ށ. ފުނަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން އިންތިޒާމް ކޮށްގެން އެރަށު ކަނބަލުންނަށް ހާއްޞަކޮށް ކުރިއަށް ގެންދިޔަ ފަހާކޯސް ނިންމާ ބައިވެރިންނަށް ސެޓްފިކެޓް ހަވާލުކޮށްފިއެވެ.

އެރަށު އަންހެނުން ކޮމެޓީން މައުލޫމާތުދިން ގޮތުގައި މިކޯހަކީ ޓޮޕްސީ އާއި ފުނަދޫ ކައުންސިލާއި އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީ ގުޅިގެން ކުރިއަށް ގެންގޮސްފައިވާ ކޯހެއްކަމަށެވެ.

އެގޮތުން 24 ބައިވެރިންނާއި އެކު މިކޯސް ފަށާފައިވަނީ މިދިޔަ ޑިސެމްބަރ މަހުގެ 31 ވަނަ ދުވަހުއެވެ. އަދި މިމަހު 12 ވަނަ ދުވަހު ކޯސް ނިންމާ 13 ވަނަ ދުވަހުގެ ރޭ ވަނީ ބައިވެރިންނަށް ސެޓްފިކެޓް ހަވާލުކޮށްފައެވެ.

މިކޯހުގައި ބައިވެރިންނަށް ކުލާސްތައް ކުރިއަށް ނަގާދީފައިވަނީ ޓޮޕްސީގެ ތަޖުރިބާކާރު 2 ފެހުންތެރިން ކަމަށްވާ ސިޔާމާ އަހްމަދު އަދި މަރިޔަމް ސަލްވާ ކަމަށް އަންހެނުންގެ ކޮމެޓީން މައުލޫމާތު ދެއެވެ.

އެ ކޮމިޓީއިން ފާހަގަކުރި ގޮތުގައި މިފަދަ ހަރަކާތެއް ކުރިއަށް ގެންދިއުމުގެ އެންމެ ބޮޑު މަގުޞަދަކީ ފަހަން ބޭނުންވާ ފަރާތްތަކަށް އެފުރުޞަތު ފަހި ކޮށްދިނުމުގެ އިތުރުން އާމްދަނީ ހޯދާނެ މަގެއް އެރަށުގެ ކަނބަލުންނަށް ތަނަވަސްކޮށްދިނުމެވެ.