ކޮވިޑް ފަންޑަށް ޕާކިސްތާނުގެ ޚައިބަރ ޕަޚްތުންކުވާ ޕްރޮވިންސްގެ ސިއްހަތާބެހޭ ޑިޕާޓްމެންޓުން ޚިޔާނާތްތެރިވި މައްސަލައެއް ފެންމަތިވެއްޖެ
19 ޖެނުއަރީ 2022 | ބުދަ 14:26ކޮވިޑް ފަންޑުގެ ގޮތުގައި ލިބުނު 1،388 މިލިއަން ރުޕީސްއަށް ވަނީ ޚިޔާނާތްތެރިވެފައި
ޚައިބަރ ޕަޚްތުންކުވާ ޕްރޮވިންސްގެ ހޮސްޕިޓަލެއްގެ ތެރޭގައި އާންމުން ފަރުވާ ހޯދުމަށް ގޮސް
ކޮވިޑް-19ގެ ސިއްހީ ފަންޑަށް ޕާކިސްތާނުގެ ޚައިބަރ ޕަޚްތުންކުވާ ޕްރޮވިންސްގެ ސިއްހަތާބެހޭ ވުޒާރާއިން ޚިޔާނާތްތެރިވި މައްސަލައެއް ފެންމަތިވެއްޖެއެވެ.
ރިޕޯޓްތައް ބުނާ ގޮތުން ޚައިބަރ ޕަޚްތުންކުވާ ޕްރޮވިންސްގެ ސިއްހަތާބެހޭ ވުޒާރާއިން ވަނީ ކޮވިޑް ފަންޑުގެ ގޮތުގައި ލިބުނު 1،388 މިލިއަން ރުޕީސްއަށް ޚިޔާނާތްތެރިވެފައެވެ. މި މައްސަލަ ޕާކިސްތާނުގެ އޮޑިޓަރ ޖެނެރަލް އޮފީހުން ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށް ރިޕޯޓްތަކުން ބުނެއެވެ.
ޕާކިސްތާނުގެ އޮޑިޓަރ ޖެނެރަލްގެ އޮފީހުން ބުނީ ޚައިބަރ ޕަޚްތުންކުވާ ސިއްހަތާބެހޭ ވުޒާރާއިން ފައިސާގެ ކަންކަމުގައި އަމަލުކޮށްފައިވަނީ ދޯދިޔާކޮށް ކަމަށާއި، އަދި ޚަރަދު ކުރުމުގައި ސިއްހީ ވުޒާރާގެ އިސްވެރިންގެ އާއިލާ މެމްބަރުންނަށް ފައިދާ ވާނެހެން ޚަރަދުކޮށްފައިވާ ކަމަށެވެ.
އޮޑިޓަރ ޖެނެރަލް އޮފީހުން މި މައްސަލަ ސީރިއަސް މައްސަލައެއްގެ ގޮތުގައި ބަލަން ފެށިއިރު، މީގެ ކުރިން ޕާކިސްތާނުގެ އުއްތަމަ ފަނޑިޔާރު ގުލްޒާރް އަހުމަދު ވަނީ އެ ޕްރޮވިންސްގެ ސިއްހީ ހާލަތާމެދު ކަންބޮޑުވުން ފާޅުކުރައްވާފައެވެ.
ޚައިބަރ ޕަޚްތުންކުވާ ޕްރޮވިންސްގެ ވެރިންގެ ކޮރަޕްޝަނުގެ މައްސަލަ ބަލަން ސަރުކާރަށް ގޮވާލައްވާ ކަމަށާއި، ރައްޔިތުންނަށް ދޭން ޖެހޭ އެންމެ އާދައިގެ ޚިދުމަތްތަކަށް ޚިޔާނާތްތެރިވުން ބަލައިނުގަނެވޭނެ ކަމަށްވެސް އުއްތަމަ ފަނޑިޔާރު ގުލްޒާރް އަހުމަދު ވިދާޅުވިއެވެ.
