މަސައްކަތަށް ގާބިލް ސޯޝަލް ވޯކަރުން ލިބުމުގައި ދަތިތަކާ ކުރިމަތިވާކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރ މުހައްމަދު ޝިހާބު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ސްޓޭޓް މިނިސްޓަރ ވިދާޅުވީ, އަމާންވެށިތަކުގައާއި ދަމަނަވެށީގައި މަސައްކަތްކުރުމަށް ސޯޝަލް ވޯކަރުން ހޯދުމަށް އެތައް ފަހަރަކު އިއުލާނުކުރުމުންވެސް ކަމަށް ގާބިލް ރަނގަޅު މީހުން ލިބުމަށް ދަތިވާ ކަމަށެވެ. އަދި ކުރިމަތިލާ މީހުންވެސް މަދުކަމަށް ޝިހާބު ވިދާޅުވިއެވެ.
އެހެންނަމަވެސް މިކަަމަށް ގާބިލް މީހުން އުފެއްދުމަށް މަސައްކަތްތަކެއް ކުރައްވަމުންދާކަމަށާއި، މިކަމަށް ޚާއްސަ ސެޓްފިކެޓް ލެވެލްގެ ކޯހެއް ޑިޒައިންކުރުމުގެ މަސައްކަތް ކުރައްވަމުންގެންދަވާކަމަށް ޝިހާބު ވިދާޅުވިއެވެ.
ޝިހާބު ވިދާޅުވީ ސޯޝަލް ވޯކަކީ މުޅިން އަލަށް ދިވެހިންގެ ތެރެއަށް ތައާރަފުވެގެން އައިސްފައިވާ ކަމެއް ކަމަށެވެ. މިކަމަކީވެސް ރަނގަޅު މަސައްކަތެއްކަން މީހުންނަށް ކިޔައިދިނުމަށާއި، މި މަސައްކަތަށް ނިކުތުމަށް މީހުންގެ ހިތުގައި އޮންނަ ބިރު ކަނޑުވަންޖެހޭ ކަމަށްވެސް ޝިހާބު ވިދާޅުވިއެވެ.
ގިނަ މީހުންނަށް ހީވެފައި އޮންނަ ގޮތުގައި ސޯޝަލް ވޯކަރުންނަކީ 24 ގަޑިއިރު މަސައްކަތުގައި އުޅެންޖެހޭ ބައެކޭ. އެހެންނަމަވެސް އެމީހުންވެސް މަސައްކަތްކުރަންޖެހޭނީ ހަމަ 8 ގަޑިއިރު. އެމީހުންނަކީ އޮފީސްތަކުގައި މެނޭޖަރުން ކުރާފަދަ މަސައްކަތެއް ކުރާ ބައެއް.ޖެންޑަރ މިނިސްޓްރީގެ ސްޓޭޓް މިނިސްޓަރ މުހައްމަދު ޝިހާބު
ޝިހާބު ވިދާޅުވީ ސްކޫލްތަކަށް މުދައްރިސުން ބޭނުންވާ ފަދައިން އަމާންވެށިތަކުގައި ކުދިންގެ ކަންކަން މެނޭޖްކުރުމަށް އެވަރަށް ސޯޝަލް ވޯކަރުން ބޭނުންވާކަމަށެވެ. މިވަގުތު ތިބީ 86 ސޯޝަލް ވޯކަރުން ކަމަށާއި، އަދިވެސް އިތުރަށް ސޯޝަލް ވޯކަރުން ބޭނުންވާކަމަށް ޝިހާބު ވިދާޅުވިއެވެ.
