ފ.ނިލަންދޫގައި މިސްކިތެއް ޢިމާރާތް ކުރުމަށް 11 މިލިއަން ރުފިޔާގެ މަޝްރޫއެއް
17 ޖެނުއަރީ 2022 | ހޯމަ 09:16މި މިސްކިތުގައި އަންހެނުންނަށް ނަމާދުކުރެވޭނެ އިންތިޒާމްވެސް ހަމަޖެހިފައި ހުންނާނެ
ފ.ނިލަންދޫގައި މިސްކިތެއް ޢިމާރާތް ކުރުމަށް 11 މިލިއަން ރުފިޔާގެ މަޝްރޫއެއްގައި ސޮއި ކުރުމުގެ ރަސްމިއްޔާތު
ފ.ނިލަންދޫގައި މިސްކިތެއް ޢިމާރާތްކުރުމަށް 11 މިލިއަން ރުފިޔާގެ މަޝްރޫއެއްގެ އެއްބަސްވުމުގައި ސޮއިކޮށްފިއެވެ.
ފ.ނިލަންދޫގައި މިސްކިތެއް ޢިމާރާތްކުރުމުގެ އެއްބަސްވުމުގައި މާލާ ހައި ރައިޒިން ޕްރައިވެޓް ލިމިޓެޑާއެކު އިސްލާމިކް މިނިސްޓްރީން ސޮއި ކޮށްފައިވަނީ ހޯމަ ދުވަހުއެވެ. އެގޮތުން އެ ކުންފުނީގެ ފަރާތުން މި އެއްބަސްވުމުގައި ސޮއިކޮށްފައިވަނީ އެކުންފުނީގެ މެނޭޖިން ޑިރެކްޓަރ ޢަލީ އިސްމާޢިލެވެ. މިނިސްޓްރީ އޮފް އިސްލާމިކް އެފެއާޒްގެ ފަރާތުން މި އެއްބަސްވުމުގައި ސޮއިކޮށްފައިވަނީ، މިނިސްޓަރ ޑރ.އަޙްމަދު ޒާހިރު ޢަލީއެވެ.
365 ދުވަސްތެރޭގައި ޢިމާރާތްކުރާގޮތަށް ހަމަޖެހިފައިވާ މި މިސްކިތުގެ ޢަމަލީ މަސައްކަތް ފެށުމަށް ހަމަޖެހިފައިވަނީ 14 ފެބްރުއަރީ 2022 ވަނަ ދުވަހުއެވެ. ދިވެހި ދައުލަތުން 11.8 މިލިއަން ރުފިޔާ ޚަރަދުކޮށްގެން ހަދާ މި މިސްކިތަކީ 500 މީހުންގެ ޖާގައިގެ މިސްކިތެކެވެ.
އިސްލާމިކް މިނިސްޓްރީން މައުލޫމާތު ދޭ ގޮތުގައި މި މިސްކިތުގައި އަންހެނުންނަށް ނަމާދުކުރެވޭނެ އިންތިޒާމްވެސް ހަމަޖެހިފައި ހުންނާނެއެވެ.
2021 ވަނަ އަހަރު ތައްޔާރުކުރި ޑިޒައިނަކަށް ޢިމާރާތްކުރުމަށް ހަމަޖެހިފައިވާ މި މިސްކިތުގެ މަސައްކަތްތައް ނިމޭއިރު އިއާދަކުރަނިވި ޙަކަތަ ބޭނުންކޮށްގެން މިސްކިތް އޭސީކުރުމަށްވެސް ހަމަޖެހިފައިވާކަމަށް މިނިސްޓްރީން ބުނެއެވެ.
އަދި މި މަޝްރޫއު ނިމިގެންދާއިރު، މިސްކިތުގައި ފާޚާނާއަކާއި، ވުޟޫކުރާބަޔަކާއި، ގުދަނެއްގެ އިތުރުން، މުންނާރެއް ހުންނާނެކަމަށް މިނިސްޓްރީން ބުނެއެވެ.
