަކްޗާރ މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޒީނިޔާ އަހުމަދު ހަމީދެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ.

ކަމަދޫ ބަނދަރު މަރާމާތު ކުރުމުގެ މަޝްރޫއުގެ ދަށުން 25،636 ކިއުބިކް މީޓަރު ބަނދަރު ފުންކުރުމާއި، 180 މީޓަރު ބޭރުތޮށި ޖެހުން ހިމެނެއެވެ. އަދި 628 މީޓަރު ރިވެޓްމަންޓް ޖެހުމާއެކު، 346 މީޓަރު އެއްގަމުތޮށި ޖެހުންވެސް މިމަޝްރޫގައި ހިމެނެއެވެ. މީގެއިތުރުން 70 މޫރިން ރިންގް ހަރުކުރުމާއި، 10 މޫރިން ބޮއި ހަރުކުރުން ހިމެނެއެވެ. އަދި 1730 އަކަ މީޓަރުގެ ޕޭވްމަންޓް ހެދުމާއި، ރޭމްޕްހެދުމުގެ އިތުރުން ނެރުބައްތިޖެހުމާއި މަގުބައްތި ޖެހުންވެސް ހުމެނެއެވެ.

މި މަޝްރޫއު އެމްޓީސީސީއާ ހަވާލުކުރީ 47 މިލިއަން ރުފިޔާއަށް، 400 ދުވަސް ތެރޭގައި މަސައްކަތް ނިންމާ ގޮތަށެވެ. 

ދާންދޫ ބަނދަރު ބޮޑުކުރުމުގެ މަޝްރޫއުގެ ދަށުން 81،404 ކިއުބިކް މީޓަރު ބަނދަރު ފުންކުރުމާއި، 333 މީޓަރު ބޭރުތޮށި ލުމާއި، 370 މީޓަރު ރިވެޓްމަންޓް ޖެހުން ހިމެނެއެވެ. އަދި 30 މީޓަރު ގްރޮއިން ޖެހުމާއި، 529 މީޓަރު އެއްގަމުތޮށި ލުމާއި، 1 އަކަ މީޓަރުގެ ޕޭވްމަންޓް ހެދުން ހިމެނެއެވެ. މީގެއިތުރުން މަގުބައްތިޖެހުމާއި ނެރުބައްތި ޖެހުންހިމެނެއެވެ.

މި މަޝްރޫއު އެމްޓީސީސީއާ ހަވާލުކުރީ 70.8 މިލިއަން ރުފިޔާއަށް، 485 ދުވަސް ތެރޭގައި މަސައްކަތް ނިންމާ ގޮތަށެވެ.