އިޓާލިއަން ލީގުގައި ހޯމަ ދުވަހުގެރޭ ކުޅުނު މެޗުން ފަހު ވަގުތު ސްޕެޒިއާ އަތުން ބަލިވެ، ތާވަލުގެ އެއްވަނައަށް އަރަން ލިބުނު ފުރުސަތު އޭސީ މިލާނުން ނަގާލައިފިއެވެ.

އަމިއްލަ ދަނޑުގައި ކުޅުނު މެޗުން މިލާން ބަލިވީ ސްޕެޒިއާ އަތުން 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި މިލާނުން ގިނަ ހަމަލާތަކެއް އުފެއްދިއިރު، މި ހާފުގެ ފަހު މިނެޓުގައި އެ ޓީމަށް ވަނީ ޕެނަލްޓީއެއް ލިބިފައެވެ. މިއީ އޭރިއާ ތެރެއިން މިލާނުގެ ރަފައެލް ލެއާއޯއަށް ސްޕެޒިއާގެ ގޯލްކީޕަރު އީވާން ޕްރޮވެޑެލް ފައުލްކުރުމުން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ. އެކަމަކު މިލާނުގެ ތެއޯ ހެނާންޑޭޒް ފޮނުވާލި ޕެނަލްޓީ ދިޔައީ އަރިމަތީ ދަނޑި ކައިރިން ބޭރަށެވެ. ނަމަވެސް އޭގެ މިނެޓެއް ފަހުން، ފުރަތަމަ ހާފުގެ އިތުރު ވަގުތުގައި މިލާނުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ލެއާއޯއެވެ.

މި މެޗުގެ ދެވަނަ ހާފުގައި ސްޕެޒިއާއިން ކުޅުން ރަނގަޅުކުރިއިރު، މެޗުގެ 64 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. ޑެނިއަލް ވާޑާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ކެވިން އަގުއިޑެލެވެ. އަދި މެޗުގެ އިތުރު ވަގުތުގައި ވިކްޓަ ކޮވަލެންކޯ ހުރަސްކޮށްދިން ބޯޅައަކުން އިމެނުއަލް ގިޔާޒީ ވަނީ ލަނޑެއް ޖަހައި، މި މެޗުން ސްޕެޒިއާ މޮޅުކޮށްދީފައެވެ.

މި މެޗުން ބަލިވުމާއެކު ތާވަލުގެ ދެވަނައިގައި މިލާން އޮތީ ކުޅުނު 22 މެޗުން ލިބުނު 48 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން އިންޓަ މިލާނަށް 21 މެޗުން ވަނީ 50 ޕޮއިންޓް ލިބިފައެވެ. އަދި މިލާން ބަލިކުރި ސްޕެޒިއާ އޮތީ ތާވަލުގެ 14 ވަނައިގައި 22 މެޗުން 22 ޕޮއިންޓާއެކުއެވެ.